មេដឹកនាំគណបក្សប្រជាជនកម្ពុជាដែលកងទ័ពវៀតណាមលើកបន្តុបលោក ហ៊ុន សែន លើកឡើងថា ភាពសប្បាយរីករាយរបស់ប្រជាជនកម្ពុជាសព្វថ្ងៃនេះ ផ្តើមចេញពីជ័យជម្នះ ៧មករា ១៩៧៩ ទាំងស្រុង ដែលជាសច្ចធម៌នៃប្រវត្តិសាស្ត្ររបស់ប្រទេសកម្ពុជាមិនអាចបដិសេធបាន។
លោក ហ៊ុន សែន លើកឡើងក្នុងពិធីខួប ៤៥ឆ្នាំនៃថ្ងៃជ័យជម្នះ «៧មករា» ដែលគណបក្សប្រជាជនកម្ពុជាចាត់ទុកជាថ្ងៃពិសេសរបស់ខ្លួនកាលពីថ្ងៃទី៧ ខែមករា ឆ្នាំ២០២៤ នេះថា ថ្ងៃទី៧ ខែមករា ឆ្នាំ២០២៤ នេះ ជាថ្ងៃគម្រប់ខួប ៤៥ឆ្នាំនៃទិវាជ័យជម្នះជាប្រវត្តិសាស្ត្ររបស់ប្រជាជនកម្ពុជាលើរបបប្រល័យពូជសាសន៍ ប៉ុល ពត ដែលធ្វើឱ្យប្រជាជាតិខ្មែរបានរស់រានមានជីវិតឡើងវិញទាន់ពេលវេលា រួចផុតពីទារុណកម្ម និងអំពើកាប់សម្លាប់ដ៏សាហាវយង់ឃ្នង។
លោក ហ៊ុន សែន អះអាងថា ថ្ងៃជ័យជម្នះ ៧មករា បានដណ្ដើមជូនពលរដ្ឋខ្មែរវិញនូវសិទ្ធិសេរីភាពគ្រប់យ៉ាងដែលត្រូវបាត់បង់ទាំងអស់ក្នុងរបប ប៉ុល ពត និងបានបញ្ចប់សករាជដ៏ខ្មៅងងឹតបំផុតរបស់កម្ពុជា ព្រមទាំងបើកឡើងនូវសករាជថ្មី គឺឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គមផងដែរ។
លោក ហ៊ុន សែន បញ្ជាក់ថា បន្ទាប់ពីជ័យជម្នះជាប្រវត្តិសាស្ត្រនេះ គណបក្សប្រជាជនកម្ពុជាបានដឹកនាំប្រទេសឆ្លងកាត់ឧបសគ្គ និងការលំបាករាប់ម៉ឺនសែនជំពូកប្រកបដោយជោគជ័យ ក្នុងបុព្វហេតុការពារការរស់ឡើងវិញរបស់ប្រជាជនខ្មែរ និងកសាងជាតិឡើងវិញពីគំនរផេះផង់ រហូតបានចេញផុតពីស្ថានភាពដែលវិនាសខ្ទេចខ្ទី ឈានមកដល់ដំណាក់កាលអភិវឌ្ឍន៍លើគ្រប់វិស័យក្រោមម្លប់នៃសន្តិភាពប្រកបដោយមោទនភាពជាទីបំផុត។
ទោះជាយ៉ាងណាក៏ដោយ អតីតមេដឹកនាំបក្សប្រឆាំងលោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី៧ ខែមករា ឆ្នាំ២០២៤ នេះថា វៀតណាមគឺជាអ្នកដុតឱ្យមានភ្លើងសង្គ្រាមនៅកម្ពុជា ហើយវៀតណាមក៏ដើរតួជាអ្នកជួយពន្លត់ភ្លើងសង្គ្រាមនេះដែរ ដើម្បីសម្រេចមហិច្ឆតានយោបាយឈ្លានពានរបស់ពួកគេ។
លោកបន្ថែមថា ថ្ងៃទី៧ ខែមករា ឆ្នាំ១៩៧៩ គឺជាថ្ងៃដែលខ្មែរបាត់បង់អធិបតេយ្យភាព បាត់បង់ដែនសមុទ្រ បាត់បង់កោះត្រល់ ហើយក៏ជាថ្ងៃដែលក្រុមមេដឹកនាំនៃរដ្ឋាភិបាលក្រុងភ្នំពេញ យកមកធ្វើជាជំនួញនយោបាយ ដើម្បីកេងចំណេញពីព្រឹត្តិការណ៍ប្រវត្តិសាស្ត្រដ៏ចម្រូងចម្រាសដែលពួកគេព្យាយាមបំភ្លៃការពិតរហូតមកដែរ។
លោក សម រង្ស៊ី លើកឡើងថា នៅមុនការធ្វើរដ្ឋប្រហាររបស់លោកសេនាប្រមុខ លន់ នល់ កម្ពុជាមានទំនោរកាន់តែខ្លាំងទៅរកប្លុកកុម្មុយនីស្ត ដោយការកាត់ផ្តាច់ទំនាក់ទំនងជាមួយសហរដ្ឋអាមេរិក និងបានអនុញ្ញាតឲ្យពួកវៀតកុងរបស់វៀតណាមខាងជើង ប្រើប្រាស់ទឹកដីកម្ពុជាជាឈ្នាន់នៃសង្គ្រាមរបស់ពួកគេនាពេលនោះ។
លោកបន្តថា ប្រសិនបើគ្មានការជួយជ្រោមជ្រែងពីប្លុកកុម្មុយនីស្តចិន និងវៀតណាម ទេ នោះក្រុមខ្មែរក្រហមក៏មិនអាចគ្រប់គ្រងអំណាចបានដែរ ដូច្នេះភ្លើងសង្គ្រាមនៅកម្ពុជាគឺមានវៀតណាម ជាអ្នកបញ្ជាពីក្រោយខ្នង ហើយការរំដោះកម្ពុជាចេញពីភ្លើងសង្គ្រាមនេះ ក៏មានវៀតណាមជាអ្នកជួយជ្រោមជ្រែងពីក្រោយខ្នង ក្រោមស្លាកគណបក្សប្រជាជនកម្ពុជា និងមេដឹកនាំដែលពួកគេបានលើកបន្តុបដែរ។
ចំណែកអនុប្រធានវេទិកាពលរដ្ឋលោក ម៉ែន ណាត លើកឡើងកាលពីពេលថ្មីៗនេះថា ការកំណត់យកថ្ងៃ ៧មករា ជាថ្ងៃបុណ្យជាតិ គឺជាការសម្រេចឯកតោភាគីរបស់គណបក្សប្រជាជនកម្ពុជា មិនមែនជាការចូលរួមសាទរទទួលស្គាល់ពីពលរដ្ឋខ្មែរទូទាំងប្រទេសនោះទេ ដែលទង្វើនេះមិនបានឆ្លុះបញ្ចាំងពីស្មារតីសាមគ្គីជាតិ និងឯកភាពជាតិពីខ្មែរគ្រប់ភាគីឡើយ ប៉ុន្តែគ្រាន់តែបង្ហាញពីការលើកតម្កើងនយោបាយឈ្លានពានរបស់វៀតណាម ដែលបំផ្លាញប្រទេសកម្ពុជាទៅវិញប៉ុណ្ណោះ។
លោក ម៉ែន ណាត លើកឡើងថា ថ្ងៃទី៧ ខែមករា ឆ្នាំ១៩៧៩ ជាថ្ងៃដែលប្រទេសវៀតណាមលើកកងទ័ពប្រមាណ ២០ម៉ឺននាក់ ចូលឈ្លានពានប្រទេសកម្ពុជា ដោយរំលោភលើច្បាប់អន្តរជាតិទាំងកម្រោល ដែលមិនអាចប្រកែកបានឡើយ ព្រោះថាសមាគមប្រជាជាតិអាស៊ាន និងអង្គការសហប្រជាជាតិ ក៏បានរួមគ្នាថ្កោលទោសការឈ្លានពានរបស់ប្រទេសវៀតណាម ចំពោះទង្វើនេះដែរ ខណៈរដ្ឋាភិបាលប្រទេសសិង្ហបុរី នៅតែបន្តរំឭកពីការឈ្លានពាននេះនៅឡើយរហូតដល់ពេលនេះ។
លោកបញ្ជាក់ថា ថ្ងៃទី៧ ខែមករា ឆ្នាំ១៩៧៩ ជាឱកាសល្អបំផុតដែលរដ្ឋការក្រុងហាណូយ សម្រេចផែនការរំលោភយកទឹកដីរបស់កម្ពុជា ទាំងព្រំដែនគោក និងព្រំដែនទឹក តាមសន្ធិសញ្ញាខុសច្បាប់នានាក្រោមកិច្ចព្រមព្រៀងយ៉ាងអាថ៌កំបាំងរវាងមេដឹកនាំវៀតណាម និងលោក ហ៊ុន សែន ក្នុងនាមជារដ្ឋមន្ត្រីការបរទេសរបស់កម្ពុជានៅពេលនោះ។
គណបក្សប្រជាជនកម្ពុជា ដែលមានឈ្មោះដើមថា បក្សប្រជាជនបដិវត្តន៍កម្ពុជា ត្រូវបានបង្កើតឡើងដោយលោក សឺន ង៉ុក មិញ ហៅអាចារ្យ មៀន កាលពីថ្ងៃទី២៨ ខែមិថុនា ឆ្នាំ១៩៥១ ដែលជាអតីតសមាជិកបក្សកុម្មុយនីស្តឥណ្ឌូចិន ដែលត្រូវបានបង្កើតឡើងដោយលោក ហូ ជី មិញ (Ho Chi Minh) តាំងពីឆ្នាំ១៩៣០។
នៅឆ្នាំ១៩៩១ បក្សប្រជាជនបដិវត្តន៍កម្ពុជា ក៏ត្រូវបានគេប្ដូរឈ្មោះទៅជា គណបក្សប្រជាជនកម្ពុជា និងត្រូវស្ថិតក្រោមការដឹកនាំរបស់លោក ហ៊ុន សែន ចាប់តាំងពីថ្ងៃទី២០ ខែមិថុនា ឆ្នាំ២០១៥ មក បន្ទាប់ពីមេដឹកនាំមុនៗរបស់បក្សនេះត្រូវបានចាប់ខ្លួន និងស្លាប់ដោយអាថ៌កំបាំងជាបន្តបន្ទាប់៕