មុននឹងលាលែងតំណែងជានាយករដ្ឋមន្ត្រីកម្ពុជា មេដឹកនាំខ្មែរដែលកងទ័ពវៀតណាមលើកបន្តុបលោក ហ៊ុន សែន បានចុះហត្ថលេខាស្នើសុំសញ្ជាតិខ្មែរឱ្យជនជាតិវៀតណាមខុសច្បាប់យ៉ាងច្រើនសន្ធឹកសន្ធាប់នៅឆ្នាំ២០២៣ នេះ ដែលពួកគេបានរស់នៅលើទឹកដីកម្ពុជាតាំងពីអំឡុងទសវត្សរ៍ឆ្នាំ១៩៨០ មក។
ព្រះមហាក្សត្រខ្មែរសម្តេចព្រះបរមនាថ សីហមុនី បានចេញព្រះរាជក្រឹត្យផ្តល់សញ្ជាតិខ្មែរដល់ជនជាតិវៀតណាម ជាបន្តបន្ទាប់ តាមច្បាប់សញ្ជាតូបនីយកម្មនៅដើមឆ្នាំ២០២៣ នេះ តាមការស្នើសុំរបស់លោក ហ៊ុន សែន ដល់ជនជាតិវៀតណាមខុសច្បាប់រាប់សិបនាក់ និងបានប្តូរឈ្មោះតាមលំនាំខ្មែរថែមទៀត ដូចជាជនជាតិវៀតណាម ឈ្មោះ ណុង វ៉ាន់គីម ប្តូរមកជា រិទ្ធិ សម្បត្តិ ឈ្មោះ ង្វៀន វ៉ានទីវ ប្តូរឈ្មោះមកជា ហួរ សុធី ឈ្មោះ ហ្វាម ធានហ្វុក ប្តូរឈ្មោះមកជា ធេង ឧត្តម និងឈ្មោះ ង្វៀន ឈីវធីញហ៊ុង ប្តូរឈ្មោះមកជា មាន បញ្ញា ជាដើម។
ជាងនេះទៀត ជនជាតិវៀតណាមឈ្មោះ ង្វៀន ឌុកអញ បានប្តូរឈ្មោះមកជា ហេង តារា ឈ្មោះ ទ្រឿង ហ័ងលីន ជាជនជាតិវៀតណាមសញ្ជាតិថៃ មិនបានប្តូរឈ្មោះមកជាខ្មែរទេ ប៉ុន្តែក៏ទទួលបាននូវសញ្ជាតិខ្មែរផងដែរ រួមនិងជនជាតិវៀតណាមច្រើនរាប់មិនអស់ផ្សេងទៀត។
កាលពីថ្ងៃទី២៦ ខែកុម្ភៈ ឆ្នាំ១៩៨៦ មេដឹកនាំខ្មែរដែលវៀតណាមលើកបន្តុប លោក ហ៊ុន សែន បានចុះហត្ថលេខាលើសារាចរណែនាំស្ដីពីការអនុវត្តគោលនយោបាយចំពោះនិគមជនវៀតណាមនៅកម្ពុជា ដែលតម្រូវឲ្យរដ្ឋាភិបាលកម្ពុជា ផ្តល់ដីធ្លី ទីជម្រក ផ្តល់អត្តសញ្ញាណប័ណ្ណ ថែរក្សា និងផ្គត់ផ្គង់ឲ្យបានត្រឹមត្រូវ ហើយសារាចរនេះនៅតែមានសុពលភាពរហូតដល់សព្វថ្ងៃនេះ ហើយកម្ពុជាក៏កំពុងតែអនុវត្តនូវការផ្តល់សិទ្ធិរស់នៅដល់ជនអន្តោប្រវេសន៍វៀតណាមខុសច្បាប់លើទឹកដីរបស់ខ្លួនជាបន្តបន្ទាប់ផងដែរ។
ទាក់ទិននឹងបញ្ហានេះ ក្នុងដំណើរទស្សនកិច្ចរបស់ប្រធានាធិបតីវៀតណាម លោក Nguyen Xuan Phuc នៅកម្ពុជា កាលពីចុងខែធ្នូ ឆ្នាំ២០២១ បានប្ដេជ្ញាក្នុងកិច្ចប្រជុំមួយនៅក្នុងស្ថានទូតវៀតណាម ក្នុងរាជធានីភ្នំពេញថា លោកនឹងសម្របសម្រួលឱ្យពលរដ្ឋវៀតណាមដែលរស់នៅក្នុងប្រទេសកម្ពុជាដោយខុសច្បាប់ក្លាយជាពលរដ្ឋរស់នៅកម្ពុជាដោយស្របច្បាប់វិញឲ្យខាងតែបាន។
ជុំវិញបញ្ហានេះ កាលពីថ្ងៃទី១៣ ខែឧសភា ឆ្នាំ២០២២ នាយករដ្ឋមន្ត្រីវៀតណាម លោក ផាម មិញ ជីញ បានសុំឱ្យលោក ហ៊ុន សែន ជួយដល់ពលរដ្ឋវៀតណាមដែលកំពុងរស់នៅលើទឹកដីកម្ពុជាដោយខុសច្បាប់ មកជាការរស់នៅដោយស្របច្បាប់វិញ ខណៈលោក ហ៊ុន សែន បានយល់ព្រមនឹងសំណើនេះទាំងស្រុង។
ទាក់ទិននឹងការផ្តល់សញ្ជាតិដល់ជនជាតិវៀតណាម កាលពីថ្ងៃទី១៨ ខែតុលា ឆ្នាំ២០២៣ ក្នុងជំនួបជាមួយប្រធានរដ្ឋវៀតណាម លោក វ៉ វ៉ាន់ធឿង អំឡុងពេលចូលរួមវេទិកាខ្សែក្រវាត់ និងផ្លូវ នៅសាធារណរដ្ឋប្រជាមានិតចិន បានស្នើឱ្យលោក ហ៊ុន ម៉ាណែត បន្តយកចិត្តទុកដាក់បង្កើតលក្ខខណ្ឌកាន់តែងាយស្រួលសម្រាប់សហគមន៍វៀតណាមនៅកម្ពុជា ទាំងការរស់នៅ ការធ្វើការងារ ព្រមទាំងដោះស្រាយបញ្ហាឯកសារផ្លូវច្បាប់ឱ្យបានកាន់តែល្អប្រសើរថែមទៀត ខណៈនាយករដ្ឋមន្ត្រីកម្ពុជាលោក ហ៊ុន ម៉ាណែត ក៏មិនបានបដិសេធនឹងសំណើនេះដែរ។
កាលពីអំឡុងឆ្នាំ២០២២ ក្រសួងមហាផ្ទៃ បានចេញផ្សាយរបាយការណ៍របស់ខ្លួនថា ចាប់តាំងពីឆ្នាំ១៩៩៩ ដល់ឆ្នាំ២០២២ កន្លងទៅ ជនបរទេសដែលបានសុំចូលសញ្ជាតិខ្មែរតាមរយៈសញ្ជាតូបនីយកម្ម និងតាមរយៈនៃការបរិច្ចាគប្រាក់ឱ្យដល់រដ្ឋាភិបាលកម្ពុជា មកទល់នឹងឆ្នាំ២០២២ កន្លងទៅនេះ គឺមានចំនួនសរុបដល់ជាង ២ពាន់នាក់ហើយ (២៥២៨នាក់) ដែលមកពីសញ្ជាតិដើមចំនួន ៥០ ខុសៗគ្នា។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១៣ វិច្ឆិកា នេះថា រដ្ឋាភិបាលកម្ពុជានៅក្រោមការដឹកនាំរបស់គណបក្សប្រជាជនកម្ពុជាចាប់តាំងពីជំនាន់លោក ហ៊ុន សែន ដែលជាឪពុក បន្តដល់កូនរបស់គាត់គឺលោក ហ៊ុន ម៉ាណែត មិនដែលហ៊ានសើរើ ឬអនុវត្តច្បាប់សញ្ជាតិរបស់កម្ពុជានោះទេ ពីព្រោះការជួយសម្រួលដល់ជនជាតិវៀតណាម គឺជាថ្នូរទទួលបានការជួយជ្រោមជ្រែងអំណាចយ៉ាងធំសម្រាប់លោក ហ៊ុន សែន ដើម្បីបន្តឱ្យកូនប្រុសរបស់គាត់ គឺលោក ហ៊ុន ម៉ាណែត ដែលកំពុងកាន់តំណែងជានាយករដ្ឋមន្ត្រីខ្មែរនៅពេលនេះ។
លោក ម៉ែន ណាត លើកឡើងថា ពលរដ្ឋខ្មែរមិនអាចដាក់ក្តីសង្ឃឹមលើរដ្ឋាភិបាលថ្មីដែលជាកូនៗរបស់មេដឹកនាំចាស់ៗកាលពីមុនបានទេ ព្រោះពួកគេកំពុងតែអនុវត្តនូវការដឹកនាំដែលគ្មានស្មារតីជាតិដូចឪពុករបស់ពួកគេដែរ ខណៈមេដឹកនាំវៀតណាមតែងបញ្ជ្រាបនយោបាយប្រជាសាស្ត្រដោយការបង្ហូរជនជាតិរបស់គេឱ្យចូលទៅរស់នៅលើទឹកដីរបស់ខ្មែរដោយយកចិត្តទុកដាក់ជាទីបំផុត៕