នៅថ្ងៃទី២១ មីនា គណបក្សកុម្មុយនីស្តវៀតណាម បានប្រកាសឱ្យដឹងថា ប្រធានាធិបតីវៀតណាម លោក Vo Van Thuong អាយុ ៥៣ឆ្នាំ បានចុះចេញពីតំណែងហើយ ខណៈប្រធានរដ្ឋរូបនេះទើបចូលកាន់តំណែងបានតែមួយឆ្នាំប៉ុណ្ណោះ។
យោងតាមទីភ្នាក់ងារព័ត៌មានយៀកណាម អ្នកស្រី វ៉ ធីអាញ់ ស្វ័ន (Vo Thi Anh Xuan) អាយុ ៥៤ឆ្នាំដែលជាអនុប្រធាន នឹងឡើងកាន់តំណែងជាប្រធានរដ្ឋស្តីទី ទម្រាំសភាប្រជាជនបើកកិច្ចប្រជុំរើសប្រធានរដ្ឋថ្មី។
នៅក្នុងពេលនេះ ប្រទេសវៀតណាមកំពុងធ្វើយុទ្ធនាការបោសសម្អាតអំពើពុករលួយដោយមានមន្ត្រីច្រើនរូបត្រូវបានដកហូតតំណែង ហើយមន្ត្រីជាន់ខ្ពស់ច្រើនរូបទៀតក្លាយជាជនជាប់ចោទ ប៉ុន្តែសម្រាប់លោកប្រធានាធិបតីវៀតណាម នេះ គឺលោកសុំចុះចេញពីតំណែងដោយខ្លួនឯង។
សភាប្រជាជនយៀកណាម បានបោះឆ្នោតទទួលយកសំណើសុំលាលែងពីតំណែងប្រធានាធិបតី។
ទោះជាយ៉ាងណាក៏ដោយ គណបក្សកុម្មុយនីស្តវៀតណាម បានចេញសេចក្ដីប្រកាសនេះដោយប្រើពាក្យពេចន៍ថា ការរំលោភបំពានមាគ៌ាបក្សដោយលោក Vo Van Thuong ជាការបន្សល់ឱ្យមាននូវស្នាមអាក្រក់ដល់កេរ្តិ៍ឈ្មោះបក្សកុម្មុយនីស្ត។
ក្នុងកិច្ចប្រជុំនៃការិយាល័យគោលនយោបាយនៃគណៈកម្មាធិការមជ្ឈិមបក្ស បក្សពលករយៀកណាម អគ្គលេខាធិការបក្ស លោក Nguyen Phu Trong បានរំឭកកម្មាភិបាលគ្រប់ជាន់ថ្នាក់ ឲ្យគិតប្រយោជន៍ជាតិមាតុភូមិជាធំ។
ការចុះចេញពីតំណែងបុរសរដ្ឋរូបនេះ កើតឡើងក្រោយពីប៉ុន្មានសប្ដាហ៍បន្ទាប់ពីមានពាក្យចចាមអារ៉ាមថា លោកមុខតែនឹងត្រូវបណ្ដេញចេញពីតំណែង បើសិនជាមិនចុះចេញដោយខ្លួនឯង ព្រោះលោកទទួលសញ្ញាព្រមានក្នុងពេលប្រជុំវិសាមញ្ញនៃសភាបក្ស ហើយប៉ូលិសវៀតណាម ក៏បានតាមចាប់ខ្លួនអតីតអភិបាលខេត្ត Quang Ngai និងជាប្រធានបក្សកុម្មុយនីស្តខេត្តនេះដែលជាប់ឈ្មោះថា លោកប្រព្រឹត្តអំពើពុករលួយ ហើយអាចជាប់ពាក់ព័ន្ធនឹងលោក Vo Van Thuong ផងដែរ។
ចំពោះលោកប្រធានាធិបតីវៀតណាម Thuong ដែលមានវ័យ ៥៣ឆ្នាំ បានក្លាយជាប្រធានាធិបតីនៅក្នុងខែមីនា ឆ្នាំ២០២៣ ក្រោយរយៈពេលពីរខែបន្ទាប់ពីអតីតប្រធានាធិបតីវៀតណាម Nguyen Xuan Phuc ត្រូវបក្សបង្ខំឲ្យចុះចេញពីតំណែងក្រោយពីករណីរឿងអាស្រូវពុករលួយអំឡុងពេលរីករាលដាលជំងឺកូវីដ-១៩។
លោក Thuong គឺជាប្រធានាធិបតីក្មេងបំផុត គឺដែលឡើងកាន់តំណែងកំពូលនេះភ្លាមៗក្នុងកាលៈទេសៈប្រទេសទើបផុតពីសង្គ្រាមត្រជាក់ឆ្នាំ១៩៧៥។ នៅប្រទេសវៀតណាម ប្រធានាធិបតីជាបុរសរដ្ឋលំដាប់ទីបីផ្នែកនយោបាយ ដោយបុរសរដ្ឋទី១ គឺអគ្គលេខាធិការបក្ស ហើយបុរសរដ្ឋទី២ គឺនាយករដ្ឋមន្ត្រី។
អគ្គលេខាធិការបក្សបច្ចុប្បន្នរបស់ប្រទេសវៀតណាម គឺលោក Nguyen Phu Trong ដែលចូលកាន់តំណែងតាំងពីឆ្នាំ២០១១។ ឥឡូវនេះ លោក Nguyen Phu Trong មានវ័យ ៧៩ឆ្នាំទៅហើយ។ លោក Nguyen Phu Trong ក៏គ្រោងនឹងចុះពីតំណែងបក្សនាពេលដ៏ខ្លីខាងមុខនេះដែរ។
លោក Thuong ធ្លាប់ត្រូវគេមើលឃើញជា បុគ្គលមានទំនាក់ទំនងជិតស្និទ្ធជាមួយអគ្គលេខាធិការបក្សកុម្មុយនីស្តវៀតណាម លោក Nguyen Phu Trong ដែលជាបុគ្គលមានអំណាចធំជាងគេបង្អស់នៅក្នុងប្រទេសវៀតណាម និងជាស្ថាបនិកយុទ្ធនាការបោសសម្អាតអំពើពុករលួយ ដែលត្រូវបានពង្រឹងយ៉ាងខ្លាំងអំឡុងពេលប៉ុន្មានឆ្នាំចុងក្រោយនេះ។
សភាវៀតណាម នឹងប្រកាសអំពីការជ្រើសតាំងប្រធានាធិបតីថ្មីនៅពេលដែលខ្លួនបើកសម័យប្រជុំពេញអង្គជាទូទៅនាខែឧសភា ខាងមុខ ឬក៏ឆាប់ជាងនេះ ប្រសិនបើមានការបើកសម័យប្រជុំវិសាមញ្ញ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន AP នៅថ្ងៃទី២១ មីនា។
គួររំឭកផងដែរថា ករណីប្រធានាធិបតីវៀតណាម ចុះចេញពីតំណែងនេះ បានធ្វើឱ្យប្រទេសវៀតណាម ក្នុងរយៈពេលតែពីរឆ្នាំប៉ុណ្ណោះមានប្រធានាធិបតីដល់ទៅពីររូបសម្រេចលាលែងពីតំណែងកំពូលនៃប្រទេសនេះ។
នៅប្រទេសយៀកណាម ក៏មានរឿងក្រុមហ៊ុនរកស៊ីបោកប្រាស់របៀបនៅប្រទេសកម្ពុជាដែរ។ កាលពីថ្ងៃពុធ ទី២០ ខែមីនា កាសែត Financial Times រាយការណ៍ថា អាជ្ញាធរយៀកណាម បានចាប់ខ្លួនអ្នកស្រីថៅកែក្រុមហ៊ុនអភិវឌ្ឍន៍អចលនទ្រព្យ ទ្រឿង មីឡាន (Truong My Lan) អាយុ ៦១ឆ្នាំ ដែលលួចយកប្រាក់ពីធនាគារ Saigon Joint Stock Commercial Bank (SCB) ចំនួន ១២ពាន់លានដុល្លារ ក្រោយពីបោកប្រាស់អតិថិជនថាដាក់ទុនទទួលការប្រាក់ខ្ពស់ ប៉ុន្តែនាំបក្ខពួក បងប្អូន បង្កើតលេខគណនីខ្មោច ឲ្យបើកលុយយកទៅចែកបក្ខពួកបើករបររកស៊ី ហើយសូកប៉ាន់កម្មាភិបាលគ្រប់គ្រងវិស័យហិរញ្ញវត្ថុ។ ធនាគារ SCB ក៏មានសាខានៅប្រទេសកម្ពុជា ដែរ។
ហេតុការណ៍ទាំងអស់នេះ ធ្វើឱ្យអ្នកវិភាគមួយចំនួនព្រួយបារម្ភពីអស្ថិរភាពនយោបាយក្នុងប្រទេស ដែលកំពុងស្ថិតនៅក្នុងមុខនាទីសំខាន់នៃការប្រទាញប្រទង់រវាងមហាអំណាចសហរដ្ឋអាមេរិក និងចិន ក្នុងស្ថានភាពដែលប្រទេសនេះជាប្រទេសកម្មន្ដសាល។
អ្នកសង្កេតការណ៍មើលឃើញថា នៅតំបន់អាស៊ីអាគ្នេយ៍ ប្រទេសដែលប្រកាន់ប្រព័ន្ធដឹកនាំបែបកុម្មុយនីស្តមានពីរប្រទេស គឺប្រទេសវៀតណាម និងប្រទេសលាវ។ ប្រទេសទាំងពីរនេះមិនមានការបោះឆ្នោតជ្រើសរើសមេដឹកនាំតាមរយៈសន្លឹកឆ្នោតរបស់ប្រជាជននោះទេ ប៉ុន្តែការលាលែងពីតំណែងនៃប្រធានាធិបតីវៀតណាម ពីររូបអំឡុងពីរឆ្នាំនេះ កំពុងធ្វើឱ្យមានការចាប់អារម្មណ៍អំពីប្រទេសសង្គមនិយមវៀតណាមមួយនេះ ដែលមេដឹកនាំមិនអាចរកមធ្យោបាយដើម្បីក្រាញអំណាចបាននោះទេ។
អំណាចស្ថិតនៅក្នុងកណ្ដាប់ដៃបក្ស និងអគ្គលេខាធិការបក្ស។ ប្រទេសក្នុងតំបន់អាស៊ីអាគ្នេយ៍មួយចំនួន ទោះជាថាប្រកាន់របបប្រជាធិបតេយ្យក៏ដោយ តែមេដឹកនាំប្រទេសនោះកាន់អំណាចណែនក្នុងដៃ គឺច្បាមយកអំណាចក្តោបក្តាប់គ្រប់ស្ថាប័នទាំងអស់ ទាំងស្ថាប័នកងទ័ព ស្ថាប័នតុលាការ រហូតដល់មានឥទ្ធិពលលើស្ថាប័នបោះឆ្នោត និងសភា ហើយផ្ទេរអំណាចទៅឲ្យកូនស្នងទៀតផង៕