សមាជិកមូលដ្ឋានគណបក្សភ្លើងទៀន មកពីតាមបណ្តាខេត្តនានា និង ៩រាជធានីរាប់រយនាក់ ប្រមូលផ្ដុំគ្នានៅខាងមុខទីស្នាក់ការកណ្តាលរបស់គណបក្សមួយនេះ តវ៉ាឲ្យលោក ទាវ វណ្ណុល ដែលជាប្រធានបក្ស និងលោក លី សុធារ៉ាយុត្តិ អគ្គលេខាធិការគណបក្សភ្លើងទៀន ចុះចេញពីតំណែងដោយឥតលក្ខខណ្ឌ ដោយសារពួកគេមិនមានសមត្ថភាព និងអសីលធម៌។
សមាជិកគណបក្សភ្លើងទៀនរាប់រយនាក់ទាំងនោះ បាននាំគ្នាឈរកាន់បដាវែងៗរំលេចដោយអក្សរស្នើឲ្យលោក ទាវ វណ្ណុល ប្រធានគណបក្ស និងលោក លី សុធារ៉ាយុត្តិ អគ្គលេខាបក្ស ចុះចេញពីតំណែងដោយឥតលក្ខខណ្ឌ។
នៅក្នុងញត្តិថ្កោលទោសរបស់អ្នកតវ៉ា បានរៀបរាប់ថា ពួកគេទាំងអស់គ្នាជាសមាជិក សមាជិកា និងក្រុមប្រឹក្សាឃុំ-សង្កាត់ជាប់ឆ្នោត ព្រមទាំងថ្នាក់ដឹកនាំគណបក្សភ្លើងទៀននៅថ្នាក់មូលដ្ឋាន សូមធ្វើការថ្កោលទោសយ៉ាងដាច់អហង្ការចំពោះលោក ទាវ វណ្ណុល ប្រធានគណបក្សភ្លើងទៀន និងលោក លី សុធារ៉ាយុត្តិ មន្ត្រីគណបក្សភ្លើងទៀន រួមទាំងថ្នាក់ដឹកនាំគណបក្សនៅខាងលើមួយចំនួនទៀត ដែលបានឃុបឃិតគ្នាប្រើអំណាចគណបក្ស ទៅគំរាមកំហែង និងដកហូតតួនាទីសមាជិក សមាជិកា និងក្រុមប្រឹក្សាឃុំ-សង្កាត់ជាប់ឆ្នោតរបស់គណបក្សនៅថ្នាក់ក្រោមជាតិ តាមទំនើងចិត្តយ៉ាងអយុត្តិធម៌។
លិខិតដដែលបានលើកឡើងថា ពួកគេទាំងអស់គ្នាស្នើឲ្យលោក ទាវ វណ្ណុល និងលោក លី សុធារ៉ាយុត្តិ បញ្ឈប់ជាបន្ទាន់នូវការគំរាមកំហែង និងការប៉ុនប៉ងដកហូតតួនាទីសមាជិក សមាជិកា និងក្រុមប្រឹក្សាឃុំ-សង្កាត់ជាប់ឆ្នោតគណបក្សភ្លើងទៀននៅថ្នាក់មូលដ្ឋាន និងស្នើឲ្យគោរពសិទ្ធិសមាជិក សមាជិកាគណបក្ស ក្នុងការធ្វើសេចក្តីសម្រេចចិត្តដោយផ្ទាល់ខ្លួន ដោយសេរី គ្មានការរើសអើង គ្មានការបង្ខិតបង្ខំ គ្មានការបង្ខាំង និងគ្មានការដកតួនាទីតាមទំនើងចិត្តជាដាច់ខាត។
លិខិតដដែលបានលើកឡើងថា ដើម្បីរក្សានូវសាមគ្គីភាព និងឯកភាពផ្ទៃក្នុង ព្រមទាំងរក្សានូវស្មារតីដើមរបស់គណបក្សភ្លើងទៀន ពួកគេដែលជាសមាជិក និងជាថ្នាក់ដឹកនាំនៅថ្នាក់មូលដ្ឋាន ស្នើឲ្យថ្នាក់ដឹកនាំគណបក្សដែលទន់ជ្រាយទាំងពីរ គឺលោក ទាវ វណ្ណុល និងលោក លី សុធារ៉ាយុត្តិ ចុះចេញពីតំណែងក្នុងគណបក្សដោយឥតលក្ខខណ្ឌចាប់ពីថ្ងៃនេះតទៅ។
អតីតអ្នកនាំពាក្យគណបក្សភ្លើងទៀន និងជាបេក្ខជនតំណាងសមាជិកព្រឹទ្ធសភាគណបក្សឆន្ទៈខ្មែរ លោក គីមសួរ ភីរិទ្ធ បានប្រាប់សារព័ត៌មានក្នុងស្រុកថា ការតវ៉ារបស់សកម្មជនគណបក្សភ្លើងទៀន ជាសកម្មភាពដែលមានការរៀបចំពីក្រោយ។
លោកបន្តថា ការស្នើសុំដកមេដឹកនាំគណបក្សភ្លើងទៀន គឺជារឿងអត់ប្រយោជន៍ ដោយហេតុថា បើគណបក្សភ្លើងទៀនរលាយ សមាជិកក្រុមប្រឹក្សាឃុំ-សង្កាត់ជាប់ឆ្នោតតាមរយៈគណបក្សភ្លើងទៀន ដែលជាអង្គបោះឆ្នោតជ្រើសតាំងសមាជិកព្រឹទ្ធសភា ក៏មិនអាចមានសិទ្ធិបោះឆ្នោតបានដែរ។
លោក លី សុធារ៉ាយុត្តិ បានប្រាប់សារព័ត៌មាន The Cambodia Daily ថា ការទាមទារនេះ គឺជាសិទ្ធិរបស់ពួកគេ ប៉ុន្តែការទាមទារនេះគួរគោរពលក្ខន្តិកៈរបស់គណបក្សផង ពីព្រោះការដកប្រធាន ឬអគ្គលេខាធិការគណបក្ស ត្រូវឆ្លងកាត់ការធ្វើសមាជជាមុនសិន។
លោកបន្តថា ការចោទប្រកាន់រូបលោក និងលោក ទាវ វណ្ណុល ថាជាមេដឹកនាំផ្ដាច់ការ និងអសីលធម៌ គឺជាការចោទប្រកាន់មិនពិត។ លោកបន្តថា បាតុកម្មរបស់សមាជិកគណបក្សភ្លើងទៀន អាចមានការរៀបចំនៅពីក្រោយណាមួយ ដើម្បីរំខានដល់សកម្មភាពរបស់គណបក្សភ្លើងទៀន នៅមុនការបោះឆ្នោតអសកលនៅពេលខាងមុខនេះ។
អតីតមេដឹកនាំបក្សប្រឆាំងលោក សម រង្ស៊ី កាលពីថ្ងៃទី៧ ខែធ្នូ ឆ្នាំ២០២៣ អំពាវនាវឱ្យមន្ត្រីជាន់ខ្ពស់គណបក្សភ្លើងទៀន កុំប្រើមធ្យោបាយវាយប្រហារគ្នាទៅវិញទៅមក ឬបញ្ឈរតួនាទីនរណាម្នាក់តាមវិធានការផ្សេងៗ ដោយសារតែរឿងផ្ទាល់ខ្លួន បន្ទាប់ពីប្រធានគណបក្សភ្លើងទៀនសម្រេចបញ្ចប់តួនាទីមន្ត្រីប្រតិបត្តិខេត្តសៀមរាប របស់គណបក្សនេះកាលពីពេលថ្មីៗនេះ។
លោក សម រង្ស៊ី បានចេញលិខិតអំពាវនាវមួយនៅថ្ងៃទី៧ ខែធ្នូ ឆ្នាំ២០២៣ នេះ ដោយអំពាវនាវឱ្យពលរដ្ឋខ្មែរ និងគណបក្សនយោបាយដែលស្រឡាញ់ជាតិ និងជាអ្នកគាំទ្រលទ្ធិប្រជាធិបតេយ្យ សហការគ្នាជាធ្លុងមួយដើម្បីធានាភាពជោគជ័យនៃបុព្វហេតុដ៏ត្រឹមត្រូវក្នុងការជួយសង្គ្រោះលទ្ធិប្រជាធិបតេយ្យនៅកម្ពុជាឡើងវិញ។
លោក សម រង្ស៊ី ដាស់តឿនកុំឱ្យប្រើមធ្យោបាយវាយប្រហារគ្នាទៅវិញទៅមកដោយសារតែរឿងផ្ទាល់ខ្លួន ហើយនិងត្រូវចៀសវាងការចាត់ការវិធានការណាមួយដែលមានបំណងបញ្ឈប់តួនាទី និងការងាររបស់សកម្មជនណាម្នាក់ដែលមានទឹកចិត្តនៅតែស្មោះត្រង់ចំពោះប្រទេសជាតិ និងពលរដ្ឋ។ ជាងនេះទៀត លោក សម រង្ស៊ី សង្កត់ធ្ងន់ថា ការដកលោក សោម សូរិយា គឺជារឿងមិនត្រឹមត្រូវដាច់ខាត។
លោក សម រង្ស៊ី បញ្ជាក់ថា លោកជឿជាក់ថានឹងមានពេលមួយខាងមុខដែលអ្នកស្រឡាញ់ជាតិ អ្នកប្រជាធិបតេយ្យចេះចែកការងារគ្នាធ្វើ និងចេះបែងចែកតួនាទីចំពោះបុគ្គលម្នាក់ ដើម្បីសង្គ្រោះជាតិចេញពីរបបដឹកនាំដែលបំផ្លាញលទ្ធិប្រជាធិបតេយ្យសព្វថ្ងៃនេះឱ្យទាន់ពេលវេលា។
សមាជិកគណបក្សភ្លើងទៀននៅតាមមូលដ្ឋានដែលទៅចូលរួមជាមួយគណបក្សកម្លាំងជាតិ ត្រូវមេដឹកនាំគណបក្សភ្លើងទៀន បញ្ចប់តួនាទីពីសមាជិកភាពគណបក្ស ដែលក្នុងនោះពួកគេមានតំណែងជាជំទប់ទី១ ជំទប់ទី២ និងសមាជិកក្រុមប្រឹក្សាឃុំ-សង្កាត់នៅតាមមូលដ្ឋាននានា។
គណបក្សភ្លើងទៀនមិនមានសិទ្ធិចូលរួមបោះឆ្នោតព្រឹទ្ធសភានៅខែកុម្ភៈ ឆ្នាំ២០២៤ ទេ ដោយសារខ្វះឯកសារចុះបញ្ជីគណបក្សច្បាប់ដើម។ គណបក្សនេះមានអង្គបោះឆ្នោតជាង ២ពាន់នាក់ បានចូលរួមបោះឆ្នោតជ្រើសតាំងព្រឹទ្ធសភានីតិកាលទី៥ តាមរយៈគណបក្សឆន្ទៈខ្មែរ ដែលជាគណបក្សសម្ព័ន្ធ៕