កាលពីព្រឹកថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានទទួលការស្វាគមន៍ខុសពីការរំពឹងទុកពីសំណាក់កម្មករកម្មការិនីរោងចក្រកាត់ដេរដែលកំពុងធ្វើកូដកម្មរាប់ពាន់នាក់ ខណៈក្បួនរថយន្តរបស់លោកធ្វើដំណើរតាមបណ្ដោយមហាវិថីសហព័ន្ធរុស្ស៊ី ឆ្ពោះទៅអាកាសយានដ្ឋានអន្តរជាតិភ្នំពេញសម្រាប់ដំណើរទស្សនកិច្ចរយៈពេលបីថ្ងៃនៅប្រទេសវៀតណាមដោយកម្មករកម្មការិនីពី៥.០០០ទៅ៦.០០០នាក់បានលើកបដាទាមទារប្រាក់ខែ១៦០ដុល្លារក្នុងមួយខែ និងបានស្រែកព្រមគ្នាថា “ ហ៊ុន សែន អើយចុះចេញទៅ!” ពេលរថយន្តរបស់លោកដែលអមដោយក្បួនរថយន្តរបស់មន្ត្រីរដ្ឋាភិបាលជាន់ខ្ពស់បើកកាត់ពួកគេ។
នគរបាលនិងសមាជិកកងអង្គរក្សផ្ទាល់របស់នាយករដ្ឋមន្ត្រី ដែលធម្មតាតែងតែបិទផ្លូវក្នុងរាជធានីឲ្យក្បួនរថយន្តរបស់លោក ហ៊ុន សែន ឆ្លងកាត់នោះ មើលទៅគឺមិនអាចធ្វើឲ្យក្រុមកម្មករកម្មការិនីទាំងនេះតវ៉ានៅកន្លែងផ្សេងផុតពីភ្នែកពីត្រចៀករបស់លោក ហ៊ុន សែន បានទេ។
លោក រ៉ុង ឈុន ប្រធានសហភាពសហជីពកម្ពុជា ដែលបានដើរក្បួនជាមួយកម្មករកម្មការិនីដែរនោះ បានឲ្យដឹងថា ៨៥ភាគរយនៃកម្មករកម្មការិនី ដែលបានស្វាគមន៍លោកនាយករដ្ឋមន្ត្រីនៅមហាវិថីសហព័ន្ធរុស្ស៊ីនេះគឺជាអ្នកដែលធ្វើកូដកម្មនៅរោងចក្រជាង២០នៅក្នុងតំបន់ចោមចៅនៅក្នុងរាជធានីភ្នំពេញហើយបានធ្វើដំណើរទៅចូលរួមក្នុងការតវ៉ារបស់គណបក្សប្រឆាំងនៅទីលានប្រជាធិបតេយ្យ។
លោក រ៉ុង ឈុន បានមានប្រសាសន៍ថា “កម្មករកម្មការិនីហែក្បួនពីចោមចៅក្នុងបំណងតែមួយទេ គឺទាមទារឲ្យមានការដំឡើងប្រាក់ខែ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានឲ្យដឹងថា លោកមិនបានអមដំណើរលោកនាយករដ្ឋមន្ត្រី ហ៊ុន សែន ទៅអាកាសយានដ្ឋានទេ ដូច្នេះគឺមិនបានដឹងពីការស្វាគមន៍ខុសពីការរំពឹងទុកនៅតាមផ្លូវឆ្ពោះទៅអាកាសយានដ្ឋានឡើយ។
លោក ផៃ ស៊ីផាន ក៏បានលើកឡើងផងដែរថា សម្រែកស្វាគមន៍លោកនាយករដ្ឋមន្ត្រីរូបនេះ គឺគ្មានប្រយោជន៍ទេ។
លោកបានមានប្រសាសន៍ថា “ ការស្រែករបស់ពួកគាត់ជារឿងរបស់ពួកគាត់”។ ប្រជាពលរដ្ឋបានសម្រេចចិត្តរួចហើយ [ក្នុងការជ្រើសរើសលោក ហ៊ុន សែន ជានាយករដ្ឋមន្ត្រី] ក្រោយការបោះឆ្នោតខែកក្កដា”។
លោក ស្រី ថាមរ៉ុង ជំនួយការផ្ទាល់របស់លោកនាយករដ្ឋមន្ត្រី បានឲ្យដឹងថា លោក ហ៊ុន សែន ដែលអមដំណើរដោយលោកស្រី ប៊ុន រ៉ានី លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ខកិច្ច និងហិរញ្ញវត្ថុ លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មនិងលោក ហោ ណាំហុង រដ្ឋមន្ត្រីក្រសួងការបរទេស ក្នុងដំណើរទស្សនកិច្ចទៅទីក្រុងហូជីមិញនេះ គ្រោងជួបជាមួយនាយករដ្ឋមន្ត្រីវៀតណាម លោក ង្វៀន តាន់ឌុង (Nguyen Tan Dung) នៅរសៀលថ្ងៃម្សិលមិញនេះ។
លោក ស្រី ថាមរ៉ុង បានឲ្យដឹងថា កិច្ចព្រមព្រៀងចំនួនប្រាំបួនរវាងរដ្ឋាភិបាលទាំងពីរនឹងត្រូវបានចុះហត្ថលេខាអំឡុងដំណើរទស្សនកិច្ចផ្លូវការនេះ។ លោក ហ៊ុន សែន ក៏នឹងជួបអតីតយោធាស្ម័គ្រចិត្តវៀតណាមរាប់ទាំងអតីតប្រធានាធិបតី ឡេ ដឹក អាញ់ (Le Duc Anh) ដែលជាអ្នករៀបចំផែនការឈ្លានពានដោយកម្លាំងយោធាក្នុងខែធ្នូ ឆ្នាំ១៩៧៨ ដើម្បីផ្ដួលរំលំរបបប៉ុលពតផងដែរ។
ជាអ្នកដឹកនាំកងកម្លាំងវៀតណាមអំឡុងទសវត្សរ៍ឆ្នាំ១៩៨០ និងជាប្រមុខរដ្ឋពីឆ្នាំ១៩៩២ដល់ឆ្នាំ១៩៩៧ លោក ឡេ ដឹក អាញ់ គឺជាអ្នករួមចំណែកដ៏សំខាន់ក្នុងការបង្កើនកម្លាំងយោធាដែលបានផ្ដួលរំលំរបបប៉ុល ពត និងដែលបានលើកបន្ដុបលោក ហ៊ុន សែន និងសមាជិកជាន់ខ្ពស់បក្សឲ្យឡើងកាន់អំណាច។ លោក ហារីស (Harish) និងអ្នកស្រី ជូលី មេត្តា (Julie Mehta) ដែលសុទ្ធតែជាអ្នកសរសេរនូវជីវប្រវត្តិ បានធ្វើការកត់សម្គាល់ក្នុងសៀវភៅរបស់ខ្លួនក្រោមចំណងជើងថា “ Strongman” ថា អតីតឧត្តមសេនីយ៍ ឡេ ដឹកអាញ់ ស្ថិតនៅក្នុងចំណោមអ្នកដែលមានទំនាក់ទំនងជិតស្និទ្ធបំផុតជាមួយលោក ហ៊ុន សែន អំឡុងទសវត្សរ៍ឆ្នាំ១៩៨០។
លោក ស្រី ថាមរ៉ុង បានឲ្យដឹងថា លោក ហ៊ុន សែន ក៏នឹងទទួលទានអាហារថ្ងៃត្រង់ជាមួយវិនិយោគិនវៀតណាមនៅថ្ងៃនេះផងដែរ ដោយលោកបានបញ្ជាក់បន្ថែមថា ការធ្វើពាណិជ្ជកម្មជាមួយវៀតណាមបច្ចុប្បន្ននេះមានទំហំស្មើនឹងទឹកប្រាក់ជាង៣.០០០លានដុល្លារ ហើយរដ្ឋាភិបាលបាន “ ប្ដេជ្ញាថា នឹងបង្កើនឲ្យដល់៥.០០០លានដុល្លារក្នុងឆ្នាំ២០១៥”។
លោកបានមានប្រសាសន៍ថា “ យើងដឹងថា យើងអាចសម្រេចបំណងនេះបាន”៕ សេរីវុធ