ក្រសួងមហាផ្ទៃ ចាត់តាំងក្រុមការងារត្រួតពិនិត្យ និងជំរុញការអនុវត្តគោលនយោបាយភូមិ-ឃុំមានសុវត្ថិភាពទូទាំង ២៥រាជធានី-ខេត្ត ដើម្បីបូកសរុបសភាពការណ៍ទូទាំងប្រទេសតាមដំណាក់កាលនីមួយៗជូនរាជរដ្ឋាភិបាល ស្របពេលដែលការបោះឆ្នោតជាតិអាណត្តិទី៧ ឆ្នាំ២០២៣ កាន់តែកៀកខិតជិតមកដល់។
រដ្ឋមន្ត្រីក្រសួងមហាផ្ទៃ លោក ស ខេង ចេញសេចក្តីសម្រេចចាត់តាំងរដ្ឋលេខាធិការ និងអនុរដ្ឋលេខាធិការរបស់ក្រសួងជិត ១០០នាក់ ជាក្រុមការងារត្រួតពិនិត្យ និងជំរុញការអនុវត្តគោលនយោបាយភូមិ-ឃុំមានសុវត្ថិភាពកាលពីថ្ងៃអង្គារដើមសប្តាហ៍នេះ ដោយសហការជាមួយរដ្ឋបាលរាជធានី-ខេត្ត ដើម្បីរៀបចំគោលការណ៍ និងវិធានការនានាក្នុងការអនុវត្តនៅតាមឃុំ-សង្កាត់នីមួយៗនៅទូទាំងប្រទេស។
រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា ក្រុមការងារទាំងនេះមានភារកិច្ចធ្វើការបូកសរុបវាយតម្លៃសភាពការណ៍ និងលទ្ធផលប្រតិបត្តិការ ព្រមទាំងចាត់ចំណាត់ថ្នាក់ក្រុង ស្រុក ខណ្ឌ ឃុំ សង្កាត់ ប្រចាំខែជូនក្រសួងមហាផ្ទៃផងដែរ។ ជាងនេះទៀត រៀងរាល់ ៣ខែម្តង ពួកគេត្រូវពិនិត្យវាយតម្លៃលទ្ធផលការងារ បញ្ហាប្រឈម និងវិធានការដោះស្រាយដើម្បីពង្រឹងបន្ថែមការអនុវត្តការងារសម្រាប់រយៈពេលបន្តទៀត។
ការចេញសេចក្តីសម្រេចនេះ ធ្វើឡើងដើម្បីកែសម្រួលសមាសភាពក្រុមការងារ និងដើម្បីជំនួសសេចក្តីសម្រេចចាស់របស់ខ្លួនដែលបានដាក់ចេញកាលពីឆ្នាំ២០១០ ជុំវិញគោលនយោបាយភូមិ-ឃុំមានសុវត្ថិភាពនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២ កុម្ភៈ នេះថា ការសម្រេចបង្កើតនូវក្រុមការងារនេះអាចមកពីមូលហេតុចម្បងមួយ គឺដោយសារតែក្រុមការងារដែលក្រសួងមហាផ្ទៃបង្កើតឡើងកាលពីមុនត្រូវបរាជ័យក្នុងការអនុវត្ត ព្រោះកន្លងមក អំពើជួញដូរមនុស្សចេះតែកើតមានជាបន្តបន្ទាប់ ខណៈល្បែងស៊ីសងនៅមូលដ្ឋានត្រូវបង្កើតគណៈកម្មការបង្ក្រាបទ្រង់ទ្រាយធំពីប្រមុខរដ្ឋាភិបាលកម្ពុជាថែមទៀត ដែលនេះជាភស្តុតាងមួយបង្ហាញថា ក្រុមការងារចាស់អនុវត្តគោលនយោបាយនេះគឺមិនទទួលបានជោគជ័យនោះទេ។
លោក ស៊ឹង សែនករុណា លើកឡើងថា ការអនុវត្តគោលនយោបាយនេះនឹងមិនមានប្រសិទ្ធភាពទេ ប្រសិនបើក្រសួងមហាផ្ទៃមិនកំណត់ឱ្យបានច្បាស់លាស់ពីតួនាទី និងភារកិច្ចរបស់អ្នកទាំងនោះ។ ជាងនេះ ការកំណត់ទោសទណ្ឌ ឬការដាក់ពិន័យណាមួយនៅពេលដែលពួកគេអនុវត្តមិនត្រឹមត្រូវតាមច្បាប់ ក៏មិនត្រូវបានកំណត់ដែរនោះ។
មន្ត្រីជាន់ខ្ពស់ទទួលបន្ទុកសិទ្ធិមនុស្សរូបនេះ អំពាវនាវឱ្យក្រសួងមហាផ្ទៃជំរុញក្រុមការងារដែលខ្លួនបានបង្កើតអនុវត្តនូវគោលនយោបាយភូមិ-ឃុំមានសុវត្ថិភាពនេះឱ្យមានប្រសិទ្ធភាពខ្ពស់ ព្រោះសព្វថ្ងៃនេះ ពលរដ្ឋនៅមូលដ្ឋានតែងតែរអ៊ូរទាំពីអំពើចោរកម្ម ល្បែងស៊ីសង ការចាប់ជំរិត និងការជួញដូរគ្រឿងញៀន ជាដើម។
គោលនយោបាយកម្រាស់ ១០ទំព័រដែលរដ្ឋាភិបាលកម្ពុជាបានកំណត់ថា លក្ខណៈសម្បត្តិរបស់ភូមិ-ឃុំ-សង្កាត់មានសុវត្ថិភាព គឺត្រូវមាន ៧ចំណុច ដូចជា៖
- ការផ្តល់សេវាសាធារណៈប្រកបដោយគុណភាព តម្លាភាព និងជឿទុកចិត្ត
- គ្មានបទល្មើសលួច ឆក់ ប្លន់ គ្រឿងញៀន ល្បែងស៊ីសង និងបទល្មើសគ្រប់ប្រភេទ
- មានសណ្ដាប់ធ្នាប់ល្អ ពិសេសមិនមានគ្រោះថ្នាក់ចរាចរណ៍
- គ្មានអំពើអនាចារ គ្មានការជួញដូរមនុស្ស គ្មានអំពើហិង្សា និងក្មេងទំនើង
- ដោះស្រាយវិវាទនៅថ្នាក់មូលដ្ឋានក្រៅប្រព័ន្ធតុលាការប្រកបដោយប្រសិទ្ធភាព
- មានអនាម័យ សោភណភាព និងបរិស្ថានល្អ។
- ឆ្លើយតបបានទាន់ពេលចំពោះគ្រោះមហន្តរាយ និងជំងឺឆ្លងផ្សេងៗ។
យ៉ាងណាក៏ដោយ លក្ខណៈសម្បត្តិរបស់ភូមិ-ឃុំ-សង្កាត់មានសុវត្ថិភាពទាំង ៧ចំណុចនេះ រដ្ឋាភិបាលមិនទាន់អាចធ្វើឱ្យបាននូវចំណុចណាមួយនៅឡើយ ខណៈអំពើអនាចារ ការជួញដូរមនុស្ស អំពើហិង្សា ក្មេងទំនើង បទល្មើសលួច ឆក់ ប្លន់ គ្រឿងញៀន ល្បែងស៊ីសងនៅតែកើតមានយ៉ាងអនាធិបតេយ្យនៅទូទាំងប្រទេសនៅឡើយ៕