អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លើកឡើងថា ក្នុងរយៈពេល ៧ខែឆ្នាំ២០២២ នេះ អាជ្ញាធរកម្ពុជាបានបង្ក្រាបអំពើជួញដូរមនុស្សបាន ៧៤ករណី និងជួយសង្គ្រោះមនុស្សបានជាង ៦០០នាក់។
រដ្ឋលេខាធិការក្រសួងមហាផ្ទៃ អ្នកស្រី ជូ ប៊ុនអេង បានលើកឡើងក្រោយកិច្ចប្រជុំពិភាក្សាអំពីការព្រួយបារម្ភរបស់អង្គការសហប្រជាជាតិ ចំពោះការកើនឡើងនូវបញ្ហាជួញដូរមនុស្សនៅកម្ពុជារវាងគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស និងតំណាងអង្គការសហប្រជាជាតិនៅកម្ពុជា កាលពីថ្ងៃទី២២ ខែសីហា ឆ្នាំ២០២២ ថា រយៈពេល ៧ខែក្នុងឆ្នាំ២០២២ នេះ អាជ្ញាធរកម្ពុជាបានបង្ក្រាបអំពើជួញដូរមនុស្សត្រឹមតែ ៧៤ករណីប៉ុណ្ណោះ។
មន្ត្រីជំនាញប្រយុទ្ធប្រឆាំងអំពើជួញដូរមនុស្សរូបនេះលើកឡើងថា ក្នុងការបង្ក្រាបនេះ អាជ្ញាធរកម្ពុជាបានចាប់ខ្លួនជនជាតិចិន ម៉ាឡេស៊ី វៀតណាម និងជនជាតិខ្មែរចំនួន ៦០នាក់ បញ្ជូនទៅតុលាការ ដោយសង្ស័យជាប់ពាក់ព័ន្ធនឹងអំពើជួញដូរមនុស្សខុសច្បាប់ ក្នុងនោះអាជ្ញាធរសង្គ្រោះមនុស្សបានជាង ៦០០នាក់ មាន ១១សញ្ជាតិ ប៉ុន្តែមិនមានជនជាតិចិនតៃវ៉ាន់នោះទេ។
ប្រភពដដែលបញ្ជាក់ថា អាជ្ញាធរជំនាញកម្ពុជាមិនដែលជួបករណីជនជាតិចិនតៃវ៉ាន់រងគ្រោះដោយសារការជួញដូរនៅកម្ពុជានោះឡើយនាពេលកន្លងមក ដែលផ្ទុយពីការចុះផ្សាយរបស់សារព័ត៌មានអន្តរជាតិខ្លះដែលបានអះអាងថា មានករណីជួញដូរជនជាតិចិនតៃវ៉ាន់ដល់ទៅរាប់ពាន់នាក់នៅកម្ពុជាសព្វថ្ងៃនេះ។
កាលពីថ្ងៃទី២០ ខែសីហា ឆ្នាំ២០២២ សារព័ត៌មាន Taipei Times បានចុះផ្សាយថា នគរបាលក្រុងតៃប៉ិ នៃកោះតៃវ៉ាន់ កាលពីពាក់កណ្តាលខែសីហា ឆ្នាំ២០២២ នេះ បានសន្និដ្ឋានថា មានជនជាតិចិនតៃវ៉ាន់ចន្លោះពី ២ពាន់នាក់ទៅ ៥ពាន់នាក់ ត្រូវបានរងគ្រោះដោយសារអំពើជួញដូរនៅក្នុងប្រទេសកម្ពុជា ក្នុងនោះជនជាតិចិនតៃវ៉ាន់ដែលត្រូវបានជួយសង្គ្រោះពីការឃុំឃាំងនៅកម្ពុជា បានអះអាងថា ពួកគេបានរងការវាយធ្វើបាបតាមមធ្យោបាយផ្សេងៗដោយអ្នកជួញដូរមនុស្សនៅក្នុងសណ្ឋាគារមួយចំនួនក្នុងខេត្តព្រះសីហនុ។
ប្រភពដដែលអះអាងថា មានមនុស្សចំនួន ១៦នាក់ ត្រូវបានចាប់ខ្លួនដោយនគរបាលដាក់ការសង្ស័យថា ពួកគេរួមគំនិតជាមួយអង្គការឧក្រិដ្ឋកម្មបរទេស ដើម្បីទាក់ទាញប្រជាជនកោះតៃវ៉ាន់ទៅធ្វើការនៅប្រទេសកម្ពុជា តាមរយៈការសន្យាផ្តល់ឲ្យនូវប្រាក់ខែខ្ពស់ ជាដើម។
ទាក់ទិននឹងបញ្ហានេះ ក្រសួងការបរទេសអាមេរិក កាលពីថ្ងៃទី១៩ ខែកក្កដា បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្ស ដោយទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ ដែលធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្ស និងអាចបណ្តាលឱ្យមានការរឹតត្បិតលើជំនួយបរទេសចំពោះកម្ពុជាថែមទៀត។
ទាក់ទិននឹងការជួញដូរមនុស្សនេះ សារព័ត៌មាន The Australian បានចេញផ្សាយក្នុងរយៈពេលប៉ុន្មានថ្ងៃកន្លងទៅនេះថា កម្ពុជាកំពុងរងនូវការសង្ស័យថាកំពុងប្រព្រឹត្តអំពើជួញដូរមនុស្សយ៉ាងធំ ដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន ដោយជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់លោក ហ៊ុន សែន គឺលោក ហ៊ុន តូ៕