លោកហ៊ុន សែនបានសម្រេចផ្ដល់សិទ្ធិឲ្យក្រុមហ៊ុនរបស់លោកឧកញ៉ាគិត ម៉េងបន្ដប្រតិបត្តិការផ្លូវដែកភាគខាងត្បូងដដែលក្រោយពីលោកបានបញ្ជាដោយផ្ទាល់មាត់កាលពីថ្ងៃសុក្រសប្តាហ៍មុនឲ្យដកសិទ្ធិវិនិយោគរបស់ក្រុមហ៊ុនមួយនេះឱ្យរដ្ឋគ្រប់គ្រងវិញ។
លោកហ៊ុន សែននៅថ្ងៃទី១មេសានេះបានបញ្ជាក់បន្ថែមទៀតពាក់ព័ន្ធបញ្ហាផ្លូវដែកថា ដរាបណាកិច្ចព្រមព្រៀងថ្មីនិងដៃគូវិនិយោគថ្មីមិនទាន់មាន ក្រុមហ៊ុនRoyalRailwayរបស់អ្នកឧញ៉ាគិត ម៉េង នៅបន្តទទួលគ្រប់គ្រងផ្លូវដែកដដែល។
លោកក៏បានបញ្ជាក់ដែរថា ការបកស្រាយរបស់លោកកាលពីសប្តាហ៍មុនអាចជាការបកស្រាយមិនទាន់អស់សេចក្តីដោយថា មិនទាន់បាននិយាយពីអំឡុងពេលអន្តរកាលពីព្រោះនៅពេលនេះមិនទាន់មានដៃគូឬក្រុមហ៊ុនវិនិយោគថ្មីចូលមកជាផ្លូវការហើយក្រុមហ៊ុនរបស់លោកគិតម៉េងនៅតែបន្តគ្រប់គ្រងផ្លូវដែកដដែល។
លោកអះអាងថា នៅពេលដែលរកដៃគូវិនិយោគថ្មីបានហើយនោះ ក្រុមហ៊ុនRoyalRailwayក៏អាចចូលទុនក្នុងគម្រោងវិនិយោគថ្មីបាន ដើម្បីមានឱកាសពង្រីកវិសាលភាពការដឹកជញ្ជូនតាមផ្លូវដែក បានកាន់តែទូលំទូលាយ ដោយលោកចង់បានផ្លូវដែកដែលមានដំណើរការដឹកជញ្ជូនមានភាពរស់រវើកនិងសកម្ម។
កាលពីថ្ងៃម្សិលមិញក្រសួងសាធារណការនិងដឹកជញ្ជូនបានចេញសេចក្តីជូនដំណឹងមួយ ដោយសម្រេចផ្តល់ឲ្យក្រុមហ៊ុនRoyalRailwayរបស់អ្នកឧកញ៉ាគិត ម៉េងបន្តប្រតិបត្តិការដឹកជញ្ជូនទំនិញនិងអ្នកដំណើរតាមផ្លូវដែកភាគខាងត្បូងដដែលពីភ្នំពេញទៅខេត្តព្រះសីហនុ។
ក្រសួងសាធារណការនិងដឹកជញ្ជូនលើកហេតុផលថា ក្រសួងត្រូវការពេលវេលាដើម្បីត្រួតពិនិត្យទៅលើលក្ខខណ្ឌនិងបច្ចេកទេសពាក់ព័ន្ធនឹងការគ្រប់គ្រងដំណើរការផ្លូវដែកនេះ។
កាលពី២៩ខែមីនា លោកហ៊ុន សែនបានសម្រេចបញ្ចប់ការធ្វើអាជីវកម្មរបស់ក្រុមហ៊ុនRoyalRailwayCambodiaក្នុងប្រតិបត្តិការផ្លូវដែកនៅកម្ពុជាដោយសម្រេចប្រគល់ការគ្រប់គ្រងប្រតិបត្តិការផ្លូវដែកទៅឱ្យក្រសួងសាធារណការនិងដឹកជញ្ជូនជាបណ្ដោះអាសន្នដើម្បីរៀបចំនីតិវិធីគ្រប់គ្រងដំណើរការឡើងវិញ។
ការសម្រេចដកពេលនោះត្រូវបានអ្នកប្រើប្រាស់បណ្តាញសង្គមហ្វេសប៊ុកមួយចំនួនមើលឃើញថារដ្ឋាភិបាលលោកហ៊ុន សែនកំពុងរៀបចំគាបអ្នកឧកញ៉ាដែលជាមនុស្សស្និតនឹងខ្លួនជាបណ្តើរៗ ដោយគេសង្កេតឃើញថា លោកហ៊ុន សែននិងលោកគិត ម៉េងឆាប់ផ្តើមមានភាពមិនចុះសម្រុងនឹងគ្នាខ្លាំង។
ជាងនេះទៅទៀត លោកនាយករដ្ឋមន្ត្រីក៏ធ្លាប់ព្រមានធ្ងន់ៗដល់លោកគិត ម៉េងដោយថា មុខជំនួញទាំងឡាយរបស់លោកឧកញ៉ារូបនេះស្ថិតក្នុងកណ្តាប់ដៃរបស់លោក ហើយថា លោកគិត ម៉េងនឹងមានវាសនាអាក្រក់ ប្រសិនបើប្រឆាំងនឹងលោក។ ក្រោយការព្រមានរបស់លោកហ៊ុន សែនមិនបានប៉ុន្មានថ្ងៃផងរឿងរ៉ាវបង្ក្រាបគ្រឿងញៀនជាង៥០គីឡូក្រាមនៅមណ្ឌលកម្សាន្តRockក៏កើតឡើង និងឈានទៅចាប់ខ្លួន លោកឧកញ៉ាគិត ធាង ដែលជាបងប្រុសបង្កើតរបស់លោកគិត ម៉េង តែម្តង៕