មន្ត្រីសង្គមស៊ីវិលទទួលបន្ទុកសិទ្ធិមនុស្ស អះអាងថា ការបញ្ចេញមតិរបស់លោក នី ណាក់ មិនមានអ្វីធ្ងន់ធ្ងររហូតនាំឱ្យប៉ះពាល់ដល់សន្តិសុខជាតិដែលបង្កទៅជាភាពវឹកវរ ឬជាការញុះញង់ដូចការចោទប្រកាន់ឡើយ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៥ មករា ថា បើពិនិត្យលើទិដ្ឋភាពច្បាប់ សមត្ថកិច្ចត្រូវតែអនុវត្តតួនាទីដោយការឃាត់ខ្លួនជនណាម្នាក់ទៅតាមបណ្តឹងរបស់ភាគីណាមួយ ដោយផ្អែកលើភស្តុតាងពិតមែន ប៉ុន្តែសមត្ថកិច្ចក៏គួរតែពិនិត្យទៅលើភស្តុតាងនោះដែរ ថាតើវានឹងនាំឱ្យប៉ះពាល់ដល់សន្តិសុខជាតិ ឬក៏អត់ មុននឹងឃាត់ខ្លួនបុគ្គលដែលត្រូវគេប្តឹងនោះ។
លោក ស៊ឹង សែនករុណា អះអាងថា ការលើកឡើងរបស់លោក នី ណាក់ មិនមានពាក្យពេចន៍ណាមួយនាំឱ្យប៉ះពាល់ដល់សន្តិសុខជាតិទេ ដូច្នេះសមត្ថកិច្ចមិនគួរឃាត់ខ្លួនគាត់ឡើយ ព្រោះថាក្នុងសង្គមប្រជាធិបតេយ្យ គឺត្រូវការបើកលំហសេរីភាពបញ្ចេញមតិជាចាំបាច់។ ផ្ទុយទៅវិញ បើការលើកឡើងរបស់សកម្មជនសង្គមរូបនេះខុសពីការពិតនោះ លោក នី ណាក់ នឹងត្រូវបាត់បង់កិត្តិយសកេរ្តិ៍ឈ្មោះដោយខ្លួនឯង ដោយសារតែមហាជនអស់ទំនុកចិត្តលើរូបគាត់។
មន្ត្រីសង្គមស៊ីវិលរូបនេះបញ្ជាក់ថា ការចាប់ខ្លួនលោក នី ណាក់ ដោយគ្រាន់តែគាត់បានលើកឡើងទាក់ទិននឹងចំនួនក្រុមហ៊ុននេះ មិនដល់ថ្នាក់មហាជនជឿតាមសម្ដីរបស់គាត់នោះទេ។ ផ្ទុយទៅវិញ ការចាប់ខ្លួនគាត់ព្រោះតែការលើកឡើងបែបនេះ រឹតតែធ្វើឱ្យមានការរិះគន់លើរដ្ឋាភិបាលជុំវិញការរឹតត្បិតសេរីភាពនៃការបញ្ចេញមតិទៅវិញ ដែលនេះគេក៏អាចចាត់ទុកថាជាទម្រង់នៃការរឹតត្បិតសេរីភាពថ្មីមួយទៀតក្នុងរបាយការណ៍អ្នកឃ្លាំមើលសិទ្ធិមនុស្សក្នុងឆ្នាំថ្មីនេះដែរ ដូច្នេះសមត្ថកិច្ចកម្ពុជាគួរតែពិចារណាលើបញ្ហានេះ មុននឹងសម្រេចចោទប្រកាន់ថាគាត់មានទោសតាមការប្តឹងនោះ។
នៅថ្ងៃទី៥ ខែមករា ឆ្នាំ២០២៤ នេះ សមត្ថកិច្ចក្រសួងមហាផ្ទៃ បានចាប់ខ្លួនអ្នកជំនាញកសិកម្មលោក នី ណាក់ សាជាថ្មីដោយចោទពីបទបរិហារកេរ្តិ៍ និងញុះញង់ បន្ទាប់ពីសកម្មជនសង្គមរូបនេះសរសេរលើហ្វេសប៊ុកផ្ទាល់ខ្លួន រិះគន់ពីរបាយការណ៍ដែលក្រសួងការងារ ទើបនឹងចេញផ្សាយអំពីតួលេខរបស់ក្រុមហ៊ុនឯកជនដែលទើបបើកថ្មីនៅដើមឆ្នាំ២០២៤ នេះ។
អ្នកស្រី សុខ ស៊ីណែត ដែលត្រូវជាភរិយារបស់លោក នី ណាក់ អះអាងថា ប្តីរបស់អ្នកស្រីត្រូវបានសមត្ថកិច្ចនៃក្រសួងមហាផ្ទៃឃាត់ខ្លួនសាកសួរតាំងពីព្រឹកម៉ោង ៨ និង ៤០នាទី តាមបណ្តឹងរបស់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ហើយសមត្ថកិច្ចគ្រោងបញ្ជូនលោក នី ណាក់ ទៅតុលាការតែម្តងបន្ទាប់ពីសាកសួររួចរាល់។
មុនពេលសមត្ថកិច្ចចាប់ខ្លួន លោក នី ណាក់ បានសរសេរសារបង្ហោះលើហ្វេសប៊ុករបស់លោកថា សារព័ត៌មានដែលស្និទ្ធនឹងរដ្ឋាភិបាល គឺហ្វ្រេសញូវ (Fresh News) បានផ្សាយថា «ក្រុមហ៊ុនទើបបើកថ្មីនៅកម្ពុជាក្នុងឆ្នាំ២០២៤ មាន ១ម៉ឺនក្រុមហ៊ុន»។ លោកក៏បានសរសេរបែបឌឺដងទៀតថា «សង្ស័យតែគេរាប់តាំងពីក្រុមហ៊ុនលក់លៀសហាល ក្រុមហ៊ុនដើរសុំទាន និងក្រុមហ៊ុនលក់ថ្នាំញៀនដែរហើយមើលទៅ»។
លោកបន្ថែមថា «បើកច្រើន ប៉ុន្តែពេលបិទវិញ គេមិនរាប់ទេ»។
កន្លងមក លោក នី ណាក់ ត្រូវគេស្គាល់ថាជាសកម្មជនសង្គមមួយរូបដែលតែងធ្វើការរិះគន់លើការដឹកនាំមិនត្រឹមត្រូវរបស់រដ្ឋាភិបាល ហើយដោយសារតែបែបនេះ លោកក៏ធ្លាប់ត្រូវបានសមត្ថកិច្ចចាប់ដាក់ជាប់ពន្ធនាគារអស់រយៈពេល ១៨ខែម្តងរួចមកហើយដែរ ជុំវិញការលើកឡើងរបស់លោកទាក់ទិននឹងសត្វមាន់ពាក់ម៉ាស់ កាលពីចុងឆ្នាំ២០២០ កន្លងទៅ។
ជុំវិញបញ្ហានេះ លោក នី ណាក់ ត្រូវបានចោទប្រកាន់ពីបទ «ជេរប្រមាថជាសាធារណៈ និងញុះញង់ឱ្យមានការរើសអើង» តាមមាត្រា៣០៧ មាត្រា៤៩៤ និងមាត្រា៤៩៦ នៃក្រមព្រហ្មទណ្ឌ តាមបណ្តឹងរបស់អតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន។
ដោយសារតែការរិះគន់នេះ លោក នី ណាក់ ក៏ធ្លាប់ត្រូវជនមិនស្គាល់មុខប៉ុនប៉ងសម្លាប់កាលពីអំឡុងខែកញ្ញា ឆ្នាំ២០២៣ កន្លងទៅដែរ ដែលបានវាយរូបលោកឱ្យរងរបួសត្រង់ក្បាល ប៉ុន្តែរហូតមកដល់ពេលនេះ សមត្ថកិច្ចនៅមិនទាន់ចាប់ជនដៃដល់យកមកផ្ដន្ទាទោសតាមផ្លូវច្បាប់បាននៅឡើយទេ។ ផ្ទុយទៅវិញ នៅពេលដែលលោក នី ណាក់ រិះគន់ការដឹកនាំរបស់រដ្ឋាភិបាល ក៏ត្រូវសមត្ថកិច្ចចាប់ខ្លួនភ្លាមៗតែម្តង៕