មេដឹកនាំដែលល្បីល្បាញខាងរំលោភដីរដ្ឋធ្វើជាកម្មសិទ្ធិលោក ហ៊ុន សែន សម្រេចកាត់ឆ្វៀលដែនគម្របព្រៃឈើឆ្នាំ២០០២ ក្នុងស្រុកស្ទឹងហាវ ខេត្តព្រះសីហនុ ជិត ៥០០ហិកតារ ផ្តល់ជាកម្មសិទ្ធិដល់ក្រុមហ៊ុនឯកជន ប៊ូយ៉ុង ខ្មែរ II កាលពីដើមខែកក្កដា ឆ្នាំ២០២៣ មុននឹងលោកចុះចេញពីតំណែងជានាយករដ្ឋមន្ត្រីរបស់កម្ពុជា។
លោក ហ៊ុន សែន បានចេញអនុក្រឹត្យស្ដីពីការកាត់ឆ្វៀលដីក្នុងដែនគម្របព្រៃឈើឆ្នាំ២០០២ ជិត ៥០០ហិកតារ (៤៨៦ហិកតារ និង ៨៦អា) ស្ថិតក្នុងភូមិ១ និងភូមិ២ ឃុំអូរត្រេះ ស្រុកស្ទឹងហាវ ខេត្តព្រះសីហនុ ឱ្យទៅជាកម្មសិទ្ធិរបស់ក្រុមហ៊ុន ប៊ូយ៉ុង ខ្មែរ II កាលពីថ្ងៃទី៧ ខែកក្កដា ឆ្នាំ២០២៣ កន្លងទៅនេះ។
លោក ហ៊ុន សែន ដែលគេស្គាល់ថាជាមេដឹកនាំឆ្នើមខាងបំផ្លាញធនធានធម្មជាតិរបស់ប្រទេស បញ្ជាឱ្យរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងដែនដី នគរូបនីយកម្ម និងសំណង់ រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងរុក្ខាប្រមាញ់ និងនេសាទ រួមទាំងក្រសួងពាក់ព័ន្ធ និងមន្ត្រីរដ្ឋបាលខេត្តព្រះសីហនុ ទាំងអស់ ត្រូវអនុវត្តនូវអនុក្រឹត្យនេះឱ្យមានប្រសិទ្ធភាពចាប់ពីថ្ងៃចុះហត្ថលេខាតទៅ។
ដែនគម្របព្រៃឈើឆ្នាំ២០០២ ក្នុងខេត្តព្រះសីហនុ ត្រូវបានមេដឹកនាំបក្សកាន់អំណាចលោក ហ៊ុន សែន កាត់ឆ្វៀលទៅឱ្យជាកម្មសិទ្ធិរបស់ក្រុមហ៊ុនឯកជនជាបន្តបន្ទាប់ ក្នុងនោះក៏មានការកាត់ឆ្វៀលឱ្យបក្ខពួក និងកូនៗរបស់គាត់ដែរ ដែលមានទំហំដល់ទៅរាប់រយហិកតារឯណោះ ហើយការកាត់ឆ្វៀលដីក្នុងដែនគម្របព្រៃឈើមួយនេះ បានធ្វើឱ្យពលរដ្ឋដែលរស់នៅក្នុងតំបន់នោះរងនូវការចោទប្រកាន់ និងចាប់ឃុំខ្លួន ព្រមទាំងបណ្តេញពីលំនៅឋានផងដែរ ដូចជា ទំនាស់រវាងពលរដ្ឋ និងធនាគារកាណាឌីយ៉ា របស់ឧកញ៉ា ពុង ឃាវសែ ជុំវិញការកាត់ឆ្វៀលដីក្នុងតំបន់អភិរក្សនេះជាដើម។
ជាក់ស្តែង លោក ហ៊ុន សែន បានសម្រេចកាត់ឆ្វៀលដីគម្របព្រៃឈើជាង ១០ហិកតារនៅខេត្តព្រះសីហនុ ផ្តល់ជាកម្មសិទ្ធិដល់ធនាគារកាណាឌីយ៉ា របស់ឧកញ៉ា ពុង ឃាវសែ កាលពីថ្ងៃទី៣១ ខែធ្នូ ឆ្នាំ២០២១ កន្លងទៅ ដែលការកាត់ឆ្វៀលនេះត្រូវបានពលរដ្ឋតវ៉ាថា ម្ចាស់ធនាគារនេះបានរំលោភយកដីរបស់ពួកគេបន្ថែមទៀត ប៉ុន្តែនៅទីបំផុត ពលរដ្ឋដែលតវ៉ាទាំងនោះនៅតែត្រូវបានបណ្តេញចេញពីលំនៅឋានដដែល។
ជាងនេះទៀត កាលពីថ្ងៃទី៩ ខែមិថុនា ឆ្នាំ២០២០ លោក ហ៊ុន សែន ក៏បានចេញអនុក្រឹត្យកាត់ដីទំហំ ៦០០ហិកតារ ស្ថិតក្នុងឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ ឱ្យទៅជាកម្មសិទ្ធិឯកជនរបស់ឧកញ៉ា សេង ញ៉ក និងជំទាវ លី អាផណ ដែលត្រូវជាសាច់ញាតិរបស់ឧកញ៉ា លី យ៉ុងផាត់ ផងដែរ។
លើសពីនេះ កាលពីអំឡុងខែកក្កដា ឆ្នាំ២០២០ លោក ហ៊ុន សែន ក៏ធ្លាប់បានចេញអនុក្រឹត្យកាត់ដីជាង ៤០ហិកតារចេញពីដែនគម្របព្រៃឈើឆ្នាំ២០០២ នៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ឱ្យទៅអ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់គាត់ថែមទៀត។
ជាងនេះទៀត លោក ហ៊ុន សែន កាលពីថ្ងៃទី៦ ខែមីនា ឆ្នាំ២០២៣ ក៏បានកាត់ឆ្វៀលដីចេញពីដែនគម្របព្រៃឈើឆ្នាំ២០០២ ជាង ១ម៉ឺនម៉ែត្រក្រឡា (១ហិកតារ ២១អា ៦១សង់ទីអា) ឱ្យទៅលោក ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីនៃរដ្ឋាភិបាលថ្មីរបស់លោក ហ៊ុន ម៉ាណែត ផងដែរ។
ជុំវិញការកាត់ឆ្វៀលដីក្នុងស្រុកស្ទឹងហាវ ខេត្តព្រះសីហនុ នេះ លោក ហ៊ុន សែន មិនត្រឹមតែកាត់ដីក្នុងដែនគម្របព្រៃឈើឱ្យទៅជាកម្មសិទ្ធិរបស់ក្រុមហ៊ុនឯកជនប៉ុណ្ណោះទេ សូម្បីដីសាធារណៈរបស់រដ្ឋផ្សេងទៀត ក៏ត្រូវបានកាត់ឆ្វៀលឱ្យក្រុមហ៊ុនឯកជនជាបន្តបន្ទាប់ដែរ។
ជាក់ស្តែង កាលពីថ្ងៃទី២៣ ខែមិថុនា ឆ្នាំ២០២៣ លោក ហ៊ុន សែន បានកាត់ដីសាធារណៈរបស់រដ្ឋទំហំ ៧៩៩ហិកតារ ស្ថិតនៅឃុំទំនប់រលក ស្រុកស្ទឹងហាវ ខេត្តព្រះសីហនុ ឱ្យទៅជាកម្មសិទ្ធិរបស់ក្រុមហ៊ុនឯកជន C99 International Investment (Cambodia) Co., Ltd. ផងដែរ។
ជាងនេះទៀត កាលពីថ្ងៃទី៣១ ខែមីនា ឆ្នាំ២០២៣ លោក ហ៊ុន សែន បានសម្រេចផ្ដល់ដីឧទ្យានជាតិសមុទ្រកោះរ៉ុងជិត ២៥០ហិកតារ (២៤២ហិកតារ) ឱ្យទៅក្រុមហ៊ុនកូនប្រុសពៅរបស់លោក យឹម ឆៃលី ដែលជាដន្លងរបស់គាត់ ធ្វើជាកម្មសិទ្ធិ ព្រមទាំងទទួលបានសិទ្ធិជួលដីសាធារណៈរបស់រដ្ឋទំហំជិត ៥០០ហិកតារ (៤៨៩ហិកតារ) ថែមទៀត។
ការកាត់ឆ្វៀលដីរដ្ឋឱ្យទៅក្រុមហ៊ុនឯកជននេះ គេជឿថានឹងមិនបញ្ចប់នោះទេសម្រាប់រដ្ឋាភិបាលដែលដឹកនាំដោយក្រុមគ្រួសារត្រកូលហ៊ុនមួយនេះ ព្រោះថាកាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន បានចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន ១៥ ដើម្បីត្រៀមធ្វើអនុប្បយោគ និងបែងចែកជាកម្មសិទ្ធិឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ ខណៈខេត្តដែលមិនជាប់ក្នុងអនុក្រឹត្យនេះ ក៏ត្រូវរងនូវការបែងចែកឱ្យទៅក្រុមហ៊ុនឯកជនកាន់កាប់ធ្វើជាកម្មសិទ្ធិជាបន្តបន្ទាប់ផងដែរ៕