អ្នកនាំពាក្យរបបក្រុងភ្នំពេញបានលើកឡើងថា លទ្ធភាពភាពប្រកួតប្រជែងសេដ្ឋកិច្ចកម្ពុជាលើទីផ្សារអន្តរជាតិនឹងធ្លាក់ចុះបន្ទាប់ពីអន្តរជាតិដាក់សម្ពាធសេដ្ឋកិច្ចមកលើកម្ពុជា។
ថ្លែងក្នុងវេទិកានៃកិច្ចពិភាក្សាតុមូល ស្តីពីស្ថានភាពនយោបាយចុងក្រោយរបស់គណបក្សសង្រ្គោះជាតិកាលពីព្រឹកមិញនេះ អ្នកនាំពាក្យរបបក្រុងភ្នំពេញគឺលោកផៃ ស៊ីផានបានលើកឡើងថា កម្ពុជាមិនបានបាត់បង់សេដ្ឋកិច្ចទីផ្សារនៅលើឆាកអន្តរជាតិនោះទេ ពីព្រោះកម្ពុជានៅតែមានលទ្ធភាពបង់ពន្ធនាំទំនិញរបស់ខ្លួនចេញទៅក្រៅប្រទេស។
លោកផៃ ស៊ីផានបានហៅក្រុមបក្សប្រឆាំងថា មិនត្រឹមតែជាក្រុមឧទ្ទាមខុសច្បាប់ប៉ុណ្ណោះទេ ប៉ុន្តែជាក្រុមភារវកម្មទៀតផង។ លោកបន្តថា ក្រុមនេះបានរៀបចំផែនការឱ្យបរទេសដាក់ទណ្ឌកម្មសេដ្ឋកិច្ចមកលើកម្ពុជាដោយសារតែប្រយោជន៍ផ្ទាល់ខ្លួន។
លោកអំពាវនាវកុំឱ្យមានការតក់ស្លុតចំពោះយុទ្ធសាស្ត្រដាក់ទណ្ឌកម្មសេដ្ឋកិច្ចមកលើកម្ពុជា ដោយអះអាងថា របបលោកហ៊ុន សែនបានគិតគូរដោះស្រាយ និងចាត់វិធានការពង្រឹងឯករាជ្យភាពរបស់ខ្លួនជាបន្តបន្ទាប់។
ការលើកឡើងនេះធ្វើឡើងក្រោយពេលលោកសមរង្ស៊ី អតីតប្រធានគណបក្សសង្រ្គោះជាតិដែលកំពុងនិរទេសខ្លួននៅក្រៅប្រទេស បានគាំទ្រឲ្យអន្តរជាតិ ដកហូតប្រព័ន្ធអនុគ្រោះពន្ធពីកម្ពុជា។
លោកសម រង្ស៊ីបញ្ជាក់ថា វិធានការដកហូតប្រព័ន្ធអនុគ្រោះពន្ធEBA គឺជាវិធានការត្រឹមត្រូវនិងសមស្រប ដោយថា ជាសម្ពាធសេដ្ឋកិច្ចដាក់ទៅលើរដ្ឋាភិបាលក្រុងភ្នំពេញដែលលោកហៅថា ជារបបផ្តាច់ការ។
អតីតមេបក្សប្រឆាំងរូបនេះបាននិយាយជំនួសឲ្យពលរដ្ឋខ្មែរថា ពលរដ្ឋអាចទ្រាំលំបាកបន្តិចឬទ្រាំរស់ក្នុងរយៈពេលខ្លីដែលបណ្តាល មកពីការដកហូតប្រព័ន្ធអនុគ្រោះពន្ធពីសហភាពអឺរ៉ុប ប៉ុន្តែកម្ពុជានឹងទទួលបានពន្លឺដ៏ភ្លឺស្វាង ស្គាល់នូវលទ្ធិប្រជាធិបតេយ្យពិតប្រាកដ និងស្គាល់នូវអភិបាលកិច្ចល្អប្រសើរមួយ ហើយពលរដ្ឋនឹងមានជីវភាពធូរធា ចៀសឆ្ងាយពីរបបពុករលួយជាប្រព័ន្ធ និងបំផ្លិចបំផ្លាញជាតិដែលធ្វើឱ្យពលរដ្ឋខ្មែរឈឺចាប់ក្រោមការដឹកនាំរបស់ លោកហ៊ុនសែន។
កាលពីថ្ងៃទី៩ខែមករា ឆ្នាំ២០១៩ សមាជិកព្រឹទ្ធសភាអាមេរិកចំនួន២រូបបានស្នើទៅរដ្ឋបាលលោកប្រធានាធិបតីដូណាល់ ត្រាំ ឲ្យសើរើច្បាប់ពាណិជ្ជកម្ម ឬដកហូតប្រព័ន្ធអនុគ្រោះពាណិជ្ជកម្មទូទៅGSPជាមួយកម្ពុជា។
ការពិនិត្យលទ្ធភាពដកហូតប្រព័ន្ធអនុគ្រោះពន្ធទូទៅពីកម្ពុជានេះ ធ្វើឡើងស្របពេលដែលសហភាពអឺរ៉ុប កំពុងដំណើរការដកហូតប្រព័ន្ធអនុគ្រោះពន្ធ ឬ EBAចេញពីកម្ពុជាផងដែរ។ ក្រុមអ្នកជំនាញខាងសេដ្ឋកិច្ចនិយាយថា ប្រសិនបើមានការដកហូតប្រព័ន្ធអនុគ្រោះពន្ធទាំងពីរនេះមែននោះ នោះកម្ពុជានឹងខាតបង់ចំណូលនៃថវិកាជាតិជាង១ពាន់លានដុល្លារក្នុងមួយឆ្នាំៗ៕