អ្នកវិភាគឯករាជ្យលោកបណ្ឌិតឡៅ ម៉ុងហៃអះអាងថា រដ្ឋាភិបាលលោកហ៊ុន សែនហាក់មានភាពមិនទុកចិត្តខ្លួនឯង ហើយនៅតែមានការព្រួយបារម្ភ និងភ័យខ្លាចចំពោះការអំពាវនាវរបស់លោកសម រង្ស៊ី ប្រធានស្តីទីគណបក្សសង្គ្រោះជាតិដែលតែងជំរុញឲ្យក្រុមយោធាបះបោរប្រឆាំងលោកហ៊ុន សែននោះ។
ការអះអាងរបស់លោកបណ្ឌិតឡៅ ម៉ុងហៃដែលជាអ្នកឃ្លាំមើលសង្គមជើងចាស់រូបនេះធ្វើឡើងក្រោយពីក្រសួងការពារជាតិកាលពីម្សិលមិញ បានអំពាវនាវទៅ«ពលរដ្ឋត្រូវមានទំនុកចិត្តលើកងយោធពលខេមរភូមិន្ទ កុំចាញ់ឧបាយកល ក្រុមទុច្ចរិត»ដើម្បីរួមគ្នាការពាររដ្ឋាភិបាល។ សេចក្តីប្រកាសព័ត៌មានរបស់ក្រសួងការពារជាតិឲ្យដឹងថាយ៉ាងហោចណាស់មានក្រុមជនទុច្ចរិតមួយចំនួនបានបង្កើតFacebook ក្លែងក្លាយបន្លំយករូបនាយទាហានទៅវាយប្រហាររដ្ឋាភិបាលដោយខុសច្បាប់។
ការអំពាវនាវរបស់ក្រសួងការពារជាតិធ្វើឡើងមួយថ្ងៃក្រោយពេល លោកសមរង្ស៊ីបានបង្ហោះវីដេអូឃ្លីបមួយនៅលើទំព័រហ្វេសប៊ុករបស់លោកដែលបង្ហាញអំពីរូបភាពពលរដ្ឋនិងកងទ័ពនៅប្រទេសអាល់សេរីនាំគ្នាធ្វើបាតុកម្មទម្លាក់មេដឹកនាំរបស់ខ្លួនបានសម្រេច និងអំពាវទៅពលរដ្ឋខ្មែរឲ្យយកគំរូនេះ។
លោកបណ្ឌិតឡៅ ម៉ុងហៃអះអាងថា រដ្ឋាភិបាលលោកហ៊ុន សែន គួរតែគោរពពាក្យសម្តីរបស់ខ្លួនដែលតែងប្រកាសថា ឈប់ឆ្លើយឆ្លងជាមួយលោកសម រង្ស៊ីហើយថា រដ្ឋាភិបាលបច្ចុប្បន្នហាក់មិនទុកចិត្តខ្លួនឯងក្នុងការដឹកនាំប្រទេស ជាពិសេសមិនទុកចិត្តលើកងទ័ពរបស់ ខ្លួន។
លោកបន្តថា ការអំពាវនាវរបស់លោកសម រង្ស៊ីអាចនៅតែមានឥទ្ធិពលទៅលើពលរដ្ឋ និងកងទ័ពរបស់លោកហ៊ុន សែនហេតុដូច្នេះហើយបានជាលោកហ៊ុន សែនហាក់មានភាពរសើបចំពោះការអំពាវនាវរបស់លោកសម រង្ស៊ីជំរុញឲ្យកងទ័ពបះបោរប្រឆាំងនឹងរដ្ឋាភិបាលនោះ៕