បុរសខ្លាំងកាន់អំណាចជិត ៤០ឆ្នាំនៅកម្ពុជា លោក ហ៊ុន សែន បានណែនាំទៅក្រុមឧកញ៉ាឲ្យចេះធ្វើសប្បុរសធម៌ ដើម្បីលើកស្ទួយដល់សមាគម និងចូលរួមចំណែកជួយដល់សង្គមជាតិក្រោមការដឹកនាំរបស់លោក ទោះបីជាឧកញ៉ាខ្លះជាប់ពាក់ព័ន្ធនឹងបទល្មើសឧក្រិដ្ឋក៏ដោយ។
ការណែនាំរបស់លោក ហ៊ុន សែន នេះ ធ្វើឡើងក្នុងជំនួបជាមួយសមាគមឧកញ៉ាកម្ពុជាដែលទើបត្រូវបានបង្កើតឡើងកាលពីពេលថ្មីៗនេះ ដោយសម្រេចឲ្យលោក លី យ៉ុងផាត់ ដែលល្បីល្បាញខាងបូមខ្សាច់ខុសច្បាប់ និងរំលោភដីធ្លីរបស់ពលរដ្ឋ ធ្វើជាប្រធានសមាគមឧកញ៉ានៅកម្ពុជា។
បើតាមសារព័ត៌មានរដ្ឋាភិបាល fresh news បានចុះផ្សាយថា ក្នុងជំនួបពិភាក្សានាថ្ងៃទី៦ ខែមេសា នេះ បុរសខ្លាំងក្រាញអំណាចតពូជនៅកម្ពុជា លោក ហ៊ុន សែន បានណែនាំទៅក្រុមឧកញ៉ាទាំងនោះត្រូវពង្រឹងសាមគ្គីភាពរួមគ្នាជួយដល់កិច្ចការសង្គម អភិវឌ្ឍប្រទេសជាតិ ធ្វើសកម្មភាពមនុស្សធម៌ និងចេះជួយដល់ការលំបាករបស់ពលរដ្ឋ។
ក្រុមអ្នកសង្កេតការណ៍និយាយថា ការបង្កើតសមាគមឧកញ៉ាក្រោមគំនិតផ្ដួចផ្ដើមរបស់លោក ហ៊ុន សែន នាពេលនេះមិនបានផ្ដល់ផលប្រយោជន៍អ្វីដល់ពលរដ្ឋ និងសង្គមជាតិឡើយ ផ្ទុយទៅវិញពួកក្រុមឧកញ៉ាទាំងនេះជាអ្នកជួយចិញ្ចឹមគ្រួសារត្រកូលហ៊ុនតាមរយៈការបរិច្ចាគថវិការាប់ពាន់រហូតដល់រយលានដុល្លារទៅគណបក្សប្រជាជនកម្ពុជា។
ប្រភពខ្លះនិយាយថា នៅពេលដែលពួកគេបរិច្ចាគថវិកាដល់លោក ហ៊ុន សែន ហើយ ក្រុមឧកញ៉ាទាំងនោះតែងតែទទួលបានផលប្រយោជន៍ជាថ្នូរមកវិញ ដោយការផ្ដល់ដី ភ្នំ បឹង និងទន្លេ រួមទាំងបើកដៃឲ្យមានការកាប់បំផ្លាញព្រៃឈើនៅកម្ពុជា ជាដើម។
លោក លី យ៉ុងផាត់ ដែលត្រូវបានលោក ហ៊ុន សែន ឲ្យធ្វើជាប្រធានសមាគមឧកញ៉ានោះជាមនុស្សល្បីខាងការបូមខ្សាច់ខុសច្បាប់លក់ទៅឲ្យប្រទេសសិង្ហបុរី និងការបណ្ដេញពលរដ្ឋចេញពីលំនៅឋានដោយបង្ខំ ដើម្បីយកដីដាំដំណាំអំពៅផលិតស្ករសលក់ទៅបរទេស។ លោកបានរំលោភដីធ្លីរបស់ពលរដ្ឋនៅខេត្តកោះកុង តាំងពីឆ្នាំ២០០៦ រហូតមកដល់ឆ្នាំ២០២៣ នេះ នៅមិនទាន់មានការដោះស្រាយនៅឡើយ។
ក្រៅពីមិនដោះស្រាយហើយ ឧកញ៉ា លី យ៉ុងផាត់ ក៏បានប្រើប្រាស់ប្រព័ន្ធតុលាការដើម្បីប្ដឹងពលរដ្ឋរងគ្រោះទាំងនោះថែមទៀត។
ឧកញ៉ា លី យ៉ុងផាត់ ដែលមានរហស្សនាមថាស្តេចកោះកុង (King of Koh Kong) ក៏ជាប់ឈ្មោះជាឧក្រិដ្ឋជនបំផ្លាញព្រៃឈើខ្មែរ ខណៈឧកញ៉ាផ្សេងៗទៀតក៏មានជាប់ពាក់ព័ន្ធនឹងការជួញដូរគ្រឿងញៀនយ៉ាងអនាធិបតេយ្យពេញប្រទេសកម្ពុជា ដូចជាឧកញ៉ា គិត ធាង ដែលជាបងប្រុសបង្កើតរបស់ឧកញ៉ា គិត ម៉េង ជាដើម។
កាលពីថ្ងៃទី២០ ខែមីនា ឆ្នាំ២០២០ លោក ហ៊ុន សែន បានកែសម្រួលអនុក្រឹត្យចាស់ដែលលោកបានចុះហត្ថលេខាកាលពីថ្ងៃទី៥ ខែមេសា ឆ្នាំ១៩៩៤ ចំពោះសប្បុរសជនដែលបានបរិច្ចាគថវិកាជូនរដ្ឋចាប់ពី ១០ម៉ឺនដុល្លារអាមេរិកឡើងទៅ នឹងទទួលបានគោរមងារជាឧកញ៉ានោះ ត្រូវកែប្រែ និងកំណត់សាជាថ្មីថា អ្នកដែលចង់បានគោរមងារជាឧកញ៉ា ត្រូវបរិច្ចាគថវិកាចាប់ពី ៥០ម៉ឺនដុល្លារអាមេរិកឡើងក្នុងម្នាក់ៗ៕