រដ្ឋមន្ត្រីក្រសួងមហាផ្ទៃ លោក ស ខេង ប្រកាសថា ក្រសួងបានស្នើទៅរដ្ឋាភិបាលសុំធ្វើសេចក្ដីព្រាងច្បាប់ថ្មីមួយសម្រាប់គ្រប់គ្រងសារធាតុគីមីផ្សំដែលនាំចូលមកកម្ពុជា ដើម្បីទប់ស្កាត់កុំឱ្យមានការលួចកែច្នៃសារធាតុគីមីទាំងនោះទៅជា «គ្រឿងញៀន» ក្នុងប្រទេសកម្ពុជា។
ការស្នើរបស់លោក ស ខេង បានធ្វើឡើងបន្ទាប់ពីសមត្ថកិច្ចបានបង្ក្រាប និងរឹបអូសបានសារធាតុគីមីដែលយកមកកែច្នៃ ដើម្បីផលិតជាគ្រឿងញៀនជាច្រើនតោននាពេលថ្មីៗនេះ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាមួយនៅស្រុកអង្គស្នួល ខេត្តកណ្ដាល កាលពីថ្ងៃទី២៣ ខែកក្កដា រដ្ឋមន្ត្រីក្រសួងមហាផ្ទៃ លោក ស ខេង ឱ្យដឹងថា ការមានច្បាប់មួយសម្រាប់គ្រប់គ្រងសារធាតុគីមីនាំចូលកម្ពុជានេះ នឹងជួយទប់ស្កាត់ការចរាចរសារធាតុគីមីផ្សំដែលអាចយកមកកែច្នៃដើម្បីផ្សំធ្វើជាគ្រឿងញៀននៅប្រទេសកម្ពុជា។
លោកថា បញ្ហាគ្រឿងញៀននេះមានជាប់ពាក់ព័ន្ធនឹងបទល្មើសសម្អាតប្រាក់ អំពើភេរវកម្ម និងការរីកសាយភាយអាវុធមហាប្រល័យផងដែរ។
លោក ស ខេង បានសង្កត់ធ្ងន់អំពីបញ្ហាគ្រឿងញៀននៅកម្ពុជានាពេលបច្ចុប្បន្ន កំពុងមានកំណើនខ្លាំងចេញពីការកែច្នៃដោយសមាសធាតុគីមីផ្សេងៗកាន់តែច្រើន ខណៈសញ្ញានៃការចរាចរគ្រឿងញៀននៅតាមខេត្តនានានៅក្នុងប្រទេសកម្ពុជា សមត្ថកិច្ចបានបង្ក្រាបច្រើនទាំងនៅក្នុងឃ្លាំងផង និងក្នុងរោងចក្រផង។
ករណីនេះ លោកស្នើឲ្យភាគីពាក់ព័ន្ធ ជាពិសេសឪពុកម្ដាយ ឬអាណាព្យាបាល ត្រូវមានការចូលរួមសហការ និងប្រយុទ្ធប្រឆាំងគ្រឿងញៀន ដើម្បីកុំឲ្យគ្រឿងញៀនវាយលុកក្នុងសហគមន៍ដែលធ្វើឲ្យកម្ពុជាជួបបញ្ហាកាន់តែអាក្រក់បន្ថែមទៀត។
កាលពីថ្ងៃទី២២ ខែមីនា រដ្ឋមន្ត្រីក្រសួងមហាផ្ទៃ លោក ស ខេង បានចេញបញ្ជាផ្ទាល់មាត់ឱ្យស្ថាប័នពាក់ព័ន្ធស្វែងរកអ្នកទទួលខុសត្រូវចំពោះការអនុញ្ញាតឱ្យក្រុមហ៊ុនមួយនាំចូលសារធាតុផ្សំជាគ្រឿងញៀនជាង ១០០តោនចូលមកកម្ពុជា។
ការបញ្ជានេះ បន្ទាប់ពីសមត្ថកិច្ចចុះបង្ក្រាបទីតាំងផលិតគ្រឿងញៀននៅក្រុមហ៊ុនចិនមួយឈ្មោះ «ស៊ិនយីងហ្វេង» នៅខេត្តកំពង់ស្ពឺ ដែលបាននាំសារធាតុគីមីផ្សំជាគ្រឿងញៀនជាង ១០០តោនចូលមកកម្ពុជា។ ការនាំចូលនោះ ក្រុមហ៊ុនទទួលបានអាជ្ញាប័ណ្ណនាំចូលមុខទំនិញចំនួន ៤មុខ ប៉ុន្តែបាននាំចូលដល់ទៅ ៨មុខ។
ក្រោយពីមានការបង្ក្រាបទ្រង់ទ្រាយធំនៅខេត្តកំពង់ស្ពឺ នោះ នៅថ្ងៃទី៧ ខែកក្កដា ឆ្នាំ២០២២ នេះ សមត្ថកិច្ចបង្ក្រាបកន្លែងកែច្នៃ និងផលិតគ្រឿងញៀននៅរាជធានីភ្នំពេញ និងខេត្តស្វាយរៀង ព្រៃវែង និងខេត្តកណ្តាល ដោយរឹបអូសបានសារធាតុញៀនជិត ២០០តោន និងសារធាតុគីមីជិត ៣០០តោនបន្ថែមទៀតផងដែរ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង ថ្លែងថា ចំពោះករណីគ្រឿងញៀននេះ គឺជាបញ្ហាដ៏ធំមួយក្នុងសង្គមដែលបង្កផលប៉ះពាល់យ៉ាងធ្ងន់ធ្ងរទៅថ្ងៃអនាគត។ បន្ថែមពីនេះ វាក៏ជាកង្វល់មួយពាក់ព័ន្ធនឹងការលាងលុយដែលបានពីគ្រឿងញៀននេះដែរ ខណៈអន្តរជាតិកំពុងប្រយុទ្ធប្រឆាំងលើបញ្ហានេះថែមទៀត។
លោកអះអាងថា នៅកម្ពុជាមានកុមារ និងយុវជនជាច្រើនរងគ្រោះដោយសារគ្រឿងញៀន ដែលទាមទារឱ្យរដ្ឋាភិបាលត្រូវចាត់វិធានការឱ្យមានប្រសិទ្ធភាព។ លោកថា ដើម្បីទប់ស្កាត់បញ្ហាគ្រឿងញៀននេះ រដ្ឋាភិបាលត្រូវអប់រំដល់ពលរដ្ឋឱ្យចេះកំណត់ និងដឹងពីសញ្ញាណនៃគ្រឿងញៀន ហើយអាជ្ញាធរត្រូវពង្រឹងការអនុវត្តច្បាប់បន្ថែមទៀត ជាពិសេសត្រូវរកអ្នកពាក់ព័ន្ធ ឬជននៅពីក្រោយខ្នងដើម្បីយកមកផ្ដន្ទាទោស៕