ធនាគារពិភពលោក(World Bank)ព្រមានថា សេដ្ឋកិច្ចកម្ពុជាអាចប្រឈមនឹងហានិភ័យ ប្រសិនបើសហភាពអឺរ៉ុបសម្រេចព្យួរប្រព័ន្ធអនុគ្រោះពន្ធអ្វីៗទាំងអស់លើកលែងតែអាវុធឬEBA។
របាយការណ៍បច្ចុប្បន្នភាពសេដ្ឋកិច្ចអាស៊ីខាងកើត និងប៉ាស៊ីហ្វិករបស់ធនាគារពិភពលោកប្រចាំកម្ពុជាដែលទើបចេញផ្សាយនៅថ្ងៃនេះលើកឡើងថា មូលហេតុដែលជំរុញវិនិយោគិនបរទេសមករកស៊ីនៅកម្ពុជាដោយសារកម្ពុជាទទួលបានការអនុគ្រោះពន្ធមុខទំនិញទាំងអស់លើកលែងតែអាវុធEBAពីអឺរ៉ុប និងថ្លៃពលកម្មថោក។
ប៉ុន្តែកាលពីខែកុម្ភៈ សហភាពអឺរ៉ុបបានចាប់ផ្ដើមដំណើរការមួយ ដែលអាចនាំទៅដល់ការព្យួរបណ្ដោះអាសន្ននូវភាពអនុគ្រោះពន្ធសម្រាប់កម្ពុជា។ ធនាគារមួយនេះ ព្រមានថាសេដ្ឋកិច្ចកម្ពុជាអាចជួបហានិភ័យនៅឆ្នាំខាងមុខ ប្រសិនបើមិនអាចស្ដារប្រព័ន្ធអនុគ្រោះពន្ធរបស់សហភាពអឺរ៉ុបគឺEBAបាននោះ។
របាយការណ៍ដដែលឲ្យដឹងទៀតថា ការកាត់ផ្ដាច់ប្រព័ន្ធអនុគ្រោះពន្ធEBA របស់អឺរ៉ុបនឹងធ្វើឲ្យកំណើននៃការនាំចេញរបស់កម្ពុជាទៅកាន់សហភាពអឺរ៉ុបថយចុះ។ បន្ថែមពីលើនេះ ដោយសារ កម្ពុជាពឹងផ្អែកខ្លាំងលើការនាំចូលពីចិនច្រើនពេកនោះ ហើយនៅពេលមានការធ្លាក់ចុះសេដ្ឋកិច្ចចិនក្នុងកាលៈទេសៈណាមួយនៅពេលខាងមុខ វានឹងជះឥទ្ធិពលអាក្រក់មកលើសេដ្ឋកិច្ចកម្ពុជាផងដែរ។
ធនាគារពិភពលោកបានផ្តល់ជាអនុសាសន៍ថា ក្នុងស្ថានភាពបែបនេះ កម្ពុជាគួរមានវិធានការចាំបាច់មួយចំនួន ដូចជា រក្សាបៀវត្សសាធារណៈកុំឲ្យរីកមាឌតទៅទៀត ត្រូវមានវិធានការត្រៀមឆ្លើយតបនឹងវិបត្តិហិរញ្ញវត្ថុ និងដាក់កំហិតដល់ធនាគារក្នុងការផ្ដល់កម្ចីឲ្យផ្នែកសំណង់ រួមជាមួយនឹងការកាត់បន្ថយថ្លៃដើមផលិតក្នុងពាណិជ្ជកម្ម ដែលរួមមាន ការកាត់បន្ថយថ្លៃអគ្គិសនី និងថ្លៃចំណាយក្នុងការដឹកជញ្ជូនជាដើម។
ក្រៅពីប្រព័ន្ធអនុគ្រោះពន្ធEBAរបស់សហភាពអឺរ៉ុប សហរដ្ឋអាមេរិកឯណោះវិញ ក៏បានព្រមានអំពីលទ្ធភាពនៃការឈានទៅផ្តាច់ប្រព័ន្ធអនុគ្រោះពន្ធទូទៅ ឬហៅថា GSPពីកម្ពុជាផងដែរ ដោយទាំងអឺរ៉ុប និងអាមេរិកបានរកឃើញថា រដ្ឋាភិបាលលោកហ៊ុន សែនក្នុងរយៈពេលចុងក្រោយនេះបានបំផ្លាញមូលដ្ឋានគ្រឹះនៃលទ្ធិប្រជាធិបតេយ្យ និងការគោរពសិទ្ធិមនុស្សទៀតផង។
ទោះមានការព្រមាននានាអំពីហានិភ័យសេដ្ឋកិច្ចកម្ពុជានៅពេលគ្មានប្រព័ន្ធអនុគ្រោះពន្ធក្តី ប៉ុន្តែមេដឹកនាំរដ្ឋាភិបាលឯកបក្សលោកហ៊ុន សែនតែងអះអាងថា ទោះគ្មានEBAក៏សេដ្ឋកិច្ចកម្ពុជាអាចរស់ដោយខ្លូនឯងបានដែរ។ ប៉ុន្តែទោះបែបនេះក្តី លោកហ៊ុន សែនតែងបញ្ជូនមន្ត្រីរបស់ខ្លួនស្ងាត់ៗទៅចរចាជាមួយសហភាពអឺរ៉ុបដើម្បីកុំឲ្យមានការដកប្រព័ន្ធអនុគ្រោះពន្ធនេះ។
នៅដើមឆ្នាំ២០១៩នេះ លោក ហ៊ុន សែនបានប្រកាសម្តងហើយម្តងទៀតអំពីវិធានការទប់ទល់នឹងការដកហូតប្រព័ន្ធអនុគ្រោះពន្ធពីកម្ពុជា។ វិធានការទាំងនោះ រួមមាន ការដកកាំកុងត្រូលចេញពីព្រំដែន ការលុបចោលស្ថាប័ននាវាចរកាំសាប និងការលុបចោលការិយាល័យក្រសួងនៅថ្នាក់ស្រុកមួយចំនួន ការបញ្ចុះថ្លៃអគ្គិសនី និងការឈប់យកពន្ធលើសហគ្រាសកសិកម្មរយៈពេល៥ឆ្នាំជាដើម។
ប៉ុន្តែអ្នកវិភាគនយោបាយជាច្រើន ព្រមានអំពីលទ្ធផលអាក្រក់ថា នឹងកើតមានឡើងនៅកម្ពុជាដូចជាវិបត្តិសង្គមធ្ងន់ធ្ងរផ្សេងៗ ដែលកើតចេញពីភាពអត់ការងារធ្វើរបស់ពលរដ្ឋ ប្រសិនបើកម្ពុជាត្រូវបាត់បង់ប្រព័ន្ធអនុគ្រោះពន្ធទាំងពីរនេះ ដែលនាំឱ្យកម្ពុជាត្រូវខាតបង់ចំណូលសម្រាប់ជាតិដល់ទៅ១ពាន់លានដុល្លារសហរដ្ឋអាមេរិកក្នុងមួយឆ្នាំ ដែលជាមូលហេតុធ្វើឱ្យក្រុមហ៊ុនឬ អ្នកបញ្ជាទិញធំៗងាកទៅរកទីតាំងប្រទេសផ្សេងក្រៅពីកម្ពុជា។
របាយការណ៍របស់ក្រសួងពាណិជ្ជកម្មកម្ពុជាកាលពីឆ្នាំ២០១៨ឲ្យដឹងថា ទំហំពាណិជ្ជកម្មរវាងកម្ពុជានិងសហគមន៍អឺរ៉ុបមានជិត៦ពាន់់លានដុល្លារ នៅក្នុងឆ្នាំ២០១៧ ខណៈកម្ពុជានាំចេញទៅអឺរ៉ុបជាង៤ពាន់់លានដុល្លារ ចំណែកឯសហគមន៍អឺរ៉ុបវិញនាំចូលមកកម្ពុជាជិត១ពាន់់លានដុល្លារ៕