គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប នឹងបិទផ្សាយឈ្មោះប្រជាពលរដ្ឋដែលបានចុះឈ្មោះបោះឆ្នោតរួចរាល់ និងអ្នកដែលត្រូវបានលុបឈ្មោះចេញពីបញ្ជីឈ្មោះអ្នកបោះឆ្នោត ចាប់ពីថ្ងៃទី១៣ ដល់ថ្ងៃទី២៣ ខែមករា ឆ្នាំ២០២៣ នៅតាមសាលាឃុំ-សង្កាត់ទូទាំងប្រទេស និងលើគេហទំព័ររបស់ គ.ជ.ប។
គណៈកម្មាធិការជាតិរៀបចំការបោះឆ្នោត ចេញសេចក្តីជូនដំណឹងស្ដីពីការបិទផ្សាយបញ្ជីឈ្មោះបោះឆ្នោតដំបូងនៅថ្ងៃទី៥ ខែមករា ឆ្នាំ២០២៣ នេះថា ការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត មានគោលបំណងឱ្យប្រជាពលរដ្ឋទៅពិនិត្យផ្ទៀងផ្ទាត់ឈ្មោះ និងទិន្នន័យផ្សេងៗរបស់ខ្លួនក្នុងបញ្ជីបោះឆ្នោត ព្រមទាំងអាចសុំកែតម្រូវតាមរយៈនៃការប្តឹងតវ៉ា ឬការប្តឹងជំទាស់របស់ពួកគេ។
គណៈកម្មាធិការជាតិរៀបចំការបោះឆ្នោត អះអាងថា ជនណាក៏ដោយក៏មានសិទ្ធិប្តឹងតវ៉ា ឬប្តឹងជំទាស់ជាលាយលក្ខណ៍អក្សរបានដែរ ទាក់ទងនឹងបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ទៅក្រុមប្រឹក្សាឃុំ-សង្កាត់ក្នុងរយៈពេល ១០ថ្ងៃយ៉ាងយូរបន្ទាប់ពីថ្ងៃបិទផ្សាយនេះ។
គ.ជ.ប បញ្ជាក់ថា ការប្តឹងជំទាស់អាចធ្វើឡើងចំពោះតែបុគ្គលណាដែលមានឈ្មោះក្នុងបញ្ជីបោះឆ្នោតដំបូងប៉ុណ្ណោះ ក្នុងករណីដែលជននោះមិនមានលក្ខខណ្ឌគ្រប់គ្រាន់ដើម្បីមានឈ្មោះក្នុងបញ្ជីបោះឆ្នោត និងចំពោះជនណាម្នាក់ដែលមានឈ្មោះក្នុងបញ្ជីបោះឆ្នោតច្រើនជាងមួយកន្លែង។
ការចេញសេចក្តីជូនដំណឹងនេះ ធ្វើឡើងដើម្បីជំរុញឱ្យប្រជាពលរដ្ឋទៅពិនិត្យឈ្មោះបោះឆ្នោតដើម្បីឱ្យគ្រប់លក្ខខណ្ឌសម្រាប់បម្រើឱ្យការបោះឆ្នោតជាតិឆ្នាំ២០២៣ ខាងមុខនេះ។
កាលពីថ្ងៃទី៨ ខែធ្នូ ឆ្នាំ២០២២ គណៈកម្មាធិការជាតិរៀបចំការបោះឆ្នោត បានចេញសេចក្តីប្រកាសព័ត៌មានថា អ្នកដែលមានឈ្មោះក្នុងបញ្ជីបោះឆ្នោតឆ្នាំ២០២១ មានចំនួនជាង ៩លាន ២សែននាក់ ខណៈអ្នកចុះឈ្មោះបោះឆ្នោតថ្មីមានចំនួនជាង ៥៧ម៉ឺននាក់ ចំណែកអ្នកដែលត្រូវលុបឈ្មោះចេញពីបញ្ជីអ្នកបោះឆ្នោតមានជាង ២៤ម៉ឺននាក់ ស្របពេលដែលប្រជាពលរដ្ឋជាង ១លាននាក់ផ្សេងទៀតមិនបានទៅចូលរួមចុះឈ្មោះបោះឆ្នោតនោះឡើយ។
គ.ជ.ប បញ្ជាក់ថា ប្រព័ន្ធរៀបចំបញ្ជីបោះឆ្នោតរបស់ប្រទេសកម្ពុជា គឺជាប្រព័ន្ធស្ម័គ្រចិត្ត ហើយការបោះឆ្នោតក៏ជាការធ្វើឡើងដោយស្ម័គ្រចិត្តដែរ ដូច្នេះប្រជាពលរដ្ឋមិនទៅចុះឈ្មោះ និងមិនទៅបោះឆ្នោត គឺជាសិទ្ធិរបស់ពួកគេ។
យ៉ាងណាក៏ដោយ គ.ជ.ប អះអាងថា ប្រជាពលរដ្ឋទៅចុះឈ្មោះបោះឆ្នោតកាលពីពេលថ្មីៗនេះមានចំនួនច្រើនជាងឆ្នាំ២០២១ កន្លងទៅដល់ទៅជាង ២ម៉ឺននាក់។
ទាក់ទិននឹងបញ្ហានេះ ប្រមុខរដ្ឋាភិបាលកម្ពុជា លោក ហ៊ុន សែន បានចេញអនុក្រឹត្យស្ដីពីការកំណត់កាលបរិច្ឆេទនៃការបោះឆ្នោតជាតិអាណត្តិទី៧ កាលពីថ្ងៃទី២៩ ខែមិថុនា ឆ្នាំ២០២២ ដោយកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាថ្ងៃបោះឆ្នោតជ្រើសតាំងតំណាងរាស្ត្រទៅតាមអាណត្តិរបស់ខ្លួនរយៈពេល ៥ឆ្នាំម្តង។
ក្រុមអ្នកសង្កេតការណ៍ត្អូញត្អែរថា មានតែការបោះឆ្នោតឆ្នាំ១៩៩៣ ដែលរៀបចំឡើងដោយអ៊ុនតាក់ (UNTAC) ប៉ុណ្ណោះដែលមានតម្លាភាព សេរី ត្រឹមត្រូវ និងយុត្តិធម៌ ក្រៅពីនោះនៅអាណត្តិបន្តបន្ទាប់មកទៀត គឺជាការបោះឆ្នោតដែលមិនត្រឹមត្រូវរហូតមក ជាពិសេសក្រោយការរំលាយគណបក្សសង្គ្រោះជាតិ ដែលបក្សកាន់អំណាចបានគ្រប់គ្រងដំណើរការនៃការរៀបចំការបោះឆ្នោតស្ទើរតែទាំងស្រុងទៅហើយ៕