មន្ត្រីសមត្ថកិច្ចជំនាញនៃក្រសួងមហាផ្ទៃបានលើកឡើងថា ឱសថខុសច្បាប់មួយចំនួនកើតមានដោយសារតែក្រុមជនល្មើសបាននាំចូលនិងបង្កើត។ លោកព្រមទាំងទទួលស្គាល់ថា បញ្ហានេះក៏ដោយសារ ភាពធ្វេសប្រហែសរបស់មន្ដ្រីអនុវត្តច្បាប់ផងដែរ។
ថ្លែងក្នុងសន្និសីទសារព័ត៌មានមួយនៅក្រសួងមហាផ្ទៃស្តីពីលទ្ធផលនៃការចុះបង្ក្រាបទីតាំងឱសថបុរាណចិនបំប៉នផ្លូវភេទនាថ្ងៃអង្គារនេះ អនុរដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយលោកមៀជ សុផាន់ណា មានប្រសាសន៍ថា កាលពីចុងខែមីនាកន្លងមកនេះ កម្លាំងសមត្ថកិច្ចបានចុះបង្ក្រាបទីតាំងលក់ឱសថបូរាណចិន៣កន្លែងស្ថិតសង្កាត់អូរឫស្សី រាជធានីភ្នំពេញ។
លោកបន្ថែមថា ការបង្ក្រាបនោះអាជ្ញាធរចាប់បានឱសថខុសច្បាប់និងផុតសុពលភាពជិត២ម៉ឺនគ្រាប់ដែលសុទ្ធសឹងជាប្រភេទឱសថបង្កើននិងជំនួយផ្លូវភេទ។ ក្រៅពីវត្ថុតាងទាំងអស់នេះ អាជ្ញាធរក៏រកឃើញជនសង្ស័យចំនួន៣នាក់ ដែលជាម្ចាស់ទីតាំងហើយថា កំពុងកសាងសំណុំរឿងបញ្ជូនពួកគេទៅតុលាការ។
មន្ត្រីជំនាញរូបនេះបន្តថា ផលិតផលខុសច្បាប់ទាំងនេះត្រូវបានលួចលាក់ដឹកជញ្ជូនមកពីប្រទេសជិតខាងមកហើយលោកក៏ទទួលស្គាល់ថា សមត្ថកិច្ចកម្ពុជាមានការធ្វេសប្រហែសក្នុងការងារនេះផងដែរ។
ក្នុងពិធីកិនកម្ទេចផលិតផលក្លែងក្លាយកាលពីថ្ងៃទី១៣ខែមីនាកន្លងទៅ រដ្ឋមន្ដ្រីក្រសួងមហាផ្ទៃ លោកស ខេងធ្លាប់បានបញ្ជាឱ្យមន្ត្រីរបស់ខ្លួនបង្ក្រាបករណីទាំងនេះ ដោយត្រូវចាប់ជនល្មើសយកមកអនុវត្តផង ដ្បិតការបង្ក្រាបកន្លងមកគឺមានតែវត្ថុតាងតែជនពាក់ព័ន្ធមិនត្រូវបានចាប់ខ្លួនយកមកផ្តន្ទាទោសទៅតាមច្បាប់នោះឡើយ។
របាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានបង្ហាញថា ក្នុងរយៈពេល១២ខែ កាលពីឆ្នាំ២០១៧ស្ថាប័ននេះបានរឹបអូសផលិតផលក្លែងក្លាយរួមនឹងគ្រឿងទេសក៍ក្លែងក្លាយខុសច្បាប់ចំនួន៦០០តោន។
ក្រោយមកនៅក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយ ថ្នាំពេទ្យក្លែងក្លាយ និងដុតបំផ្លាញចោលជាបន្តបន្ទាប់ដែលមានចំនួនជាង២០០តោនបន្ថែមទៀត៕