នៅថ្ងៃពុធ ទី៥ តុលា នេះ ប្រធានាធិបតីរុស្ស៊ី វ្ល៉ាឌីមៀរ ពូទីន បានសម្រេចជាផ្លូវការនូវការបញ្ចូលទឹកដីដែលមានទំហំជិត ១៥% របស់ប្រទេសអ៊ុយក្រែន មកក្រោមដែនអធិបតេយ្យរបស់ខ្លួន ស្របពេលដែលកងកម្លាំងអ៊ុយក្រែន កំពុងសម្រុកវាយបកយ៉ាងខ្លាំងទាំងនៅភាគខាងត្បូង និងនៅភាគខាងកើតអ៊ុយក្រែន។
ទីភ្នាក់ងារសារព័ត៌មាន AFP នៅថ្ងៃពុធ ទី៥ ខែតុលា ឲ្យដឹងថា លោក ពូទីន បានចុះហត្ថលេខាលើសេចក្តីព្រាងច្បាប់ចំនួន៤ ស្ដីពីការទទួលយកតំបន់ Donetsk តំបន់ Luhansk នៅភាគខាងកើត តំបន់ Kherson និងតំបន់ Zaporizhzhia នៅភាគខាងត្បូងប្រទេសអ៊ុយក្រែន ឲ្យក្លាយជាផ្នែកមួយនៃទឹកដីរបស់រុស្ស៊ី ដែលធ្វើឡើងបន្ទាប់ពីសេចក្តីព្រាងច្បាប់នេះត្រូវបានសភារបស់រុស្ស៊ី ផ្តល់សច្ចាប័នកាលពីថ្ងៃទី៤ ខែតុលា។
ការប្រកាសកាត់បញ្ចូលទឹកដីទាំង ៤តំបន់នេះ ធ្វើឡើងបន្ទាប់ពីការបោះឆ្នោតប្រជាមតិផ្ដាច់ខ្លួនបានប្រព្រឹត្តទៅកាលពីចន្លោះថ្ងៃទី២៣ ដល់ថ្ងៃទី២៧ ខែកញ្ញា ធ្វើឡើងស្ថិតនៅក្រោមការត្រួតត្រារបស់កងទ័ពរុស្ស៊ី ដែលវាយយកបានពីទ័ពអ៊ុយក្រែន។
ទោះជាបែបនេះក្ដី ក្រុមបស្ចិមប្រទេស រួមទាំងអគ្គលេខាធិការអង្គការសហប្រជាជាតិពុំទទួលស្គាល់ដែនដី ៤តំបន់នេះថាជារបស់ប្រទេសរុស្ស៊ី នោះទេ។ ចំណែកប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានថ្លែងថា តំបន់ដែលរុស្ស៊ីប្រកាសកាត់យកទាំងនេះមិនមែនសុទ្ធតែស្ថិតនៅក្រោមការគ្រប់គ្រងរបស់កងទ័ពរុស្ស៊ីទាំងស្រុងនោះទេ។
លោកបន្តថា ទោះជារុស្ស៊ីមានច្បាប់យកទឹកដីប្រទេសគេក៏ដោយ ក៏វានៅតែជាទឹកដីអ៊ុយក្រែនដែលចាំបាច់ត្រូវវាយរំដោះយកមកវិញឲ្យបាន។
កាលពីថ្ងៃទី៤ តុលា ក្រសួងការពារជាតិរុស្ស៊ី បានបង្ហាញផែនទីអំពីទីតាំងដែលទ័ពរុស្ស៊ី ដកថយយ៉ាងឆាប់រហ័សចេញពីតំបន់នៅភាគខាងត្បូង និងភាគខាងកើតអ៊ុយក្រែន ជាទីដែលទ័ពមហាអំណាចមួយនេះមិនអាចស្ថិតក្រោមសម្ពាធដ៏ខ្លាំងពីការវាយបករបស់អ៊ុយក្រែន។
ជាមួយគ្នានេះ ទីភ្នាក់ងារសារព័ត៌មានដដែលនេះបានស្រង់សម្ដីប្រធានាធិបតីអ៊ុយក្រែន លោក ហ្សេឡេនស្គី ដែលបានអះអាងថា កងទ័ពអ៊ុយក្រែនបានរុលទៅមុខយ៉ាងឆាប់រហ័សវាយសន្ធប់ទៅលើកងទ័ពរុស្ស៊ី ដោយដណ្តើមយកមកវិញនូវទីក្រុងមួយចំនួននៅក្នុងតំបន់នៅភាគខាងត្បូង និងខាងកើត ដែលរុស្ស៊ីទើបបានប្រកាសដាក់បញ្ចូលជាឧបសម្ពន្ធនៅក្រោមដែនអធិបតេយ្យរបស់ខ្លួន។
ថ្លែងតាមវីដេអូនៅយប់ថ្ងៃអង្គារ លោក ហ្សេឡេនស្គី បានបញ្ជាក់ថា៖ «ក្នុងមួយសប្ដាហ៍មកនេះ ចាប់តាំងពីការបោះឆ្នោតប្រជាមតិរបស់រុស្ស៊ី គឺទីក្រុងមួយចំនួនត្រូវបានរំដោះមកវិញ»។
ស្របពេលជាមួយគ្នានេះ ក្រសួងការពារជាតិអ៊ុយក្រែន ក៏បានចេញផ្សាយនូវវីដេអូមួយចំនួនដែលបង្ហាញទង់ជាតិអ៊ុយក្រែន នៅលើភូមិមួយនៃស្រុក Davydiv Brid នៃតំបន់ Kherson។
បើនិយាយអំពីសម្ពន្ធភាពដែលជួយសព្វាវុធ និងជំនួយផ្សេងៗទៅឱ្យកងទ័ពអ៊ុយក្រែន គឺមាន ១០ប្រទេស ក្នុងនោះសហរដ្ឋអាមេរិកឈានមុខគេ។
ក្នុងរយៈពេលជិត ៨ខែមកនេះ ក្រុងវ៉ាស៊ីនតោន នៃរដ្ឋការលោក ចូ បៃដិន បានបញ្ចេញកញ្ចប់ជំនួយយោធាដែលមានសាច់ប្រាក់សុទ្ធទៅឲ្យរដ្ឋាភិបាលរបស់លោក ហ្សេឡេនស្គី យកទៅបើកឲ្យកងទ័ព និងរដ្ឋការស៊ីវិលចំនួនជិត ១៧ពាន់លានដុល្លារ។ អាវុធដែលមានប្រសិទ្ធភាពក្នុងការវាយរុញច្រានកងទ័ពរុស្ស៊ី ឲ្យបាក់ទ័ព គឺប្រព័ន្ធមីស៊ីល HIMARS ដែលជាអាវុធពហុមុខងារ។
ប្រធានាធិបតីសហរដ្ឋអាមេរិក លោក ចូ បៃដិន ប្រាប់សមភាគីអ៊ុយក្រែន លោក វ៉ូឡូឌីមៀ ហ្សេឡេនស្គី ថា ទីក្រុងវ៉ាស៊ីនតោននឹងផ្ដល់ជំនួយយោធាបន្ថែមទៀតមានទំហំទឹកប្រាក់ ៦២៥លានដុល្លារដល់ទីក្រុងគៀវ ក្នុងនោះរួមមានទាំងប្រព័ន្ធមីស៊ីល HIMARS ផងដែរ។
សេចក្ដីថ្លែងការណ៍របស់សេតវិមាន បានឱ្យដឹងថា លោក បៃដិន បានសន្យាដូចនេះនៅក្នុងកិច្ចសន្ទនាតាមទូរស័ព្ទជាមួយលោក ហ្សេឡេនស្គី កាលពីថ្ងៃអង្គារ។
បើតាមសេចក្ដីថ្លែងការណ៍នេះ លោក បៃដិន ក៏បានសន្យាទៀតថា នឹងបន្តគាំទ្រអ៊ុយក្រែននៅក្នុងការការពារខ្លួនប្រឆាំងនឹងការឈ្លានពានពីសំណាក់រុស្ស៊ី ដរាបណាសង្គ្រាមនៅតែបន្តកើតឡើង។
ចំណែកឯក្រសួងការបរទេសអាមេរិក បានបញ្ជាក់ថា កញ្ចប់យោធាដែលនឹងផ្ដល់ឱ្យអ៊ុយក្រែន ក្នុងនោះរួមមានប្រព័ន្ធមីស៊ីល HIMARS ៤គ្រឿង កាំភ្លើងធំ Howitzers ចំនួន ៣២គ្រឿង ជាមួយនឹងគ្រាប់ចំនួន ៧ម៉ឺន ៥ពាន់គ្រាប់ និងរថពាសដែកប្រភេទ MRAP ចំនួន ២០០គ្រឿង រួមទាំងឧបករណ៍ប្រឆាំងគ្រាប់មីន។
ជាមួយនឹងក្ដីសង្ឃឹមថាអ៊ុយក្រែនកំពុងស្ថិតលើផ្លូវឆ្ពោះទៅរកការសម្រេចគោលដៅនៃការវាយបកលើកងទ័ពរុស្ស៊ី មន្ត្រីជាន់ខ្ពស់ម្នាក់នៃមន្ទីរប៉ុងតាហ្គោន បានអះអាងថា កងទ័ពអ៊ុយក្រែនកំពុងស្ថិតនៅលើផ្លូវដើម្បីសម្រេចបាននូវគោលដៅសមរភូមិសំខាន់ៗមួយចំនួនទៀត។
អ្នកស្រី Celeste Wallander ជំនួយការរដ្ឋមន្ត្រីការពារជាតិអាមេរិកទទួលបន្ទុកកិច្ចការសន្តិសុខអន្តរជាតិ បានថ្លែងដូចនេះចំពេលដែលកងកម្លាំងអ៊ុយក្រែន កំពុងស្ថិតនៅក្នុងសមរភូមិនៅក្នុងតំបន់ភាគខាងត្បូង ដោយបានវាយរុលទៅមុខយ៉ាងលឿនតាមដងទន្លេ Dnipro បន្ទាប់ពីវាយបំបែកខ្សែត្រៀមជួរមុខរបស់កងទ័ពរុស្ស៊ីនៅក្នុងតំបន់មួយចំនួននៃតំបន់ Kherson។
អ្នកស្រី វ៉ាឡេឌឺ បានថ្លែងនៅឯមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ នៅទីក្រុងវ៉ាស៊ីនតោន កាលពីថ្ងៃចន្ទ។ អ្នកស្រីបញ្ជាក់ថា៖ «អ៊ុយក្រែនកំពុងស្ថិតនៅលើផ្លូវដើម្បីសម្រេចបាននូវគោលដៅយុទ្ធសាស្ត្ររបស់ខ្លួន»។
ការវាយដណ្តើមបានមកវិញនូវទីក្រុង Lyman បានធ្វើឱ្យប៉ះពាល់យ៉ាងខ្លាំងដល់សមត្ថភាព និងយុទ្ធសាស្ត្រឈ្លានពានរបស់រុស្ស៊ី ក្រោមការដឹកនាំរបស់លោក ពូទីន។ ដំណើរការវាយបករបស់កងទ័ពអ៊ុយក្រែន បានកំពុងទាញសញ្ញាថា អ៊ុយក្រែននឹងអាចវាយយកបានកាន់តែច្រើនថែមទៀតនូវតំបន់យុទ្ធសាស្ត្ររបស់រុស្ស៊ី ហើយនឹងនាំឱ្យរុស្ស៊ីបាក់ទ័ពធ្ងន់ធ្ងរបន្ថែមទៀត៕