ប្រធានាធិបតីប្រទេសទួរគី Recep Tayyip Erdogan ស្នើសុំប្រធានាធិបតីរុស្ស៊ី Vladimir Putin និងប្រធានាធិបតីអ៊ុយក្រែន Volodymyr Zelensky ទៅធ្វើទស្សនកិច្ចនៅប្រទេសរបស់លោក ដើម្បីជជែកពិភាក្សាគ្នាអំពីស្ថានការណ៍យោធាដែលកាន់តែតានតឹងនៅតាមព្រំដែនរវាងរុស្ស៊ី និងអ៊ុយក្រែន។ នេះបើយោងតាមលោក Ibrahim Kalin អ្នកនាំពាក្យប្រធានាធិបតីទួរគី ដែលទីភ្នាក់ងារសារព័ត៌មានរុស្ស៊ី Tass បានផ្សាយនៅថ្ងៃពុធ ទី១៩ មករា នេះ។
តាមអ្នកនាំពាក្យរូបនេះ ប្រទេសទួរគី និងប្រធានាធិបតី Erdogan បានសន្យាថានឹងដើរតួយ៉ាងសកម្មដើម្បីកាត់បន្ថយភាពតានតឹងរវាងរុស្ស៊ី និងអ៊ុយក្រែន។ ក្នុងស្ថានភាពនេះ ប្រធានាធិបតី Erdogan បានស្នើសុំឱ្យមានការជួបគ្នាផ្ទាល់រវាងប្រធានាធិបតីរុស្ស៊ី Vladimir Putin និងប្រធានាធិបតីអ៊ុយក្រែន Zelensky។
តាមអ្នកនាំពាក្យរូបនេះ លោក Erdogan នឹងធ្វើជាអ្នកសម្របសម្រួល បើមេដឹកនាំប្រទេសអឺរ៉ុបខាងកើត ២រូបនេះមកកាន់ប្រទេសទួរគី ប៉ុន្តែក្រសួងការបរទេសរុស្ស៊ី ប្រកាសថា មុខនាទីរបស់ទួរគីនៅពេលនេះ មិនត្រូវនឹងស្ថានការណ៍នោះទេ។
ចំណែកឯបណ្ដាញផ្សាយព័ត៌មាន ABC បានផ្សាយថា ខណៈនេះលោករដ្ឋមន្ត្រីការបរទេសសហរដ្ឋអាមេរិក Antony Blinken បានទៅដល់ប្រទេសអ៊ុយក្រែន ហើយ ដើម្បីជួបប្រធានាធិបតី Zelensky។ គេរំពឹងថា លោក Blinken នឹងទៅពិនិត្យមើលផងដែរជំនួយសព្វាវុធរបស់សហរដ្ឋអាមេរិកដែលបានបញ្ជូនទៅដល់ប្រទេសអ៊ុយក្រែន នៅថ្ងៃនេះដែរ។ ជំនួយយោធានេះ បើគិតជាសាច់ប្រាក់ គឺ ២០០លានដុល្លារអាមេរិក។ មន្ត្រីជាន់ខ្ពស់សេតវិមានម្នាក់និយាយថា ជំនួយសហរដ្ឋអាមេរិកនេះត្រូវបានសភាអនុម័តតាំងពីខែធ្នូ ឆ្នាំ២០២១ ដែលជាផ្នែកមួយនៃការជួយពង្រឹងសមត្ថភាពការពារជាតិសម្រាប់ប្រទេសអ៊ុយក្រែន។
ទន្ទឹមនឹងនេះ អ្នកនាំពាក្យសេតវិមាន អ្នកស្រី Jen Psaki ព្រមានថា រុស្ស៊ីអាចនឹងមានសកម្មភាពយោធាទៅលើអ៊ុយក្រែនឆាប់ៗនេះ បើស្ថានការណ៍យោធាកាន់តែតានតឹងខ្លាំងដូចពេលនេះ។
អ្នកស្រី Jen Psaki ពន្យល់ថា បើតាមសកម្មភាពកងទ័ពរុស្ស៊ី ដែលឡោមព័ន្ធអ៊ុយក្រែន អាចបង្កសង្គ្រាមវាយអ៊ុយក្រែនក្នុងពេលណាមួយខាងមុខនេះ។ ចំពោះទស្សនកិច្ចរបស់លោករដ្ឋមន្ត្រីការបរទេស Blinken គឺជាការដំណើរការត្រួសត្រាយផ្លូវទៅរកដំណោះស្រាយការទូតសំដៅកាត់បន្ថយភាពតានតឹងផ្នែកយោធារវាងប្រទេសរុស្ស៊ី និងអ៊ុយក្រែន។
បន្ទាប់ពីជំនួបជាមួយប្រធានាធិបតីអ៊ុយក្រែន Volodymyr Zelensky លោក Blinken នឹងទៅកាន់ប្រទេសអាល្លឺម៉ង់ និងប្រទេសខ្លះទៀតដែលជាសម្ពន្ធមិត្តអាមេរិកនៅអឺរ៉ុប ហើយក្រោយមកទៀត លោកនឹងទៅប្រទេសស្វីស ដើម្បីជួបសមភាគីរុស្ស៊ី នៅថ្ងៃសុក្រក្នុងសប្ដាហ៍នេះ។ ជំនួបរបស់លោក Blinken និងសមភាគីរុស្ស៊ី ហ្ស៊ីហ្គេឡារ៉ុស (Sergei Lavrov) គឺជាការធ្វើតេស្ដអំពីឆន្ទៈរបស់រុស្ស៊ី ថាតើចង់កាត់បន្ថយភាពតានតឹងជាមួយអ៊ុយក្រែន និងអង្គការយោធាណាតូ ដែរឬទេ។
ស្ថានការណ៍ដ៏តានតឹងនៅអឺរ៉ុបខាងកើត បានកើតមានរយៈពេលជាងមួយខែមកហើយបន្ទាប់ពីរុស្ស៊ី បង្កើនវត្តមានកងទ័ពរបស់ខ្លួនជាមួយនឹងការដាក់ពង្រាយសព្វាវុធទំនើបៗនៅជាប់ព្រំដែនអ៊ុយក្រែន ដែលចំនួនកងទ័ពរបស់រុស្ស៊ីមកដល់ពេលនេះនៅតែមានជាង ១០ម៉ឺននាក់នៅឡើយ។ ចំណែកឯអ៊ុយក្រែនឯណោះវិញ ក៏បង្កើនវត្តមានកងទ័ព និងសព្វាវុធជាប់នឹងព្រំដែនរុស្ស៊ីផងដែរ។ បើតាមព័ត៌មាន គឺចំនួនកងទ័ពអ៊ុយក្រែនជាប់នឹងព្រំដែនរុស្ស៊ី កើនឡើងជាង ១៥ម៉ឺននាក់។
មុនសហរដ្ឋអាមេរិកបញ្ជូនសព្វាវុធទៅឱ្យអ៊ុយក្រែនបានមួយថ្ងៃ បណ្ដាញផ្សាយព័ត៌មាន BBC បានចុះផ្សាយថា ប្រទេសអង់គ្លេស បានបញ្ជូនសព្វាវុធទៅដល់ប្រទេសអ៊ុយក្រែន កាលពីថ្ងៃអង្គារ ទី១៨ មករា។
លោក Ben Wallace រដ្ឋមន្ត្រីក្រសួងការពារជាតិអង់គ្លេស បានប្រាប់ BBC ថា កងទ័ពមួយក្រុមតូចដែលអមដំណើរសព្វាវុធទៅកាន់ប្រទេសអ៊ុយក្រែន គឺដើម្បីទៅហ្វឹកហ្វឺនកងទ័ពអ៊ុយក្រែន ក្នុងការប្រើប្រាស់សព្វាវុធទាំងនោះ ប៉ុន្តែលោក Wallace បញ្ជាក់ថា កងទ័ពអង់គ្លេសមួយក្រុមនេះនឹងមិនក្លាយជាកម្លាំងគំរាមរុស្ស៊ីនោះទេ។
តាមលោករដ្ឋមន្ត្រីការពារជាតិ Ben Wallace សព្វាវុធរបស់អង់គ្លេសដែលបញ្ជូនទៅប្រទេសអ៊ុយក្រែន ក្នុងនោះមានកាំជ្រួចកម្ទេចរថក្រោះផងដែរ។ ការបញ្ជូនសព្វាវុធរបស់ប្រទេសអង់គ្លេសទៅអ៊ុយក្រែន ធ្វើឡើងបន្ទាប់ពីរដ្ឋការសហរដ្ឋអាមេរិករបស់លោកប្រធានាធិបតី ចូ បៃដិន ព្រមានថា រុស្ស៊ីអាចឈ្លានពានអ៊ុយក្រែន ដោយមិនកំណត់ពេលវេលាជាក់លាក់ឡើយ។
អ៊ុយក្រែន បានក្លាយជាសម្ពន្ធមិត្តរបស់អាមេរិក និងលោកខាងលិចចាប់តាំងពីរុស្ស៊ី បានដណ្ដើមយកតំបន់គ្រីមៀរពីអ៊ុយក្រែន នៅឆ្នាំ២០១៤ តាមរយៈការបោះឆ្នោតប្រជាមតិដែលជនជាតិរុស្ស៊ីជិត ៨០ភាគរយនៅតំបន់នោះ បានបោះឆ្នោតផ្ដាច់ខ្លួនពីអ៊ុយក្រែន ដែលនាំឱ្យអ៊ុយក្រែន ប្រតិកម្មរុស្ស៊ី យ៉ាងខ្លាំង ហើយរដ្ឋាភិបាលទីក្រុងគៀវ ក៏កាន់តែធ្វើឱ្យជិតស្និទ្ធជាមួយសហរដ្ឋអាមេរិក និងលោកខាងលិចដែលមានប្រទេសអង់គ្លេសមួយដែរ។
យ៉ាងណាមិញ សម្រាប់ទួរគី ក្រោមការដឹកនាំរបស់ប្រធានាធិបតី Tayyip Erdogan ក៏បានថ្កោលទោសរុស្ស៊ីខ្លាំងក្លាដែរ។ សម្រាប់ទួរគី ក៏មិនចង់ឃើញទឹកដីអ៊ុយក្រែន បន្តធ្លាក់នៅក្រោមរុស្ស៊ី ទៀតនោះទេ។ បុព្វហេតុនេះហើយដែលនាំឱ្យលោក Erdogan ស្នើសុំធ្វើជាអ្នកសម្របសម្រួលបើមានជំនួបរវាងប្រធានាធិបតីរុស្ស៊ី Vladimir Putin និងប្រធានាធិបតីអ៊ុយក្រែន Volodymyr Zelensky នៅលើទឹកដីទួរគី៕