29 C
Phnom Penh

លោក អ៊ុំ សំអាន៖ វៀតណាម​បាន​ដាក់​បញ្ចូល​ប្រទេស​កម្ពុជា​ជា​អាណាខេត្ត​របស់​គេ​រួច​ទៅ​ហើយ

ដោយ ឌឹ ខេមបូឌា ដេលី

បទវិភាគ

តំណាងរាស្ត្រ​អតីត​គណបក្ស​សង្គ្រោះ​ជាតិ លើកឡើង​ថា សព្វថ្ងៃ​នេះ រដ្ឋាភិបាល​កុម្មុយនីស្ត​វៀតណាម បាន​ដាក់​បញ្ចូល​ប្រទេស​កម្ពុជា​ទៅ​ជា​អាណា​ខេត្ត​មួយ​របស់​គេ​រួច​ទៅ​ហើយ បើ​ទោះបី​វៀតណាម មិន​ទាន់​ឈ្លានពាន​លេប​ត្របាក់​យក​ប្រទេស​កម្ពុជា​ទាំងស្រុង​ក៏ដោយ។

លោក អ៊ុំ សំអាន សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​១៥ វិច្ឆិកា នេះ​ថា ជំនួប​រវាង​រដ្ឋមន្ត្រី​ការពារ​ជាតិ​ថ្មី​របស់​កម្ពុជា លោក ទៀ សីហា និង​នាយករដ្ឋមន្ត្រី​វៀតណាម លោក ផាម មីញជីញ ក្នុង​ដំណើរ​ទស្សនកិច្ច​របស់​លោក ទៀ សីហា ទៅ​កាន់​ប្រទេស​វៀតណាម កាលពី​ថ្ងៃ​ចន្ទ​ដើម​សប្តាហ៍​នេះ បាន​បង្ហាញ​យ៉ាង​ច្បាស់​ថា រដ្ឋាភិបាល​កុម្មុយនីស្ត​វៀតណាម មិន​បាន​ចាត់ទុក​កម្ពុជា​ជា​ប្រទេស​ឯករាជ្យ​ស្មើ​មុខ​នឹង​ប្រទេស​វៀតណាម នោះ​ទេ។

លោក អ៊ុំ សំអាន អះអាង​ថា ហេតុផល​គឺ​នៅ​ត្រង់​ថា ក្នុង​ជំនួប​នោះ​គ្មាន​ការ​ដាក់​តាំង​ទង់ជាតិ​ខ្មែរ​តំណាង​ប្រទេស​កម្ពុជា​នៅ​ពីក្រោយ​ខ្នង​លោក ទៀ សីហា ដែល​ជា​រដ្ឋមន្ត្រី​ក្រសួង​ការពារ​ជាតិ​របស់​កម្ពុជា ដូចជា​នាយករដ្ឋមន្ត្រី​វៀតណាម បាន​ដាក់​តាំង​ទង់ជាតិ​វៀតណាម នៅ​ពីក្រោយ​ខ្នង​លោក ផាម មីញជីញ ឡើយ ដែល​មាន​ន័យ​ថា វៀតណាម​មិន​បាន​ឱ្យ​តម្លៃ​កម្ពុជា​ក្នុង​នាម​ជា​ប្រទេស​ឯករាជ្យ​នោះ​ទេ ហើយ​ក្នុង​ន័យ​នេះ ក៏​ជា​ការ​បង្ហាញ​ផង​ដែរ​ថា វៀតណាម​បាន​ចាត់ទុក​កម្ពុជា​ជា​អាណា​ខេត្ត​មួយ​របស់​ខ្លួន។

តំណាងរាស្ត្រ​អតីត​គណបក្ស​សង្គ្រោះ​ជាតិ​រូប​នេះ​បញ្ជាក់​ថា កន្លងមក រដ្ឋាភិបាល​វៀតណាម​ក៏​មិន​ដែល​ដាក់​តាំង​ទង់ជាតិ​កម្ពុជា​នៅ​ពីក្រោយ​ខ្នង​លោក ហ៊ុន ម៉ាណែត ដែរ រាល់​ពេល​ដែល​មាន​ជំនួប​រវាង​ភាគី​ទាំង​ពីរ​ម្តងៗ អំឡុង​ពេល​ដែល​លោក ហ៊ុន ម៉ាណែត កាន់​តួនាទី​ជា​មេបញ្ជាការ​កងទ័ព​ជើងគោក​របស់​កម្ពុជា​នោះ។

កងទ័ព​ជើងគោក​នៃ​កងយោធពល​ខេមរភូមិន្ទ បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​១៤ វិច្ឆិកា នេះ​ថា រដ្ឋមន្ត្រី​ការពារ​ជាតិ​ថ្មី​របស់​កម្ពុជា លោក ទៀ សីហា បាន​ជួប​ជាមួយ​នាយករដ្ឋមន្ត្រី​វៀតណាម លោក ផាម មីញជីញ អំឡុង​ពេល​ដំណើរ​ទស្សនកិច្ច​ទៅ​កាន់​ប្រទេស​វៀតណាម កាលពី​ថ្ងៃទី​១៣ វិច្ឆិកា នេះ ដែល​ជា​ជំនួប​លើកដំបូង​របស់​លោក ក្រោយពី​ឡើង​កាន់​តំណែង​ជា​រដ្ឋមន្ត្រី​ការពារ​ជាតិ​របស់​កម្ពុជា កាលពី​ចុង​ខែ​សីហា កន្លង​ទៅ​នោះ។

លោក ទៀ សីហា រដ្ឋមន្ត្រី​ក្រសួង​ការពារ​ជាតិ​កម្ពុជា ក្នុង​ជំនួប​ពិភាក្សា​ការងារ​ជាមួយ​លោក ផាម មីញជីញ (Phạm Minh Chính) នាយករដ្ឋមន្ត្រី​នៃ​សាធារណរដ្ឋ​សង្គម​និយម​វៀតណាម នា​ប្រទេស​វៀតណាម កាលពី​ថ្ងៃទី​១៣ ខែ​វិច្ឆិកា ឆ្នាំ​២០២៣។

ប្រភព​ដដែល​អះអាង​ថា នាយករដ្ឋមន្ត្រី​វៀតណាម លោក ផាម មីញជីញ បាន​បញ្ជាក់​ថា កម្ពុជា និង​វៀតណាម មាន​ទំនាក់ទំនង​ជា​ប្រវត្តិសាស្ត្រ​ជាមួយ​គ្នា​តាំងពី​យូរលង់​ណាស់​មក​ហើយ ហើយ​ធ្លាប់​បាន​រួម​សាមគ្គី​តស៊ូ​ជម្នះ​រាល់​ការ​លំបាក និង​មាន​កិច្ច​សហប្រតិបត្តិការ​ជាមួយ​គ្នា​រហូត​មក ក្នុង​គោលដៅ​អភិវឌ្ឍ​ប្រទេស​ឱ្យ​មាន​ការ​រីកចម្រើន និង​ដើម្បី​ពង្រឹង​កិច្ច​សហប្រតិបត្តិការ​លើ​វិស័យ​ការពារ​ជាតិ​នៃ​ប្រទេស​ទាំង​ពីរ។

កងទ័ព​ជើងគោក​នៃ​កងយោធពល​ខេមរភូមិន្ទ បញ្ជាក់​ថា លោក ទៀ សីហា បាន​បញ្ជាក់​ថា ការ​បំពេញ​ដំណើរ​ទស្សនកិច្ច​មិត្តភាព​នេះ គឺជា​ដំណើរ​ទស្សនកិច្ច​ជា​ប្រវត្តិសាស្ត្រ​របស់​លោក ដើម្បី​បន្ត​ពង្រឹង​ទំនាក់ទំនង និង​កិច្ច​សហប្រតិបត្តិការ​ផ្នែក​នយោបាយ សន្តិសុខ និង​សង្គម​ជាមួយ​មិត្ត​វៀតណាម ក្នុង​ការ​កសាង​សហគមន៍​កម្ពុជា-វៀតណាម ជាមួយ​គ្នា​ទៅ​ថ្ងៃ​អនាគត។

ទាក់ទិន​នឹង​បញ្ហា​នេះ ក្នុង​ជំនួប​រវាង​រដ្ឋមន្ត្រី​ក្រសួង​ការពារ​ជាតិ​លោក ទៀ បាញ់ ជាមួយ​រដ្ឋមន្ត្រី​ក្រសួង​ការពារ​ជាតិ​វៀតណាម លោក Phan Van Giang កាលពី​ពេល​កន្លង​ទៅ ក៏​បាន​ប្ដេជ្ញា​ចិត្ត​បន្ត​ពង្រឹង និង​ពង្រីក​កិច្ច​សហប្រតិបត្តិការ​ឲ្យ​កាន់តែ​ជិតស្និទ្ធ​ដែរ ដើម្បី​រក្សា​ចំណង​មិត្តភាព​ជា​ប្រពៃណី កសាង​សន្តិភាព ស្ថិរភាព និង​ការ​អភិវឌ្ឍ​សម្រាប់​បម្រើ​ឲ្យ​ផល​ប្រយោជន៍​ប្រជាជន​នៃ​ប្រទេស​ទាំង​ពីរ។

អនុប្រធាន​វេទិកា​ពលរដ្ឋ​លោក ម៉ែន ណាត ធ្លាប់​បាន​ប្រាប់​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា រដ្ឋាភិបាល​កម្ពុជា​ល្មម​ដល់​ពេល​ដែល​ត្រូវ​ត្រួតពិនិត្យ​ឡើងវិញ​នូវ​ទំនាក់ទំនង​រវាង​កម្ពុជា-វៀតណាម ហើយ ថា​តើ​រយៈពេល​ជាង ៤០​ឆ្នាំ​ក្រោម​ការ​ដឹកនាំ​របស់​គណបក្ស​ប្រជាជន​កម្ពុជា​ដែល​ដឹកនាំ​ដោយ​លោក ហ៊ុន សែន កន្លង​មក​នេះ កម្ពុជា​ទទួល​បាន​ផល​ចំណេញ​អ្វី​ខ្លះ​ពី​ទំនាក់ទំនង​ជា​មិត្តភាព​ជាមួយ​ប្រទេស​វៀតណាម។ ជាង​នេះ​ទៀត លោក​ថា នាយករដ្ឋមន្ត្រី​កម្ពុជា​លោក ហ៊ុន ម៉ាណែត ក៏​ត្រូវ​គិតគូរ​ពី​បញ្ហា​នេះ​ឱ្យ​កាន់តែ​ស៊ីជម្រៅ​ផង​ដែរ។

លោក ម៉ែន ណាត បញ្ជាក់​ថា កម្ពុជា​ក៏​ល្មម​ដល់​ពេល​អនុវត្ត​ច្បាប់​ពង្រឹង​អធិបតេយ្យភាព​ជាតិ​របស់​ខ្លួន​ដែល​ពាក់ព័ន្ធ​ជាមួយ​នឹង​ប្រទេស​វៀតណាម ដែរ ដូចជា​ការ​អនុវត្ត​ច្បាប់​សមុទ្រ​ឆ្នាំ​១៩៨២ អនុវត្ត​ច្បាប់​អន្តោប្រវេសន៍​ឆ្នាំ​១៩៩៤ ច្បាប់​សញ្ជាតិ​ឆ្នាំ​១៩៩៦ និង​ត្រូវ​ផ្អាក​បោះ​បង្គោល​ព្រំដែន​ទ្វេភាគី​ជាមួយ​វៀតណាម ជាដើម។ លើស​ពី​នេះ កម្ពុជា​ក៏​ត្រូវ​ដក​ខ្លួន​ចេញពី​តំបន់​ត្រីកោណ​អភិវឌ្ឍន៍​កម្ពុជា វៀតណាម ឡាវ (CLV) ថែម​ទៀត នោះ​ទើប​កម្ពុជា​អាច​រក្សា​អធិបតេយ្យ​របស់​ខ្លួន​បាន​ដោយ​ឯករាជ្យ​ពិតប្រាកដ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស