អតីតប្រធានគណបក្សសង្រ្គោះជាតិដែលកំពុងនិរទេសនៅក្រៅប្រទេសលោកសម រង្ស៊ីបានប្រដូចសហការីរបស់ខ្លួនគឺលោកកឹម សុខាទៅនឹងថ្នាក់ដឹកនាំជាន់ខ្ពស់ប្រទេសភូមាបច្ចុប្បន្នគឺអ្នកស្រី អ៊ុង សានស៊ូជីថា មានជីវិតតស៊ូនយោបាយដូចគ្នា។
គណនីហ្វេសប៊ុករបស់លោកសម រង្ស៊ីនៅថ្ងៃនេះ បានចុះផ្សាយថា ក្នុងដំណើរទស្សនកិច្ចអ្នកស្រីអ៊ុង សានស៊ូជីនៅកម្ពុជានាសប្តាហ៍នេះ ធ្វើឲ្យមតិសាធារណចងចាំថា លោកស្រីអ៊ុង សានស៊ូជីត្រូវបានរបបផ្តាច់ការនៅប្រទេសភូមា ឃុំឃាំងក្នុងគេហដ្ឋានរបស់អ្នកស្រីរយៈ ពេលជាង១០ឆ្នាំ តែអ្នកស្រីមិនដែលជាប់ឃុំឃាំងក្នុងពន្ធនាគារទេ។
លោកថា ការឃុំឃាំងក្នុងផ្ទះបែបនេះបានធ្វើឲ្យពិភពលោកទាំងមូល ទាមទារឲ្យមានការដោះលែងអ្នកស្រីអ៊ុង សានស៊ូជីឲ្យទទួលបានសេរីភាពពេញលេញឡើងវិញ។
អតីតប្រធានបក្សប្រឆាំងរូបនេះអះអាងថា ចំណែកក្នុងស្ថានភាពបច្ចុប្បន្នវិញ លោកកឹម សុខាក៏កំពុងតែត្រូវបានរបបផ្តាច់ការលោកហ៊ុន សែនឃុំឃាំងក្នុងផ្ទះជាង៦ខែមកហើយ ដូចអ្នកស្រីអ៊ុង សានស៊ូជីកាលពីមុនអ៊ីចឹងដែរ។
លោកថា ស្ថានភាពបែបនេះហើយដែលធ្វើឲ្យពិភពលោកទាំងមូល កំពុងទាមទារឲ្យរបបលោកហ៊ុន សែនដោះលែងលោកកឹម សុខាឱ្យមានសេរីភាពពេញលេញឡើងវិញ ដោយថា តុលាការអាយ៉ងទីក្រុងភ្នំពេញរកភស្តុតាងក៏គ្មាន ហើយសាក្សីក៏គ្មានក្នុងការចោទប្រកាន់គ្មានមូលដ្ឋានមកលើលោកកឹម សុខាដែលជាប្រធានគណបក្សសង្គ្រោះជាតិ។
ប្រធានគណបក្សសង្គ្រោះជាតិដែលកំពុងជាប់ឃុំក្នុងផ្ទះលោក កឹម សុខាត្រូវបានរដ្ឋាភិបាលលោកហ៊ុន សែនចាប់ខ្លួនកាលពីថ្ងៃទី៣ ខែកញ្ញា២០១៧ ដោយលោកហ៊ុន សែនចោទថា ក្បត់ជាតិ។ លោកត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុងក្នុងខេត្តត្បូងឃ្មុំជាប់ព្រំដែនវៀតណាមប្រមាណ១ឆ្នាំហើយក៏ប្តូរមកឃុំខ្លួននៅផ្ទះជំនួសវិញកាលពីខែកញ្ញា២០១៨។
មកទល់ពេលនេះ តុលាការមិនទាន់បើកសវនាការលើសំណុំរឿងនេះទេ ហើយសហគមន៍អន្តរជាតិ ពិសេសសហភាពអឺរ៉ុប និងអាមេរិកបានទទូចឱ្យរដ្ឋាភិបាលលោកហ៊ុន សែនដោះលែងប្រធានបក្សប្រឆាំងរូបនេះម្តងជាពីរដង ដោយថា ជាការឃុំខ្លួនទាំងអយុត្តិធម៌និងគ្មានភស្តុងតាងសោះឡើយ៕