 និងក្រុមអ្នកតស៊ូមតិកម្ពុជា ដែលហៅកាត់ថា CAT ទាមទារឱ្យតុលាការទម្លាក់ការចោទប្រកាន់ពីបទ «ក្បត់ជាតិ» លើអតីតមេដឹកនាំបក្សប្រឆាំងលោក កឹម សុខា រួមនឹងសកម្មជននយោបាយផ្សេងទៀតជាបន្ទាន់ និងឥតលក្ខខណ្ឌ។){kind=link}
អង្គការលើកលែងទោសអន្តរជាតិ (Amnesty International) និងក្រុមអ្នកតស៊ូមតិកម្ពុជា ដែលហៅកាត់ថា CAT ទាមទារឱ្យតុលាការទម្លាក់ការចោទប្រកាន់ពីបទ «ក្បត់ជាតិ» លើអតីតមេដឹកនាំបក្សប្រឆាំងលោក កឹម សុខា រួមនឹងសកម្មជននយោបាយផ្សេងទៀតជាបន្ទាន់ និងឥតលក្ខខណ្ឌ។
ក្រុមនេះអះអាងថា ការផ្ដន្ទាទោសលោក កឹម សុខា ឱ្យជាប់ពន្ធនាគាររយៈពេល ២៧ឆ្នាំ គឺគ្មានមូលដ្ឋានច្បាស់លាស់ ដោយមិនបានគោរពសិទ្ធិមនុស្ស និងដើរផ្ទុយពីនីតិរដ្ឋ។
មុនសវនាការរបស់លោក កឹម សុខា មួយថ្ងៃ អង្គការលើកលែងទោសអន្តរជាតិ (Amnesty International) ជំរុញឱ្យតុលាការដោះលែងលោក កឹម សុខា ជាបន្ទាន់ និងឥតលក្ខខណ្ឌ រួមទាំងត្រូវទម្លាក់រាល់ការចោទប្រកាន់ដែលគ្មានមូលដ្ឋានច្បាស់លាស់។ Amnesty International ក៏តម្រូវឱ្យរដ្ឋាភិបាលកម្ពុជា គោរព ការពារ និងលើកកម្ពស់សិទ្ធិមនុស្សក្នុងប្រទេសកម្ពុជាឱ្យបានពេញលេញ ក្នុងនោះរួមមាន សិទ្ធិក្នុងការបញ្ចេញមតិ សិទ្ធិក្នុងការជួបប្រជុំដោយសន្តិវិធី និងត្រូវបញ្ឈប់ការរឹតត្បិតសេរីភាពរបស់ពលរដ្ឋ។
ចំណែកនាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស (Human Right Watch) លោក Phil Robertson កន្លងមកបានសរសេរសារខ្លីមួយលើបណ្ដាញសង្គម Twitter ថា លោក កឹម សុខា គួររួចទោស ព្រោះការចោទប្រកាន់របស់រដ្ឋាភិបាលកម្ពុជាជារឿងនយោបាយ។
រីឯប្រធានក្រុមអ្នកតស៊ូមតិកម្ពុជា លោក ហុង លីម ចេញសេចក្តីថ្លែងការណ៍មួយនៅថ្ងៃទី២៩ មករា នេះ ដោយអំពាវនាវឱ្យសាលាឧទ្ធរណ៍ក្រុងភ្នំពេញ ឈរលើគោលការណ៍ឯករាជ្យ និងវិជ្ជាជីវៈ ជុំវិញដំណើរការសវនាការជំនុំជម្រះក្តីលើសំណុំរឿងប្រធានគណបក្សសង្គ្រោះជាតិ លោក កឹម សុខា នៅថ្ងៃអង្គារនេះ។
លោក ហុង លីម អះអាងថា មាត្រា១២៨ និងមាត្រា១២៩ នៃរដ្ឋធម្មនុញ្ញរបស់ប្រទេសកម្ពុជា បានផ្ដល់អំណាចដល់តុលាការដែលជាអំណាចឯករាជ្យ និងតម្រូវឱ្យតុលាការធានារក្សាការពារសិទ្ធិសេរីភាពរបស់ពលរដ្ឋ ព្រមទាំងជម្រះក្តី និងផ្តល់យុត្តិធម៌ដល់ពលរដ្ឋខ្មែរតាមនីតិវិធីច្បាប់ជាធរមាន។
ប្រធានក្រុមអ្នកតស៊ូមតិកម្ពុជារូបនេះបញ្ជាក់ថា ពលរដ្ឋខ្មែរត្រូវតែមានសិទ្ធិទទួលបានប្រព័ន្ធយុត្តិធម៌ឯករាជ្យ និងគួរតែអាចរស់នៅក្នុងសង្គមមួយប្រកបដោយយុត្តិធម៌ស្របតាមរដ្ឋធម្មនុញ្ញ ប៉ុន្តែលោក កឹម សុខា បែរជាត្រូវបានចាប់ខ្លួនដោយរបបលោក ហ៊ុន សែន កាលពីថ្ងៃទី៣ ខែកញ្ញា ឆ្នាំ២០១៧ ពីបទក្បត់ជាតិដែលគ្មានមូលដ្ឋានច្បាស់លាស់ទៅវិញ និងបានកាត់ទោសលោកឱ្យជាប់ឃុំក្នុងផ្ទះចំនួន ២៧ឆ្នាំថែមទៀត។
ការអះអាងនេះ ធ្វើឡើងដើម្បីជំរុញឱ្យសាលាឧទ្ធរណ៍ អនុវត្តនីតិវិធីច្បាប់ឱ្យបានត្រឹមត្រូវ ដើម្បីលើកកម្ពស់ប្រព័ន្ធយុត្តិធម៌កម្ពុជាឡើងវិញ ក្រោយគេរកឃើញថា ប្រព័ន្ធយុត្តិធម៌មួយនេះកំពុងស្ថិតក្រោមឥទ្ធិពលនយោបាយរបស់បក្សកាន់អំណាចសព្វថ្ងៃនេះ។
កាលពីដើមខែមករា ឆ្នាំ២០២៤ អ្នកនាំពាក្យសាលាឧទ្ធរណ៍ក្រុងភ្នំពេញ លោក ឃុន លាងម៉េង បានអះអាងថា សំណុំរឿងប្រធានអតីតគណបក្សសង្គ្រោះជាតិ លោក កឹម សុខា នឹងត្រូវលើកទៅជំនុំជម្រះនៅថ្ងៃទី៣០ ខែមករា ឆ្នាំ២០២៤ ប៉ុន្តែលោកបញ្ជាក់ថា គេនៅពុំទាន់ដឹងថា តើលោក កឹម សុខា នឹងមានមេធាវីការពារក្ដីឬក៏អត់នោះទេ។
ទាក់ទងនឹងសំណុំរឿងនេះ អតីតសហមេធាវីរបស់លោក កឹម សុខា គឺអ្នកស្រី ម៉េង សុភារី អះអាងថា សហមេធាវីពុំអាចជួបពិភាក្សាជាមួយលោក កឹម សុខា ដែលជាកូនក្ដីរបស់ខ្លួនបានទេចាប់តាំងពីសាលាដំបូងរាជធានីភ្នំពេញ បានចេញសាលក្រមផ្ដន្ទាទោសលោករួចមក ដោយសារតែសាលក្រមតុលាការបានហាមប្រាមមិនឲ្យលោក កឹម សុខា ជួបអ្នកណាទាំងអស់ ក្រៅពីក្រុមគ្រួសាររបស់លោក។
កាលពីថ្ងៃទី៣ ខែមីនា ឆ្នាំ២០២៣ កន្លងទៅ លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសាលាដំបូងរាជធានីភ្នំពេញផ្ដន្ទាទោសចំនួន ២៧ឆ្នាំ ដោយឃុំខ្លួននៅក្នុងផ្ទះ ក្រោមបទចោទក្បត់ជាតិតាមមាត្រា៤៣៩ និងមាត្រា៤៤៣ នៃក្រមព្រហ្មទណ្ឌ ព្រមទាំងដកហូតសិទ្ធិពលរដ្ឋ និងសិទ្ធិនយោបាយទាំងអស់។
ក្រោយការសម្រេចនេះ នៅថ្ងៃទី៣០ ខែមីនា ឆ្នាំ២០២៣ លោក កឹម សុខា ក៏បានដាក់ពាក្យប្តឹងទៅកាន់សាលាឧទ្ធរណ៍ជំទាស់ទៅនឹងការសម្រេចរបស់សាលាដំបូងរាជធានីភ្នំពេញផងដែរ ខណៈសាលាដំបូងរាជធានីភ្នំពេញ អះអាងថា ខ្លួនបានបញ្ជូនពាក្យបណ្តឹងជំទាស់របស់លោក កឹម សុខា ឡើងទៅសាលាឧទ្ធរណ៍រួចរាល់ហើយ ក្រោយពិនិត្យលើពាក្យបណ្តឹងនេះអស់រយៈពេលជាង ២សប្តាហ៍។
ទាក់ទិននឹងសំណុំរឿងលោក កឹម សុខា មេដឹកនាំខ្មែរកាងអំណាចផ្ដាច់មុខនៅកម្ពុជាលោក ហ៊ុន សែន ធ្លាប់លើកឡើងសាជាថ្មីថា មូលហេតុដែលប្រធានគណបក្សសង្គ្រោះជាតិលោក កឹម សុខា ជាប់គុកដោយគ្មានការលើកលែងទោស គឺដោយសារតែបរទេសដែលមានបំណងបំផ្លាញរដ្ឋាភិបាលរបស់លោក ស្រឡាញ់លោក កឹម សុខា ពេក។
លោក ហ៊ុន សែន ព្រមានថា បរទេសទាំងនោះធ្វើនយោបាយចាប់ដៃជាន់ជើងរបស់លោករហូត ព្រោះថាលោក កឹម សុខា ដែលកំពុងត្រូវបានរដ្ឋាភិបាលរបស់លោកចោទប្រកាន់ពីបទឃុបឃិតជាមួយរដ្ឋបរទេស ស្រាប់តែបរទេសទាំងនោះនាំគ្នាមកសួរសុខទុក្ខលោក កឹម សុខា និងនាំលោក កឹម សុខា ទៅទស្សនកិច្ចនៅស្ថានទូតរបស់ពួកគេទៅវិញ៕