លោកហ៊ុន សែនអះអាងថា នយោបាយសងសឹកគ្នាប្រៀបដូចទៅនឹងរបបខ្មែរក្រហម ដែលមានការសងសឹកគ្នាទៅនឹងរបបមុន ក្រោយពេល ខ្មែរក្រហមបានឡើងដឹកនាំប្រទេស។
លោកហ៊ុន សែនអះអាងថា នយោបាយគណបក្សដទៃខ្លះប្រៀបដូចជាទឹកឡើងត្រីស៊ីស្រមោច ទឹកហោចស្រមោចស៊ីត្រី។ លោកបញ្ជាក់ថា អតីតមេដឹកនាំបក្សប្រឆាំងមិនទាន់គ្រប់គ្រងអំណាចផង ក៏បានអំពាវនាវឲ្យកងទ័ពប្រឆាំងរាជរដ្ឋាភិបាលទៅហើយ ដោយលោកថា នយោបាយរបៀបនេះជានយោបាយនាំឲ្យមានចលាចលនៅក្នុងប្រទេសជាតិជាពុំខាន។
មិនតែប៉ុណ្ណោះនៅថ្ងៃនេះ លោកហ៊ុន សែនក៏បានកែប្រែចិត្តគំនិតរបស់ខ្លួនដែលធ្លាប់បានសច្ចាចំពោះមុខមហាជនកន្លងមកថា លោកនឹងដឹកនាំប្រទេសត្រឹមឆ្នាំ២០២៨ ដោយលោកថា នឹងដឹកនាំប្រទេសមួយនេះជាយូរអង្វែងបន្តទៀត រហូតដល់ក្រុមប្រឆាំងដែលលោកហៅថា ជាក្រុមចម្រៃ មានគំនិតពិសពុល ស្លាប់អស់ជាមុនសិន។
ថ្លែងពីក្រៅប្រទេសនិងបង្ហោះនៅលើទំព័រហ្វេសប៊ុករបស់លោកកាលពីថ្ងៃ១៨មីនា ប្រធានស្តីទីគណបក្សសង្រ្គោះជាតិលោកសម រង្ស៊ីបានស្នើទៅប្រធានគណបក្សនយោបាយនិងអ្នកដឹកនាំដែលមានវ័យចាស់ទាំងឡាយដល់ពេលត្រូវដកខ្លួនសម្រាក ដើម្បីឱ្យក្មេងជំនាន់ក្រោយឡើងមកធ្វើឬដឹកនាំវិញម្តង។
លោកសម រង្ស៊ីបានថ្លែងថា បំណងរបស់លោកនៅពេលនេះគឺគ្រាន់តែវាយបំបែកឧបសគ្គដ៏ធំធេងនោះគឺអំណាចផ្តាច់ការសព្វថ្ងៃ ដើម្បីបើកផ្លូវប្រជាធិបតេយ្យឲ្យយុវជនកូនខ្មែរជំនាន់ក្រោយមានឱកាសមកដឹកនាំប្រទេសតាមសមត្ថភាពរបស់បុគ្គលម្នាក់ៗ ដោយមិនមានការរើសអើងតាមគំនិតបក្ខពួកនិយម គំនិតគ្រួសារនិយមនិងអំពើពុករលួយ។
លោកប្រាប់ពីមូលហេតុដែលតម្រូវឲ្យថ្នាក់ដឹកនាំចាស់ៗសព្វថ្ងៃចូលនិវត្តន៍គឺជាឱកាសផ្តល់ឲ្យយុវជនជំនាន់ក្រោយមកដឹកនាំប្រទេសតាមវេនរបស់ខ្លួន ដើម្បីឲ្យពួកគេអាចបង្ហាញស្នាដៃរបស់ខ្លួនហើយទទួលបានបទពិសោធន៍ក្នុងការបំពេញតួនាទីរបស់ខ្លួនឲ្យកាន់តែប្រសើរថែមទៀត។ ចំណេះដឹងថ្មី ឈាមថ្មីគំនិតថ្មីជាកត្តាចាំបាច់ដើម្បីឲ្យមានអភិបាលកិច្ចល្អដែលជំរុញប្រទេសយើងឆ្ពោះទៅរកការអភិវឌ្ឍពិតប្រាកដ ដែលផ្តល់ផលចំណេញដល់ប្រជារាស្ត្រទូទៅ។
ប្រធានក្រុមអ្នកវិភាគនយោបាយវ័យក្មេងកញ្ញាលី ស្រីស្រស់នៅថ្ងៃនេះបានលើកឡើងនៅលើបណ្តាញសង្គមថា មិនត្រូវយករឿងកម្ទេចអ្នកក្បត់ជាតិ និងអ្នកប្រឆាំងជាលេសក្នុងការបន្តកាន់អំណាចរបស់ខ្លួនឡើយ។
កញ្ញាក៏បានណែនាំដល់អ្នកដឹកនាំចាស់វស្សាថា ក្នុងនាមជាមេដឹកនាំម្នាក់ ដែលមានបទពិសោធន៍ដឹកនាំជាច្រើនឆ្នាំ ត្រូវដឹងថា ការដឹកនាំរមែងតែងមានអ្នកមិនពេញចិត្ត ហើយការរិះគន់គឺជារឿងដែលមិនអាចចៀសរួច។មួយវិញទៀត ក្នុងនាមជាអ្នកដឹកនាំ មិនត្រូវសូម្បីតែស្រមោចមួយខាំក៏យល់ថា ជារឿងធំដុំនោះដែរ។
កញ្ញាថា ក្រុមអ្នកប្រឆាំងមិនមែនជាអ្នកប្រឆាំងនឹងជាតិនិងមិនមែនជាអ្នកប្រឆាំងនឹងអ្នកដឹកនាំនោះទេតែជាអ្នកប្រឆាំងទៅនឹងគំនិតដឹកនាំរបស់អ្នកប៉ុណ្ណោះ ហើយអ្នកប្រឆាំងក៏មិនត្រូវបានគេចាត់ទុក ឬហៅថា អ្នកក្បត់ជាតិនោះដែរ។ មិនតែប៉ុណ្ណោះ ក្រុមអ្នកប្រឆាំងរឹតតែមិនអាចជាកម្មវត្ថុសម្រាប់អ្នកដឹកនាំយកមកប្រើជាលេសដើម្បីបន្តកាន់អំណាចនោះឡើយ៕