មេធាវីរបស់គណបក្សប្រជាជនកម្ពុជា បានដាក់ពាក្យបណ្តឹងប្តឹងលោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) ទៅកាន់អយ្យការអមសាលាដំបូងរាជធានីភ្នំពេញ នៅរសៀលថ្ងៃទី៥ ខែកុម្ភៈ ឆ្នាំ២០២៤ នេះ ដោយស្នើសុំឱ្យធ្វើការពិនិត្យសម្រេចចោទប្រកាន់ និងផ្ដន្ទាទោសតាមនីតិវិធីជាធរមាន និងទាមទារឱ្យសងសំណងជំងឺចិត្តជូនគណបក្ស ២ពាន់លានរៀល (២ ០០០ ០០០ ០០០រៀល)។
ក្នុងពាក្យបណ្ដឹងរបស់មេធាវីរបស់គណបក្សប្រជាជនកម្ពុជា បានបញ្ជាក់ថា ការថ្លែងរបស់លោក ស៊ឹង សែនករុណា ស្តែងចេញនូវចេតនាបំភ្លៃផ្ទុយពីការពិតថា គណបក្សប្រជាជនកម្ពុជា «ប្រើប្រព័ន្ធតុលាការមកដោះស្រាយ និងតែងតែយកតុលាការមកធ្វើជារបាំងក្នុងការគាបសង្កត់ដៃគូនយោបាយប្រឆាំងរបស់ខ្លួន» ព្រមទាំងប្រើប្រាស់ «វប្បធម៌គំរាមកំហែងដៃគូនយោបាយរបស់ខ្លួន»។
ប្រភពដដែលលើកឡើងថា ពាក្យពេចន៍អះអាងបំផ្លើសទាំងនេះជាអំពើទុច្ចរិត ក្នុងចេតនាទម្លាក់កំហុសដោយអសុទ្ធចិត្ត និងមួលបង្កាច់នាំឱ្យប៉ះពាល់ដ៏ធ្ងន់ធ្ងរដល់កិត្តិយសរបស់គណបក្សប្រជាជនកម្ពុជា។
ជាងនេះទៀត ការប្រព្រឹត្តរបស់បុគ្គលរូបនេះជាអំពើបង្កចលាចល ញុះញង់បង្កើតឱ្យមានការស្អប់រើសអើងចំពោះគណបក្សប្រជាជនកម្ពុជា និងមានចេតនាធ្វើឱ្យប៉ះពាល់ដល់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ដែលនឹងប្រព្រឹត្តទៅក្នុងខែកុម្ភៈ ឆ្នាំ២០២៤ នាពេលដ៏ខ្លីខាងមុខនេះ។
ជុំវិញបញ្ហានេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានសរសេរលើគណនីហ្វេសប៊ុករបស់ខ្លួននៅថ្ងៃទី៥ កុម្ភៈ នេះថា បេសកកម្ម សកម្មភាព និងការផ្តល់បទសម្ភាសន៍របស់លោក គឺក្នុងបំណងពង្រឹងការគោរពសិទ្ធិមនុស្ស ការគោរពច្បាប់ យុត្តិធម៌សង្គម និងប្រជាធិបតេយ្យ ដោយមិនបម្រើបក្សនយោបាយណាមួយនោះទេ ហើយក៏គ្មានចេតនាណាមួយវាយប្រហារបក្សនយោបាយណាមួយឡើយ។
លោក ស៊ឹង សែនករុណា បញ្ជាក់ថា រាល់ការសម្រង់សម្ដីរបស់លោកទៅបន្ថែមបន្ថយបញ្ចេញបញ្ចូលដើម្បីវាយប្រហារចំៗលើឈ្មោះបក្សនយោបាយណាមួយនោះ វាមិនមែនជាចេតនា និងគោលបំណងរបស់លោកនោះទេ ហើយលោកក៏មិនទទួលស្គាល់នូវសម្ដីទាំងនោះដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៥ កុម្ភៈ នេះថា ប្រសិនបើអតីតនាយករដ្ឋមន្ត្រីកម្ពុជា លោក ហ៊ុន សែន ផ្តល់ឱកាសឱ្យអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ធ្វើការបកស្រាយចំពោះការលើកឡើងរបស់គាត់ នោះស្ថានភាពអាចនឹងមានភាពល្អប្រសើរជាងការព្រមានប្តឹងផ្តល់គ្នា ហើយការរង់ចាំការបកស្រាយរបស់គាត់ ក៏មិនយឺតពេលដែរ ដើម្បីចៀសវាងនូវការសម្រេចចិត្តខុស។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះ សំណូមពរឱ្យមេដឹកនាំបក្សកាន់អំណាចលោក ហ៊ុន សែន ពិចារណាឡើងវិញចំពោះការព្រមានប្តឹងផ្តល់នេះ ព្រោះថា ជួនកាល ការប្តឹងផ្តល់ខ្លះបែរនាំឱ្យប៉ះពាល់ដល់គុណធម៌ក្នុងនាមជាមេដឹកនាំរបស់គាត់ទៅវិញប៉ុណ្ណោះ ស្របពេលដែលសិទ្ធិសេរីភាពបញ្ចេញមតិក៏ត្រូវបានអនុវត្តជាចម្បងក្នុងប្រទេសដែលប្រកាន់របបប្រជាធិបតេយ្យដែរនោះ។
កាលពីថ្ងៃទី៤ ខែកុម្ភៈ ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន សរសេរលើទំព័រហ្វេសប៊ុករបស់ខ្លួនថា លោកនឹងស្នើឱ្យមេធាវីរបស់គណបក្សប្រជាជនកម្ពុជាសិក្សាពីផ្លូវច្បាប់ ដើម្បីប្តឹងលោក ស៊ឹង សែនករុណា ជុំវិញការបកស្រាយរបស់លោកទាក់ទិននឹងបណ្តឹងរវាងគណបក្សប្រជាជនកម្ពុជា និងអនុប្រធានគណបក្សភ្លើងទៀន លោក សុន ឆ័យ។
លោក ហ៊ុន សែន បញ្ជាក់ថា គណបក្សប្រជាជនកម្ពុជាមិនផ្តល់ឱកាសសម្រាប់មនុស្សណាក៏ដោយដែលប្រមាថមើលងាយគណបក្សនេះតទៅទៀតទេ។ លោកបន្ថែមថា ក្នុងនាមលោកជាមេដឹកនាំគណបក្ស ត្រូវតែរកយុត្តិធម៌សម្រាប់គណបក្សរបស់ខ្លួនតាមផ្លូវតុលាការជាកំហិត។
ការព្រមានប្តឹងនេះ ធ្វើឡើងបន្ទាប់ពីមានការបកស្រាយជុំវិញការប្តឹងផ្តល់រវាងគណបក្សប្រជាជនកម្ពុជា និងអនុប្រធានបក្សភ្លើងទៀន លោក សុន ឆ័យ ពីបទ «បរិហារកេរ្តិ៍» ដែលតុលាការតម្រូវឱ្យសងជំងឺចិត្តដល់គណបក្សកាន់អំណាច ១លានដុល្លារអាមេរិក ក្រោយសាលាឧទ្ធរណ៍សម្រេចឱ្យលោក សុន ឆ័យ ចាញ់ក្តីបក្សកាន់អំណាចកាលពីពេលកន្លងទៅនេះ។
ជុំវិញបញ្ហានេះដែរ អតីតនាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានសរសេរនៅលើហ្វេសប៊ុករបស់ខ្លួនថា ជីវិតសកម្មជនតែប៉ុណ្ណឹង បើស្ងាត់ពេកគេថាខ្លាច បើនិយាយច្រើនពេកទោះបីប្រកាន់ជំហរកណ្តាលយ៉ាងណា គង់នឹងប៉ះពាល់គេ គេមិនសប្បាយចិត្ត និងអាចប្រឈមការគំរាមកំហែងច្រើនរូបភាព ទាំងផ្លូវច្បាប់ តុលាការ និងតាមផ្លូវដទៃទៀត។
ប្រភពដដែលបានសរសេរថា សកម្មជនអ្នកការពារសិទ្ធិមនុស្សតួយ៉ាងដូចជាលោក ស៊ឹង សែនករុណា តែងតែប្រកាន់ខ្ជាប់វិជ្ជាជីវៈ និងបំពេញបេសកកម្មការងាររបស់ខ្លួនដោយឥតរួញរា និងស្ទើរគ្រប់ពេល ចំណាយពេលវេលានៅមូលដ្ឋាន សង្កេតការណ៍គ្រប់ករណី និងចូលរួមយ៉ាងសកម្មជាមួយសហគមន៍នានា។
អ្នកស្រីសង្ឃឹមថា តុលាការនឹងឈរលើមូលដ្ឋានយុត្តិធម៌លើករណីលោក ស៊ឹង សែនករុណា និងអំពាវនាវឱ្យមានការយោគយល់ ធានា និងការពារដល់ការបំពេញតួនាទីរបស់តួអង្គសង្គមស៊ីវិលដែលមានទស្សនវិស័យចូលរួមធានាលើកកម្ពស់សិទ្ធិសេរីភាពមូលដ្ឋាន ដែលប្រទេសកម្ពុជាបានទទួលស្គាល់៕