សាសនិកអ៊ីស្លាមឬអ៊ីស្លាមនិកជន ប្រមាណ១ពាន់៨រយលាននាក់ ក្នុងពិភពលោកបាននាំគ្នាកាន់តំណមហៅថា បួសមិនទទួលទានទឹក ចំណីអាហារពេលថ្ងៃ ចាប់ពីព្រលឹមស្រាងៗមុនថ្ងៃរះរហូត ដល់ថ្ងៃលិចបាត់ពីជើងមេឃ។ គេនាំគ្នាផ្តើមបួសពេញ៣០ថ្ងៃ ចាប់ពីថ្ងៃច័ន្ទទី៦ ខែ ឧសភារហូតដល់ថ្ងៃច័ន្ទទី៣ខែមិថុនា គិតតាមប្រក្រតិទិនគ្រិស្តសករាជ។
សូមបញ្ជាក់ថា ខែបួសឬឈ្មោះខែ រ៉ម៉ាឌន តាមភាសាអារ៉ាប់ជាខែទី៩ បើគិតតាមប្រក្រតិទិនអ៊ីស្លាមសករាជវិញ ដែលរាប់ត្រឡប់ក្រោយផ្ទុយពីគ្រីស្តសករាជ។
ខែទី១ក្នុងឆ្នាំថ្មីជាបន្តបន្ទាប់គឺខែមូហារ៉ម(Muharram)។ អ៊ីស្លាមសករាជ មកទល់ឆ្នាំ២០១៩គឺបាន១៤៤០ឆ្នាំ ដោយគិតពីគ្រាដែលបរមគ្រូ មូហាំម៉ាត់(Muhammad)សម្រេចចាកចេញ គេចពីការធ្វើទុក្ខបុកម្នេញ ធ្វើទុក្ខទោសទារុណកម្មលើមនុស្សមានជំនឿប្រណិប័តធម៌ព្រះអាទិទេព អល់ឡោះជាម្ចាស់លើគ្រប់ជីវិតសត្វលោក រុក្ខជាតិគ្រប់ឋានភព ផែនទាំងពួងពីក្រុងម៉ាក់កះ(Makkah)ទៅកាន់ទីថ្មីឈ្មោះក្រុងម៉ាទីណះ(Madinah)។
ខែរ៉ម៉ាឌនជាខែដែលព្រះអាទិទេព(ព្រះអល់ឡោះ)ជាម្ចាស់ បានលាតត្រដាងព្រះគម្ពីរអាល់គួរ៍អាន(Al-Qur’an)ម្តងបន្តិចៗ រហូតអស់មួយចប់គម្ពីរតាមរយៈស្តេចទេវតាឈ្មោះជីប្រៀល(Jibril)។
ខែរ៉ម៉ាឌនព្រះអាទិទេពជាម្ចាស់បញ្ជាឲ្យសាសនិកអ៊ីស្លាម តមចំណីអាហារ ឬបួសតាំងពីសម័យកាលមុនបរមគ្រូមូហាំម៉ាត់មានកំណើតម៉្លេះ។ បួសតមចំណីអាហារមានសាសនិកផ្សេងៗប្រណិប័តដូចជានៅក្នុងព្រះពុទ្ធសាសនាគ្រីស្តសាសនាបែបបុរាណ(Orthodox Christian Church)និងសាសនាជូដានិយម(Judaism)ជាដើម ប៉ុន្តែវិធីបួសមានរបៀបប្រណិប័តផ្សេងៗគ្នា។
អ៊ីស្លាមិកជននាំគ្នាទៅថ្វាយបង្គំព្រះតាមព្រះវិហារពេលយប់ រៀងរាល់យប់បន្ថែមទៅនឹងការថ្វាយបង្គំ៥ដងក្នុងមួយថ្ងៃដើម្បីសាងសន្សំកុសល សុំខមាទោសពីព្រះអាទិទេពជាម្ចាស់ចំពោះអំពើ ទង្វើរបស់ខ្លួនពីមុនៗទាំងកាយ វាចាចិត្តទោះជាសម្តែងចេញឲ្យឃើញក្តី លាក់បាំងមិនឲ្យឃើញតាមបែបណាក្តីឲ្យលុបជ្រះស្រឡះចេញ។
គេមិនត្រឹមតែតមការទទួលទានប៉ុណ្ណោះទេ គេតោងកាន់ចិត្តអំណត់អត់ធន់មិន ត្រេកត្រអាល មិនស្រេកឃ្លាន មិនកញ្ជ្រោលតាមកាមតណ្ហា មិនខឹងសម្បារ មិនលេងសើច មិននិយាយដើមគេ មិនស្តាប់ មិនមើលរឿងអប្រីយ៍។ ក្នុងការបួសនេះ សាសនិកអ៊ីស្លាមព្យា យាមធ្វើទានឲ្យបានច្រើនជាទីបំផុតព្រោះគេដឹងថា ព្រះអាទិទេពនឹងផ្តល់រង្វាន់ដល់គេក្នុងជាតិនេះហៅថា ឥធលោកនិងជាតិមុខ ហៅថា បរលោកមួយជាចិតសិប(៧០)ជា៧០០ដង។
គេជឿថា បួស ជារនាំងការពារអណ្តាតភ្លើងឋាននរកមិនឲ្យឆាបឆេះរោលខ្លួនគេនៅពេលស្លាប់។ រីឯការធ្វើទានគឺជាការបោសលាងសម្អាតបាបកម្មតូចតាចទាំងឡាយដែលខ្លួនបានប្រព្រឹត្ត ទោះជាដោយដឹងខ្លួនក្តី មិនដឹងខ្លួនក្តី។ ឋានសួគ៌គឺសម្រាប់មនុស្សស្អាតចែស ឥតប្រឡាក់បាប!