រដ្ឋមន្ត្រីក្រសួងមហាផ្ទៃ លោក ស ខេង អះអាងថាកំពុងតាមដានលើករណីគ្រោះថ្នាក់ចរាចរណ៍នៅលើស្ពានជ្រោយចង្វារ និងមិនគាំទ្រឲ្យជនបង្កគ្រោះថ្នាក់ចរាចរណ៍ធ្ងន់ធ្ងរដល់អ្នកដទៃ ហើយបញ្ចប់បញ្ហាដោយការបង់ប្រាក់សំណងរួចផុតពីសំណាញ់ច្បាប់ឡើយ។
ថ្លែងក្រោយបិទបញ្ចប់ទិវាអន្តរជាតិរំឭកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៧ ប្រារព្ធនៅសួនច្បារមុខវត្តបទុមវតី រាជធានីភ្នំពេញ នាព្រឹកថ្ងៃទី៧ ធ្នូ លោក ស ខេង រដ្ឋមន្ត្រីក្រសួងមហាផ្ទៃ អះអាងថា លោកកំពុងតាមដានលើករណីជនបង្កគ្រោះថ្នាក់ចរាចរណ៍ធ្ងន់ធ្ងរដល់អ្នកដទៃ ហើយបញ្ចប់បញ្ហាដោយការបង់ប្រាក់សំណង។
លោក ស ខេង ឆ្លើយទៅកាន់អ្នកសារព័ត៌មានដោយអះអាងថា លោកគិតថាមិនមែនជារឿងទូទៅទេ កន្លែងខ្លះជាបុគ្គល។ លោកក៏ចង់ដឹងព័ត៌មានជាក់លាក់ដើម្បីចាត់វិធានការឱ្យបានសមស្របដែរ។ លោកមិនគាំទ្ររឿងអ៊ីចឹងនោះទេ។
ករណីគ្រោះថ្នាក់ចរាចរណ៍នៅលើស្ពានជ្រោយចង្វារ កាលពីថ្ងៃទី៥ ធ្នូ បណ្ដាលឲ្យមនុស្ស ៣នាក់រងរបួសធ្ងន់ ពិសេសកុមារមានអាយុប្រមាណ ១ខែ កំពុងសង្គ្រោះបន្ទាន់។ ករណីនេះ ភាគីបង្កហេតុ និងជនរងគ្រោះបានព្រមព្រៀងគ្នាដោះស្រាយសំណងក្រៅប្រព័ន្ធតុលាការ ក្នុងទឹកប្រាក់ ២៥០០ដុល្លារ។
ស្នងការដ្ឋានរាជធានីភ្នំពេញ បានរៀបរាប់លើហ្វេសប៊ុកពីករណីគ្រោះថ្នាក់ចរាចរណ៍នៅលើស្ពានជ្រោយចង្វារថា បុរសបើកបររថយន្តទំនើបនោះមានសារធាតុស្រវឹង ដោយអត្រាជាតិអាល់កុល ០,៥៣Mg/L។ ក្នុងគ្រោះថ្នាក់ចរាចរណ៍នេះ បង្កឲ្យបុរសបើកម៉ូតូ និងស្ត្រីជិះពីក្រោយ រួមជាមួយកូនតូចមានរបួសធ្ងន់ធ្ងរ ប៉ុន្តែករណីនេះ ភាគីទាំងអស់ព្រមព្រៀងគ្នាបញ្ចប់សំណងរដ្ឋប្បវេណីក្នុងទឹកប្រាក់ ២៥០០ដុល្លារ។ ជាមួយគ្នានេះដែរ ជនបង្កហេតុបានរងការពិន័យ ២លានរៀលពីបទបើកបរក្នុងស្ថានភាពស្រវឹង។
តែយ៉ាងណា ស្នងការដ្ឋានរាជធានីភ្នំពេញបានសរសេរលើហ្វេសប៊ុកថា សំណុំរឿងគ្រោះថ្នាក់ចរាចរណ៍ខាងលើមិនបញ្ចប់ត្រឹមនេះឡើយ ទោះបីជាមានការបញ្ចប់សំណងរដ្ឋប្បវេណីយ៉ាងណាក៏ដោយ ប៉ុន្តែករណីគ្រោះថ្នាក់នេះនៅជាប់បណ្តឹងអាជ្ញា ហើយកម្លាំងជំនាញកំពុងក៏សាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការបន្តតាមនីតិវិធីច្បាប់។
មាត្រា៨៣ នៃច្បាប់ស្ដីពីចរាចរណ៍ផ្លូវគោក ចែងថា ជនណាបើកបរធ្វេសប្រហែស ខ្ជីខ្ជា បង្កឲ្យមានការខូចខាតធ្ងន់ធ្ងរ ឬធ្វើឲ្យជនរងគ្រោះមិនអាចធ្វើការងារបានក្នុងរយៈពេល ៨ថ្ងៃឡើងទៅ នឹងត្រូវប្រឈមមុខជាប់ពន្ធនាគារពី ៦ខែទៅ ២ឆ្នាំ បើទោះបីជាជនរងគ្រោះព្រមព្រៀងទទួលសំណងហើយក៏ដោយ។
លើសពីនេះ ជនបង្កហេតុក៏អាចនឹងជាប់ពន្ធនាគារពី ១ឆ្នាំទៅ ៣ឆ្នាំ បើរកឃើញថាជនបង្កហេតុបើកបរក្នុងស្ថានភាពស្រវឹង មានជាតិអាល់កុល ០,៤០Mg/L ទៅ ០,៨០ Mg/L ឡើងទៅ ហើយបណ្ដាលឲ្យមានអ្នករងគ្រោះច្រើននាក់ និងបើករត់គេចជាដើម។ ជាមួយគ្នានេះ បើតាមច្បាប់ដដែលហាមឃាត់ជនបង្កហេតុបើកបររយៈពេល ៥ឆ្នាំ៕