លោកនាយករដ្ឋមន្ត្រីហ៊ុន សែនបានអំពាវនាវជាថ្មីទៀតឱ្យពលរដ្ឋទាំងឡាយ ចូលរួមថែរក្សាការពារសន្តិភាពឱ្យបានគង់វង្សជារៀងរហូតហើយនាំគ្នាទប់ស្កាត់កុំឲ្យសង្រ្គាមនិងរបបប្រល័យពូជសាសន៍វិលមកកម្ពុជាសារជាថ្មី។ ការអំពាវនាវនេះធ្វើឡើងក្នុងទិវាជាតិនៃការចង់ចាំ២០ឧសភាដែលលោកហ៊ុន សែនបានផ្សព្វផ្សាយនៅលើទំព័រហ្វេសប៊ុករបស់លោកនៅថ្ងៃនេះ។
លោកហ៊ុន សែនបានលើកឡើងថា ពិធីនេះគឺដើម្បីរំឭកដល់ជនរងគ្រោះនិងការឈឺចាប់ពីឧក្រិដ្ឋកម្មដែលបានកើតឡើងក្នុងរបបប្រល័យពូជសាសន៍ប៉ុលពត ចន្លោះពីថ្ងៃទី១៧មេសា១៩៧៥ដល់ថ្ងៃទី៧មករា១៩៧៩។
អតីតកម្មាភិបាលជាន់ខ្ពស់នៃរបបខ្មែរក្រហមរូបនេះបានបញ្ជាក់ថា គោលបំណងទិវាជាតិនៃការចងចាំគឺបង្កើតឡើងដើម្បីរំឭក និងគោរពវិញ្ញាណក្ខន្ធ និងធ្វើបុណ្យឧទ្ទិសកុសលដល់ជនរងគ្រោះដែលបានស្លាប់ជាង៣លាននាក់ នៅក្នុងរបបប៉ុល ពតដ៏ឃោរឃៅនេះ។
លោកបន្តថា ពលរដ្ឋកម្ពុជាភាគច្រើនលើសលុបបានដឹង និងយល់ច្បាស់អំពីរឿងរ៉ាវសោកនាដកម្មដ៏ជូរចត់ដែលពលរដ្ឋខ្មែរមួយប្រទេសបានឆ្លងកាត់ជិត៣ទសវត្សរ៍ក្នុងភ្នក់ភ្លើងសង្គ្រាម និងទឹកភ្នែក ការកាប់សម្លាប់ បំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វ គ្មានពេលសម្រាក ពេលឈឺគ្មានថ្នាំព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិត ដែលជាសិទ្ធិមូលដ្ឋានមានតាំងពីកំណើតរបស់មនុស្សក៏គ្មានដែរ។
អតីតកម្មាភិបាលខ្មែរក្រហមរូបនេះក៏បានស្នើឲ្យពលរដ្ឋចូលរួមថែរក្សាការពារសន្តិភាពឱ្យបានគង់វង្សជារៀងរហូត ហើយនាំគ្នាទប់ស្កាត់កុំឲ្យសង្រ្គាមនិងរបបប្រល័យពូជសាសន៍វិលមកកម្ពុជាសារជាថ្មី។
ទោះជាយ៉ាងណាក៏ដោយហេតុផលនៃការការពារសន្តិភាពនេះគឺជាហេតុផលពេញនិយមសម្រាប់រដ្ឋាភិបាលកម្ចេចដៃគូប្រកួតរបស់ខ្លួន ឬក្រុមប្រឆាំងនឹងខ្លួន។ ជាក់ស្តែងការចាប់ខ្លួនលោកកឹម សុខានិង ការរំលាយគណបក្សសង្រ្គោះជាតិកាលពីចុងឆ្នាំ២០១៧ហើយទោះជាសហគមន៍អន្តរជាតិថ្កោលទោសរដ្ឋាភិបាលយ៉ាងក៏ដោយ ក៏រដ្ឋាភិបាលបានលើកឡើងថា ការកម្ចេចក្រុមប្រឆាំងទាំងនោះគឺដើម្បីបញ្ចៀសសង្គ្រាម ហើយដើម្បីការពារសន្តិភាពផងដែរ។
ទិវាជាតិនៃការចងចាំ២០ឧសភាត្រូវរដ្ឋាភិបាលលោកហ៊ុន សែនកំណត់ជាថ្ងៃបុណ្យជាតិកាលពីថ្ងៃទី១៤ខែកុម្ភៈ ឆ្នាំ២០១៨ ដោយដំបូងទិវានេះ មានឈ្មោះថា ទិវានៃការចងកំហឹងតែក្រោយមកប្តូរទៅជាទិវាជាតិនៃការចងចាំវិញ។
អ្នកវិភាគនយោបាយនៅក្រៅប្រទេសលោកគឹម សុខបានលើកឡើងនៅលើទំព័រហ្វេសប៊ុករបស់ខ្លួននៅថ្ងៃនេះថា កម្ពុជាគួរតែមាន «ទិវារំសាយកំហឹងជាតិ២០ឧសភា»ដើម្បីជម្រះបញ្ចប់គំនុំរវាងខ្មែរនិងខ្មែរ។
លោកបន្តថា នៅថ្ងៃទី២០ខែឧសភាជារៀងរាល់ឆ្នាំ អង្គការបក្សកុម្មុយនិស្តដែលកងទ័ពវៀតណាមឈ្លានពានលើកបន្តុបឲ្យកាន់អំណាចនៅកម្ពុជាពីខែមករាឆ្នាំ១៩៧៩បានប្រារព្ធទិវាចងកំហឹងជាតិដើម្បីបន្តទម្លាប់ដុតកំហឹងប្រជារាស្ត្រខ្មែរ ក្រោមរូបភាពមួយបែបទៀតដែលបន្តពីសម័យប៉ុល ពត។
លោកគឹម សុខបន្តថា ពីមុនគេហៅទិវាចងកំហឹង ប៉ុន្តែប៉ុន្មានឆ្នាំមុននេះ គេកែមកជា«ទិវាជាតិនៃការចងចាំ»វិញដោយមើលទៅគេដឹងថា ប្រជារាស្ត្រដឹងអំពីគោលដៅកេងប្រវ័ញ្ចពីការឈឺចាប់និងការរងគ្រោះរបស់ប្រជារាស្ត្រខ្មែរ និងទាញយកផលចំណេញនយោបាយរបស់បក្សប្រជាជនកម្ពុជាដែលយួនបានលើកបន្តុប។
លោកបន្តថា ការដុតកំហឹងពលរដ្ឋខ្មែរក្រោមពាក្យថា«ចងកំហឹងជាតិ»នេះ ពុំបានជាប្រយោជន៍អ្វីដល់ប្រទេសកម្ពុជានិងប្រជារាស្ត្រខ្មែរទេ ប៉ុន្តែគឺជាយុទ្ធសាស្ត្ររបស់គណបក្សលោកហ៊ុន សែនមិនឲ្យប្រជារាស្ត្រខ្មែរត្រជាក់ចិត្ត ដើម្បីអាចផ្សះផ្សាបំបាត់ចោលនូវសម្អប់ជាតិ ដែលនាំឲ្យខូចផែនការប្រតោងអំណាចរបស់គាត់។
លោកបន្តថា នេះនៅមិនទាន់និយាយផងទេថា ជានយោបាយដើរបញ្ច្រាសនឹងគុណធម៌ព្រះពុទ្ធប្រៀនប្រដៅឲ្យប្រកាន់ធម៌ត្រជាក់អហិង្សា។ លោកថា ទាំងនេះនៅមិនទាន់និយាយផងអំពីការអុជអាលចងកំហឹងរវាងខ្មែរគឺជាបំណងនយោបាយរបស់របបក្រុងហាណូយដែលចង់ឲ្យខ្មែរនៅចងកំហឹងរវាងខ្មែរនិងខ្មែរដើម្បីប្រយោជន៍របស់វៀតណាមមិនឲ្យខ្មែរមានសាមគ្គីជាតិបាន៕