នៅថ្ងៃចន្ទ ទី១០ ខែតុលា នេះ ហេតុការណ៍ផ្ទុះបន្តបន្ទាប់ដែលជាការវាយប្រហារដោយគ្រាប់មីស៊ីល បានកើតមានឡើងនៅរដ្ឋធានីគៀវ រួមទាំងទីក្រុងមួយចំនួនទៀតនៃប្រទេសអ៊ុយក្រែន បន្ទាប់ពីទីក្រុងមូស្គូ ចោទអ៊ុយក្រែន ថាជាអ្នកនៅពីក្រោយហេតុការណ៍វាយប្រហារបំផ្ទុះគ្រាប់បែកបំបាក់ស្ពានគ្រីមៀ កាលពីព្រឹកថ្ងៃសៅរ៍ ចុងសប្តាហ៍កន្លងទៅនេះ។ នេះបើតាមការចេញផ្សាយដោយទីភ្នាក់ងារសារព័ត៌មានបារាំង AFP នៅថ្ងៃចន្ទ ទី១០ ខែតុលា នេះ។
បញ្ជាការកណ្ដាលកងទ័ពអ៊ុយក្រែន បានឱ្យដឹងថា គិតមកត្រឹមព្រឹកថ្ងៃចន្ទនេះ រុស្ស៊ីបានបាញ់មីស៊ីលយ៉ាងតិចណាស់ ៧៥គ្រាប់មកលើទឹកដីអ៊ុយក្រែន រួមទាំងរដ្ឋធានីគៀវ។
លោកឧត្តមសេនីយ៍អ៊ុយក្រែន Valeriy Zaluzhny អគ្គមេបញ្ជាការកងទ័ពអ៊ុយក្រែន បានបញ្ជាក់លើបណ្ដាញសង្គមដោយចោទបករុស្ស៊ីវិញថា ប្រទេសភេរវករ គឺរុស្ស៊ីបានបើកការវាយប្រហារមីស៊ីលយ៉ាងសម្បើមមកលើទឹកដីរបស់អ៊ុយក្រែន ក្នុងនោះរួមមានទាំងការប្រើប្រាស់យន្តហោះដ្រូន ហើយពួកឈ្លានពានបានបាញ់មីស៊ីលយ៉ាងតិច ៧៥គ្រាប់ គឺក្នុងនោះ ៤១គ្រាប់ត្រូវបានប្រព័ន្ធការពារដែនអាកាសអ៊ុយក្រែនបាញ់ទម្លាក់។
ស្នូរផ្ទុះបន្តបន្ទាប់ត្រូវបានរាយការណ៍នៅរដ្ឋធានីគៀវ នៅទីក្រុង Lviv ទីក្រុង Dnipro ទីក្រុង Zaporizhzhia និងទីក្រុងជាច្រើនទៀត។
ជំនួយការរដ្ឋមន្ត្រីមហាផ្ទៃអ៊ុយក្រែន លោក Rostyslav Smyrnov បាននិយាយថា ជនស៊ីវិលចំនួន ៨នាក់បានស្លាប់ និង ២៤នាក់រងរបួស ក្រោយពីការវាយប្រហារដោយមីស៊ីលរបស់រុស្ស៊ីលើទីក្រុងគៀវ នៅព្រឹកថ្ងៃចន្ទនេះ។
តាមបណ្ដាញសង្គមហ្វេសប៊ុក លោក Smyrnov បានឱ្យដឹងថា រថយន្តចំនួន ៦គ្រឿងបានឆាបឆេះបន្ទាប់ពីការវាយប្រហារ ហើយរថយន្តជាង ១៥គ្រឿងរងការខូចខាត។
នៅពេលជាមួយគ្នានេះ ប្រជាជនរាប់ពាន់នាក់នៅទីក្រុងគៀវ នាំគ្នារត់ទៅជ្រកកោននៅតាមស្ថានីយរថភ្លើងក្រោមដី ដើម្បីគេចពីការវាយប្រហារ។
ទីប្រឹក្សាក្រសួងមហាផ្ទៃអ៊ុយក្រែន លោក Anton Gerashchenko បានឱ្យដឹងថា ការវាយប្រហារដោយមីស៊ីលដ៏សម្បើមនេះ បានបណ្ដាលឱ្យប្រជាជនរាប់ពាន់នាក់ដែលរស់នៅក្នុងទីក្រុងគៀវ បាននាំគ្នារត់ជ្រកក្នុងរូងផ្លូវរថភ្លើងក្រោមដីដើម្បីសុវត្ថិភាព។ លោកថា នៅខណៈនោះ សារ៉ែនប្រកាសអាសន្នឱ្យប្រុងប្រយ័ត្នអំពីការវាយប្រហារតាមផ្លូវអាកាស ត្រូវបានបន្លឺឡើងពាសពេញប្រទេសអ៊ុយក្រែន។
ហេតុការណ៍ផ្ទុះបន្តបន្ទាប់នៅតាមទីក្រុងរបស់អ៊ុយក្រែន នេះ ត្រូវគេសង្កេតឃើញថា កើតមានឡើងតែមួយថ្ងៃប៉ុណ្ណោះបន្ទាប់ពីរុស្ស៊ី បានចោទអ៊ុយក្រែនថាជាអ្នកនៅពីក្រោយករណីបំផ្ទុះស្ពានគ្រីមៀ ដែលលោក ពូទីន ហៅវាថាជាអំពើភេរវកម្ម។
ក្នុងសារជាវីដេអូមួយកាលពីថ្ងៃអាទិត្យ លោក ពូទីន បានចោទអ៊ុយក្រែនថាគ្មានអ្វីត្រូវសង្ស័យទៀតនោះទេ។ នេះគឺជាអំពើភេរវកម្មដែលមានគោលដៅបំផ្លិចបំផ្លាញហេដ្ឋារចនាសម្ព័ន្ធស៊ីវិលសំខាន់ៗបំផុតរបស់រុស្ស៊ី។ លោកថា សកម្មភាពនេះត្រូវបានរៀបចំ ប្រព្រឹត្ត និងបញ្ជាដោយទីភ្នាក់ងារស៊ើបការណ៍សម្ងាត់ និងសន្តិសុខជាតិរបស់អ៊ុយក្រែន។
លោក ពូទីន បានថ្លែងចោទទៅលើប្រទេសអ៊ុយក្រែនដូចនេះ ក៏ស្របពេលដែលរូបលោកបើកកិច្ចប្រជុំក្រុមប្រឹក្សាសន្តិសុខនៅថ្ងៃទី១០ តុលា នេះ ជុំវិញហេតុការណ៍នៅស្ពានគ្រីមៀ។
ចំណែកអតីតប្រធានាធិបតីរុស្ស៊ី លោក Dmitry Medvedev ដែលជាអនុប្រធានក្រុមប្រឹក្សាសន្តិសុខជាតិបន្ទាប់ពីលោក ពូទីន បានព្រមានថា ការឆ្លើយតបតែមួយគត់របស់រុស្ស៊ី ចំពោះបទឧក្រិដ្ឋនេះ គឺសម្លាប់ពួកភេរវករផ្ទាល់តែម្តង។
ស្ពានគ្រីមៀ នេះ តភ្ជាប់ទឹកដីគ្រីមៀ មកដែនដីប្រទេសរុស្ស៊ី មានបណ្ដោយ ១៩គីឡូម៉ែត្រ ដែលរងការបំផ្ទុះគ្រាប់បែកបណ្ដាលឱ្យបាក់ស្ពានមួយចំហៀង ហើយស្ពានមួយទៀតបានឆេះខ្លោចដោយសាររងនូវការវាយប្រហារទៅលើរថភ្លើងស៊ីទែនដឹកប្រេងមួយខ្សែលើស្ពាននេះ ដែលបណ្តាលឲ្យឆាបឆេះយ៉ាងសន្ធោសន្ធៅ។
ស្ពានដ៏វែងជាងគេនៅអឺរ៉ុបមួយនេះ ត្រូវរដ្ឋាភិបាលលោក ពូទីន ស្ថាបនាហើយដាក់ឱ្យដំណើរការនៅឆ្នាំ២០១៨ ដោយចំណាយថវិកា ៣៦០០លានដុល្លារ។ ស្ពាននេះជាមធ្យោបាយផ្គត់ផ្គង់យ៉ាងសំខាន់សម្រាប់កងកម្លាំងរបស់រុស្ស៊ីនៅភាគខាងត្បូងអ៊ុយក្រែន។
តែយ៉ាងណា តំបន់គ្រីមៀ គឺជាដែនដីអ៊ុយក្រែន ដែលរុស្ស៊ីយកបានតាមរយៈការបោះឆ្នោតផ្ដាច់ខ្លួននៅខែមីនា ឆ្នាំ២០១៤ ក្រោមការចុះហត្ថលេខាយល់ព្រមឱ្យមានបោះឆ្នោតប្រជាមតិដោយប្រធានាធិបតី វិចទ័រ យ៉ាណាកូវិច របស់អ៊ុយក្រែន នាពេលនោះ។
បច្ចុប្បន្ន អតីតប្រធានាធិបតីអ៊ុយក្រែនម្នាក់នេះបានរត់ទៅនៅប្រទេសរុស្ស៊ី គឺតែប៉ុន្មានសប្ដាហ៍ប៉ុណ្ណោះក្រោយពីតុលាការរបស់ប្រជាជនអ៊ុយក្រែន កាត់ទោសលោកពីអំពើក្បត់ជាតិ ព្រោះតែបានកាត់ទឹកដីរបស់ជាតិសាសន៍ខ្លួនឯងឱ្យប្រទេសរុស្ស៊ី ជាចៅហ្វាយនាយរបស់ខ្លួន។
ចំពោះការវាយប្រហារដោយគ្រាប់មីស៊ីល ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានចោទថា រុស្ស៊ីកំពុងព្យាយាមបំផ្លាញប្រទេសរបស់លោកឱ្យបាត់ចេញពីផែនដី។
តាមបណ្ដាញសង្គមតេឡេក្រាម លោក ហ្សេឡេនស្គី បានថ្លែងដូចនេះថា «រុស្ស៊ីកំពុងព្យាយាមបំផ្លាញអ៊ុយក្រែន ហើយលុបប្រទេសនេះចេញពីផែនទីពិភពលោក។ រុស្ស៊ីបានសម្លាប់ប្រជាជនអ៊ុយក្រែនដែលកំពុងស្នាក់នៅក្នុងផ្ទះ និងប្រជាជនដែលកំពុងបំពេញការងារក្នុងទីក្រុងគៀវ ឬនៅតាមទីក្រុងផ្សេងៗទៀត»។
បើតាមលោក ហ្សេឡេនស្គី ឲ្យដឹងថា នៅពេលនេះ សំឡេងសារ៉ែននៅតែប្រកាសអាសន្នឱ្យប្រុងប្រយ័ត្នពីការវាយប្រហារតាមអាកាសនៅទូទាំងប្រទេស ព្រោះរុស្ស៊ីមិនទាន់បញ្ឈប់នូវការបាញ់មីស៊ីលសម្លាប់ប្រជាជនអ៊ុយក្រែននៅឡើយទេ៕