មេដឹកនាំខ្មែរដែលរំលោភច្បាប់ និងសិទ្ធិមនុស្សផ្តាច់មុខនៅកម្ពុជា លោក ហ៊ុន សែន អះអាងថា អាស៊ាន និងសហភាពអឺរ៉ុប ត្រូវតែធ្វើការជាមួយគ្នាយ៉ាងស្អិតល្មួត ដើម្បីធានាសណ្ដាប់ធ្នាប់អន្តរជាតិផ្អែកលើច្បាប់ប្រកបដោយភាពជាក់លាក់ បើកចំហ តម្លាភាព និងការផ្ដល់ផលប្រយោជន៍ឲ្យគ្នាទៅវិញទៅមក។
បុរសខ្លាំងកម្ពុជាដែលឧស្សាហ៍រំលោភច្បាប់អន្តរជាតិស្ដីពីសិទ្ធិមនុស្ស លោក ហ៊ុន សែន បានលើកឡើងនៅក្នុងកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប នៅទីក្រុងប្រ៊ុចសែល ប្រទេសបែលហ្ស៊ិក កាលពីថ្ងៃទី១៤ ខែធ្នូ ថា ទាំងសហគមន៍អឺរ៉ុប និងអាស៊ាន ត្រូវតែមានការទទួលខុសត្រូវសម្រាប់ការកសាងសន្តិភាព ស្ថិរភាព និងការធ្វើឱ្យប្រសើរឡើងនូវគុណភាពនៃជីវិត និងជីវភាពរស់នៅរបស់ប្រជាជនក្នុងតំបន់ក៏ដូចជាពិភពលោកផងដែរ។
ទោះជាបែបនេះក្តី នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា ប្រាប់សារព័ត៌មាន The Cambodia Daily នៅថ្ងៃទី១៥ ធ្នូ នេះថា លោកអបអរសាទរចំពោះកម្ពុជាដែលព្រួយបារម្ភពីការរំលោភច្បាប់ និងគោលការណ៍អន្តរជាតិរបស់ប្រទេសមួយចំនួន ជាក់ស្តែងដូចជា រុស្ស៊ីរំលោភច្បាប់អន្តរជាតិឈ្លានពានទៅលើដែនអធិបតេយ្យភាពរបស់ប្រទេសអ៊ុយក្រែននៅពេលនេះ ជាដើម។
លោក មឿន តុលា លើកឡើងថា ក្នុងន័យនេះ កម្ពុជាក៏មិនគួរសម្លឹងមើលតែមួយជ្រុងដែលរុស្ស៊ីប្រើអាវុធរំលោភបំពានលើដែនអធិបតេយ្យរបស់អ៊ុយក្រែន ដោយបំពានគោលការណ៍អន្តរជាតិនោះដែរ ពីព្រោះមហាអំណាចកុម្មុយនីស្តចិននៅពេលនេះ បានប្រើលុយជំនួសអាវុធតាមរយៈនៃការបង្កើតអន្ទាក់បំណុលទៅលើប្រទេសតូចៗក្នុងចេតនារំលោភបំពានលើអធិបតេយ្យភាពរបស់ប្រទេសទាំងនោះ ក៏ជាការរំលោភលើគោលការណ៍អន្តរជាតិទាក់ទិននឹងសិទ្ធិមនុស្សជាសកលផងដែរ។
លោកបន្តថា កម្ពុជាក៏គួរតែងាកទៅរកការគោរពសិទ្ធិមនុស្ស និងលើកស្ទួយប្រជាធិបតេយ្យរបស់ខ្លួនឲ្យបានល្អប្រសើរឡើងវិញ ត្បិតការដឹកនាំរបស់រដ្ឋាភិបាលនៅពេលនេះ ត្រូវគេរិះគន់យ៉ាងខ្លាំងជុំវិញការរំលោភសិទ្ធិជាមូលដ្ឋានរបស់ពលរដ្ឋ ជាពិសេសការធ្វើទុក្ខបុកម្នេញទៅលើសហជីព សកម្មជនសង្គម និងសកម្មជននយោបាយ ជាដើម។
កាលពីថ្ងៃទី១៣ ខែធ្នូ ឆ្នាំ២០២២ សមាជិកសភាសហភាពអឺរ៉ុបចំនួន ១៣ប្រទេស ដែលមកពីប្រទេសហ្វាំងឡង់ ប្រទេសអាល្លឺម៉ង់ និងប្រទេសស៊ុយអែត ជាដើម បានចេញលិខិតរួមគ្នាមួយទៅកាន់ប្រធានក្រុមប្រឹក្សាអឺរ៉ុប លោក ស្ហាល មីឈែល (Charles Michel) និងតំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោក Josep Borrell ថា រដ្ឋាភិបាលកម្ពុជារបស់លោក ហ៊ុន សែន ត្រូវតែទទួលខុសត្រូវទាំងស្រុងចំពោះការរំលោភសិទ្ធិមនុស្ស ការរំលាយបក្សប្រឆាំង និងការជាន់ឈ្លីលទ្ធិប្រជាធិបតេយ្យ ជាដើម ដែលកំពុងបង្កឱ្យកើតមាននូវវិបត្តិសិទ្ធិមនុស្សធ្ងន់ធ្ងរក្រោមការដឹកនាំរបស់ខ្លួនក្នុងពេលបច្ចុប្បន្ននេះ៕