លោក គឹម សុខ ថាប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បញ្ជាឱ្យលោកគ្រូអ្នកគ្រូតាមសាលាវិទ្យាល័យមួយចំនួនស្រង់ឈ្មោះសិស្សដែលព្រមចូលជាសមាជិកសហជីពរបស់ខ្លួន ដើម្បីបញ្ជូនទៅក្រសួងអប់រំ ជួយសម្រួលលទ្ធផលនៃការប្រឡង។ មតិខ្លះថាវិធីនេះឆ្លុះបញ្ចាំងអំពីល្បិចទុច្ចរិត។
ប្រធានវេទិកាពលរដ្ឋ លោក គឹម សុខ បានចេញខ្សែវីដេអូជិត ៥នាទីមុនថ្ងៃប្រឡងសញ្ញាបត្រមធ្យមសិក្សាទុតិយភូមិមួយថ្ងៃថា លោកទទួលបានព័ត៌មានពីលោកគ្រូអ្នកគ្រូតាមសាលាវិទ្យាល័យមួយចំនួនដែលគួរឱ្យទុកចិត្តបាន ដោយអះអាងថា លោក ហ៊ុន ម៉ានី បានបង្ខំឱ្យពួកគេស្រង់ឈ្មោះសិស្សដែលជាសមាជិកសហភាពសហព័ន្ធយុវជនកម្ពុជាដែលជាសហជីពមួយ និងសិស្សដែលបារម្ភខ្លាចធ្លាក់ពីការប្រឡងនេះ ហើយព្រមចូលជាសមាជិករបស់ខ្លួន ត្រូវបញ្ជូនឈ្មោះពួកគេទៅក្រសួងអប់រំ យុវជន និងកីឡាជាបន្ទាន់ឱ្យបានមុនការប្រឡងមកដល់ ដើម្បីឱ្យក្រសួងចាត់ចែងលទ្ធផល ប្រសិនបើអ្នកទាំងនោះធ្លាក់ពីការប្រឡងនេះ។
លោក គឹម សុខ រិះគន់ថា ប្រសិនបើលោក ហ៊ុន ម៉ានី ប្រើវិធីបែបនេះដើម្បីប្រមូលកម្លាំងយុវជនចងក្រងជាកម្លាំងនយោបាយរបស់ខ្លួនមែននោះ គឺជាវិធីដ៏អសីលធម៌បំផុត ព្រោះទង្វើនេះគឺជាកត្តាដែលនាំទៅរកការបំផ្លាញធនធានមនុស្ស និងជាការបំផ្លាញវិស័យអប់រំនៅប្រទេសកម្ពុជាយ៉ាងធ្ងន់ធ្ងរ ដែលនឹងឈានទៅរកការបំផ្លាញប្រទេសជាតិទាំងមូលនៅថ្ងៃអនាគតតែម្តង។
ប្រធានវេទិកាពលរដ្ឋរូបនេះបញ្ជាក់ថា ប្រទេសជាតិមួយដែលរឹងមាំ គឺជាប្រទេសដែលសម្បូរទៅដោយធនធានមនុស្សដែលមានគុណភាពពេញលេញ ជាពិសេសធនធានមនុស្សដែលពោរពេញដោយចំណេះដឹង ឆ្លងកាត់នូវការប្រឡងដោយសមត្ថភាពរបស់ខ្លួនដែលបានទទួលបាននូវការបណ្តុះបណ្តាលដោយពិតប្រាកដ ខណៈធនធានមនុស្សដែលទទួលបានលទ្ធផលល្អតាមរយៈសែស្រឡាយបក្ខពួក គឺជាធនធានដែលបំផ្លាញជាតិប៉ុណ្ណោះ ពីព្រោះពួកគេគ្មានសមត្ថភាពអភិវឌ្ឍប្រទេសជាតិនោះឡើយ។
នៅថ្ងៃទី៥ ខែធ្នូ ឆ្នាំ២០២២ នេះ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានសរសេរលើគណនីហ្វេសប៊ុករបស់ខ្លួន ដោយបដិសេធដាច់អហង្ការថា លោកមិនបានបញ្ជាឱ្យរៀបចំបញ្ជីរាយនាមសមាជិកសហភាពសហព័ន្ធយុវជនកម្ពុជា ដែលត្រូវប្រឡងបាក់ឌុបផ្ញើទៅក្រសួងអប់រំ យុវជន និងកីឡា នោះឡើយ។
លោក ហ៊ុន ម៉ានី បញ្ជាក់ថា ក្នុងនាមលោកជាពលរដ្ឋមួយរូបក៏ចង់ឃើញការរៀបចំការប្រឡងបាក់ឌុបមួយប្រកបដោយប្រសិទ្ធភាព និងតម្លាភាពខ្ពស់ដែរ ហើយលោកនឹងទទួលខុសត្រូវចំពោះមុខច្បាប់ ប្រសិនមានការប្រព្រឹត្តខុសឆ្គងណាមួយបំពានទៅលើច្បាប់ និងលិខិតបទដ្ឋាននានាពាក់ព័ន្ធការប្រឡងបាក់ឌុបនេះ។
ដំណើរការនៃការប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំសិក្សា២០២២-២០២៣ បានចាប់ផ្តើមដំណើរការទូទាំងប្រទេសចាប់ពីថ្ងៃទី៥ ដល់ថ្ងៃទី៦ ខែធ្នូ ឆ្នាំ២០២២ ដែលមានបេក្ខជនប្រឡងចំនួនជាង ១២ម៉ឺន ៨ពាន់នាក់ មណ្ឌលប្រឡងចំនួន ២២១មណ្ឌល ស្មើនឹង ៥១៧៤បន្ទប់ និងគណៈកម្មការនានាសរុបជាង ២ម៉ឺន ៧ពាន់នាក់ផងដែរ។
ជុំវិញបញ្ហានេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានប្រាប់អ្នកសារព័ត៌មានក្នុងសន្និសីទកាសែតជាមួយលោក ហ៊ុន ម៉ានី នៅមណ្ឌលប្រឡងវិទ្យាល័យព្រះស៊ីសុវត្ថិ នៅថ្ងៃទី៥ ខែធ្នូ ឆ្នាំ២០២២ ថា ក្នុងរយៈពេលប៉ុន្មានឆ្នាំចុងក្រោយនេះ សិស្សានុសិស្សគោរពវិន័យបានល្អដោយគ្មានការលួចលាក់សំណៅ ឬប្រ៊ុយយ៉ុងឡើយ ប៉ុន្តែក្នុងករណីរកឃើញថាបេក្ខជនណាម្នាក់ប្រព្រឹត្តផ្ទុយនឹងបទប្បញ្ញត្តិ និងកម្រិតវិន័យ ពួកគេនឹងត្រូវបានកំណត់ឱ្យធ្លាក់ដោយស្វ័យប្រវត្តិ។
សកម្មជនគណបក្សសង្គ្រោះជាតិ លោក ហ៊ុន កុសល បានសរសេរលើគណនីហ្វេសប៊ុករបស់ខ្លួននៅថ្ងៃទី៥ ធ្នូ នេះថា សហភាពសហព័ន្ធយុវជនកម្ពុជា ឬ ស.ស.យ.ក មិនជាប់ពាក់ព័ន្ធអ្វីសូម្បីតែបន្តិចជាមួយក្រសួងអប់រំ យុវជន និងកីឡា។ ផ្ទុយទៅវិញ សហភាពសហព័ន្ធយុវជនកម្ពុជានេះ គឺជាអង្គការចាត់តាំងមួយចំណុះឲ្យគណបក្សកាន់អំណាចទៅទៀត តែបែរជាយកមកប្រើប្រាស់ក្នុងសេវានៃវិស័យអប់រំទៅវិញ។
លោក ហ៊ុន កុសល លើកឡើងថា ការដឹកនាំរបស់រាជរដ្ឋាភិបាលសព្វថ្ងៃនេះ ត្រូវគេសង្កេតឃើញថា រដ្ឋាភិបាលតែងតែប្រើប្រព័ន្ធកុម្មុយនីស្តដឹកនាំស្ថាប័នជាតិគ្រប់ទម្រង់ទាំងអស់ ដែលពួកគេបានយកស្ថាប័នរដ្ឋជាកន្លែងរៀបចំអង្គការចាត់តាំងកម្លាំងនយោបាយគណបក្សគ្របដណ្ដប់លើស្ថាប័នជាតិ ដែលមិនចំណុះឲ្យគ្រប់គណបក្សនយោបាយ៕