ប្រធានាធិបតីអ៊ុយក្រែន វូឡូឌីមៀ ហ្សេឡេនស្គី បានជួបជាបន្តបន្ទាប់ជាមួយមេដឹកនាំនៅអឺរ៉ុប ដែលក្នុងនោះលោកបានទៅកាន់ទីក្រុងឡុងដ៍ ប្រទេសអង់គ្លេស។ ក្នុងទស្សនកិច្ចរបស់មេដឹកនាំអ៊ុយក្រែននៅអង់គ្លេស លោកបានជួបជាមួយនាយករដ្ឋមន្ត្រីអង់គ្លេស រីហ្ស៊ី ស៊ូណាក់ និងបានទៅកាន់សមាជិកសភាទាំងពីរថ្នាក់នៃប្រទេសមហាអំណាចមួយនេះផងដែរ។
ក្រោយពីបញ្ចប់ទស្សនកិច្ចនៅក្រុងឡុងដ៍ លោក ហ្សេឡេនស្គី បានទៅកាន់ទីក្រុងប៉ារីស ប្រទេសបារាំង។ នៅក្នុងទីក្រុងប៉ារីស លោកបានជួបជាមួយលោកប្រធានាធិបតីបារាំង អេម៉ានូអេល ម៉ាក្រុង និងបានជួបអធិការបតីអាល្លឺម៉ង់ Olaf Scholz។ នៅពេលលោកធ្វើដំណើរទៅកាន់ទីក្រុងប្រ៊ុចសែល ដើម្បីជួបមេដឹកនាំសហភាពអឺរ៉ុប និងមេដឹកនាំប្រទេសនៃសហគមន៍អឺរ៉ុបដ៏ធំនេះ លោកចេញដំណើរពីក្រុងប៉ារីស ទៅប្រ៊ុចសែល ត្រូវបានលោក ម៉ាក្រុង អមដំណើរលោក។
ទស្សនកិច្ចលើកទី២ នៅក្រៅប្រទេសរបស់មេដឹកនាំប្រទេសមួយដែលរងការឈ្លានពានពីប្រទេសមហាអំណាចរុស្ស៊ី ត្រូវបានអ្នកសង្កេតការណ៍មើលឃើញថា លោក ហ្សេឡេនស្គី ទទួលបានការស្វាគមន៍យ៉ាងកក់ក្ដៅពីមេដឹកនាំនៃបណ្ដាប្រទេសអឺរ៉ុប។
តាមការចុះផ្សាយក្នុងបណ្ដាញព័ត៌មានអាល្លឺម៉ង់ DW លោក ហ្សេឡេនស្គី បានថ្លែងនៅចំពោះមុខសមាជិកសភាអឺរ៉ុបនោះ ដោយលោកប្រើពាក្យថា Glory to Ukraine ប្រែថាអ៊ុយក្រែនដ៏រុងរឿង ហើយអរគុណសភាអឺរ៉ុបដែលកំពុងតែបន្តគាំទ្រប្រជាជនអ៊ុយក្រែន ក្នុងការតស៊ូដើម្បីសេរីភាព និងធ្វើសង្គ្រាមដើម្បីអធិបតេយ្យជាតិនៃទឹកដីអ៊ុយក្រែនចំពោះការឈ្លានពានពីប្រទេសរុស្ស៊ី។
លោកបានថ្លែងទៀតថា វាមានន័យសារសំខាន់ណាស់ដែលអ៊ុយក្រែនជាបេះដូងនៃប្រជាធិបតេយ្យដែលមិនត្រឹមសម្រាប់ខ្លួនឯងនោះទេ គឺសម្រាប់ប្រជាធិបតេយ្យនៅអឺរ៉ុបទាំងមូល។ លោក ហ្សេឡេនស្គី បានថ្លែងថា នៅពេលនេះ អ៊ុយក្រែនកំពុងតែដើរលើផ្លូវជ័យជម្នះ ព្រោះអ៊ុយក្រែននឹងក្លាយជាសមាជិកសហភាពអឺរ៉ុប។ ការថ្លែងរបស់លោក ហ្សេឡេនស្គី ដូចនេះ នាំឲ្យសមាជិកសហភាពអឺរ៉ុបទះដៃប្រាវៗហើយរន្ធត់ចិត្តជាខ្លាំង។
លោកបន្តថា អឺរ៉ុបគឺជាបេះដូងរបស់ប្រជាជនអ៊ុយក្រែន។ លោកថា អឺរ៉ុបកំពុងតែសាមគ្គីគ្នាដើម្បីការពារអ៊ុយក្រែន និងអឺរ៉ុបទាំងមូល។ លោកបានបន្តទៀតថា សហភាពអឺរ៉ុបដែលកំពុងបន្តជួយប្រជាជនអ៊ុយក្រែនប្រយុទ្ធប្រឆាំងនឹងអំពើឈ្លានពានរបស់រុស្ស៊ីពេលនេះ សហភាពអឺរ៉ុបគឺជាខ្នងបង្អែករបស់ប្រជាជនអ៊ុយក្រែនដ៏ខ្លាំងក្លា ធ្វើឲ្យប្រជាជនអ៊ុយក្រែនមានកម្លាំងចិត្តក្នុងការតស៊ូដើម្បីសេរីភាពរបស់ខ្លួន។
បើតាម DW នៅមុនពេលលោក ហ្សេឡេនស្គី ថ្លែងសុន្ទរកថាទៅកាន់សភាអឺរ៉ុប សមាជិកសភាអឺរ៉ុបមួយចំនួន និងនៅក្នុងសាលប្រជុំទាំងមូលមានទង់ជាតិអឺរ៉ុប និងអ៊ុយក្រែនរួចទៅហើយ ដោយទង់ជាតិទាំងពីរនេះគឺជានិមិត្តរូបបង្ហាញអំពីអ៊ុយក្រែន អនាគតនឹងក្លាយជាសមាជិកសហភាពអឺរ៉ុប។
តើទស្សនកិច្ចនៅអឺរ៉ុបជាលើកដំបូងរបស់លោក ហ្សេឡេនស្គី ឆ្លើយតបនឹងសង្គ្រាមរបស់រុស្ស៊ីដូចម្ដេច?
ក្រោយពីលោក ហ្សេឡេនស្គី បានជួបនាយករដ្ឋមន្ត្រី រីហ្ស៊ី ស៊ូណាក់ និងក្រោយពីបានថ្លែងសុន្ទរកថាទៅកាន់សមាជិកសភាអង់គ្លេស គឺប៉ុន្មានម៉ោងប៉ុណ្ណោះ ការិយាល័យនាយករដ្ឋមន្ត្រីអង់គ្លេសបានចេញសេចក្ដីប្រកាសព័ត៌មានថា លោក រីហ្ស៊ី ស៊ូណាក់ បានប្រាប់ទៅរដ្ឋមន្ត្រីការពារជាតិ បេន វ៉លឡេស ឲ្យពិនិត្យមើលលទ្ធភាពនៃការបញ្ជូនយន្តហោះចម្បាំងតាមសំណើរបស់លោក ហ្សេឡេនស្គី។
ប្រធានាធិបតី អេមម៉ានូអេល ម៉ាក្រុង បានថ្លែងនៅចំពោះមុខមេដឹកនាំប្រទេសអឺរ៉ុបថា គេមិនត្រូវបណ្ដោយឲ្យអ៊ុយក្រែនចាញ់សង្គ្រាមនោះទេ។
ហេតុអ្វីបានជាលោក ហ្សេឡេនស្គី ត្រូវការយន្តហោះចម្បាំងពីពួកបស្ចិមប្រទេស?
ការពិត លោក ហ្សេឡេនស្គី បានទទូចជាញឹកញាប់ទៅសហរដ្ឋអាមេរិក និងទៅរដ្ឋការរបស់លោក ចូ បៃដិន ដោយសុំឲ្យសហរដ្ឋអាមេរិកបញ្ជូនយន្តហោះធុន F-16 ទៅឲ្យអ៊ុយក្រែន ដែលលោកថាបើបានយន្តហោះប្រភេទនេះ គឺអ៊ុយក្រែនអាចមានលទ្ធភាពទប់ទល់សង្គ្រាមអាកាសពីរុស្ស៊ី។
តែលោក បៃដិន មិនបានថ្លែងសន្យាថានឹងឲ្យយន្តហោះចម្បាំងនេះតាមសំណើរបស់លោក ហ្សេឡេនស្គី នោះទេ។ លោក បៃដិន ថ្លែងថា ពេលវេលានេះមិនទាន់ដល់ស្ថានភាពដូចនេះទេ។
សង្គ្រាមនៅលើទឹកដីអ៊ុយក្រែននៅពេលនេះជិតដល់ខួបមួយឆ្នាំហើយ។ តាមប្រភពចារកម្មនៃក្រសួងការពារជាតិអ៊ុយក្រែន រុស្ស៊ីនៅក្រោមការដឹកនាំរបស់លោក ពូទីន មានផែនការបើកការវាយប្រហារលើទឹកដីអ៊ុយក្រែនជាថ្មីម្ដងទៀត ដោយបញ្ចេញរថក្រោះធុនធ្ងន់ដល់ទៅប្រមាណ ១៨០០គ្រឿង និងរថពាសដែក ៤ពាន់គ្រឿង ហើយអាចមានកងទ័ពរហូតដល់ទៅ ៣០ម៉ឺននាក់។
លោក ហ្សេឡេនស្គី ថ្លែងថា សង្គ្រាមចុងក្រោយនេះ បើអ៊ុយក្រែនមានអាវុធទំនើបៗ និងធុនធ្ងន់ដូចជារថក្រោះ កាំភ្លើងធំ មីស៊ីលបាញ់ចម្ងាយឆ្ងាយ មីស៊ីលបាញ់ទម្លាក់យន្តហោះ និងបាញ់ទម្លាក់គ្រាប់មីស៊ីល គឺរុស្ស៊ីគ្មានលទ្ធភាពលុកលុយអ៊ុយក្រែនបានទៀតជាដាច់ខាត៕