រដ្ឋាភិបាលកម្ពុជាអះអាងថា រយៈពេលជាង ៣ខែក្នុងឆ្នាំ២០២៣ នេះ សមត្ថកិច្ចចុះបង្ក្រាបការប្រើប្រាស់ និងជួញដូរគ្រឿងញៀនបានជាង ២ពាន់ករណី និងឃាត់ខ្លួនជនល្មើស និងអ្នកពាក់ព័ន្ធបានជាង ៥ពាន់នាក់ផងដែរ។
រដ្ឋាភិបាលកម្ពុជាបញ្ចេញរបាយការណ៍ស្ដីពីយុទ្ធនាការប្រយុទ្ធប្រឆាំងគ្រឿងញៀននៅថ្ងៃទី២០ មេសា នេះថា ចាប់ពីថ្ងៃទី១ ខែមករា រហូតដល់ថ្ងៃទី២០ ខែមេសា ឆ្នាំ២០២៣ នេះ ខ្លួនបានបង្ក្រាបការជួញដូរ និងការប្រើប្រាស់គ្រឿងញៀនបាន ២១៣៩ករណី និងឃាត់មនុស្សបាន ៥១១០នាក់ក្នុងនោះមានស្រី ៣៣៦នាក់ផងដែរ។
របាយការណ៍ដដែលបញ្ជាក់ថា នៅថ្ងៃទី២០ មេសា នេះ សមត្ថកិច្ចកម្ពុជាក៏បានបង្ក្រាបការជួញដូរគ្រឿងញៀនបាន ៤ករណីដែរ ក្នុងនោះករណីប្រើប្រាស់ ១ករណី ដឹកជញ្ជូនរក្សាទុក ២ករណី និងជួញដូរ ១ករណី ដោយឃាត់ខ្លួនជនសង្ស័យ ១១នាក់ថែមទៀត។
ការបង្ហាញរបាយការណ៍ស្ដីពីយុទ្ធនាការប្រយុទ្ធប្រឆាំងគ្រឿងញៀននេះ ធ្វើឡើងស្របពេលគេរកឃើញការចរាចរគ្រឿងញៀនកំពុងតែរីកដុះដាលយ៉ាងខ្លាំងក្រោមឥទ្ធិពលរបស់អ្នកមានអំណាចនៅកម្ពុជាសព្វថ្ងៃនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ មេសា នេះថា ការចរាចរគ្រឿងញៀនសព្វថ្ងៃនេះ កំពុងវាយលុកលើប្រទេសកម្ពុជាយ៉ាងខ្លាំង ព្រោះថាក្រោយការស៊ើបអង្កេតរបស់លោកលើករណីជួញដូរគ្រឿងញៀននេះ បានរកឃើញថា មិនមែនកើតមានតែនៅតាមក្លឹបកម្សាន្ត ខារ៉ាអូខេ និងរង្គសាលទេ សូម្បីក្នុងពន្ធនាគារខ្លះក៏ត្រូវបានគេបង្ហើបថា មានការចរាចរគ្រឿងញៀនដែរ។
លោក សេក សុជាតិ សម្ដែងនូវការព្រួយបារម្ភថា ប្រសិនបើរដ្ឋាភិបាលនៅតែមិនអាចដាក់ចេញនូវវិធានការហ្មត់ចត់ក្នុងការប្រយុទ្ធប្រឆាំងគ្រឿងញៀនឱ្យរលាយបាត់ពីប្រទេសកម្ពុជាទេ យុវជនខ្មែរនឹងបន្តធ្លាក់ចូលទៅក្នុងការប្រើប្រាស់គ្រឿងញៀននេះពីមួយថ្ងៃទៅមួយថ្ងៃគ្មានថ្ងៃទប់ស្កាត់បានឡើយ ហើយពួកគេនឹងក្លាយខ្លួនទៅជាអ្នកញៀនគ្រឿងញៀនដែលដកខ្លួនមិនរួចថែមទៀត។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា គ្រឿងញៀនមិនបានជួយឱ្យប្រទេសរីកចម្រើនទេ ហើយថែមទាំងបំផ្លាញធនធានមនុស្សថែមទៀត ខណៈផលប៉ះពាល់ពីគ្រឿងញៀននឹងបង្កឱ្យសង្គមកម្ពុជាក្លាយទៅជាសង្គមអសន្តិសុខ ដែលពោរពេញទៅអំពើចោរកម្ម លួច ឆក់ ប្លន់ រហូតឈានដល់ការប្រព្រឹត្តអំពើឃាតកម្មផងដែរ។
កាលពីថ្ងៃទី១២ ខែមេសា ឆ្នាំ២០២៣ រដ្ឋមន្ត្រីក្រសួងមហាផ្ទៃ លោក ស ខេង ត្អូញត្អែរថា សព្វថ្ងៃនេះគ្រឿងញៀនកំពុងបំផ្លាញធនធានយុវជននៅកម្ពុជាក្នុងការចូលរួមការពារឯករាជ្យ បូរណភាពទឹកដី អធិបតេយ្យភាព និងការអភិវឌ្ឍប្រទេសជាតិ ស្របពេលដែលបទល្មើសជួញដូរ ចែកចាយ និងចរាចរគ្រឿងញៀននៅកម្ពុជាមិនថយចុះទាល់តែសោះ គឺមានតែកើតឡើងខ្លាំងជាងមុន។
ចំណែកប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន បានលើកឡើងកាលពីអំឡុងខែកុម្ភៈ ឆ្នាំ២០២៣ ថា បច្ចុប្បន្ននេះ កម្ពុជានៅតែបន្តរងការគំរាមកំហែងឥតឈប់ឈរពីការចរាចរ ការជួញដូរ និងការប្រើប្រាស់គ្រឿងញៀននៅលើពិភពលោក និងក្នុងតំបន់។ ជាក់ស្តែង ការចរាចរគ្រឿងញៀនទាំងតាមផ្លូវគោក ផ្លូវទឹក បញ្ញើប្រៃសណីយ៍ និងផ្លូវអាកាស ជាពិសេសករណីរក្សាទុក កែច្នៃ ផលិត និងជួញដូរគ្រឿងញៀននៅកម្ពុជានៅតែបន្តកើតមានសព្វថ្ងៃនេះ។
កាលពីចុងខែធ្នូ ឆ្នាំ២០២២ ក្រសួងមហាផ្ទៃបានបញ្ចេញរបាយការណ៍របស់ខ្លួនថា ក្នុងចំណោមអ្នកជាប់ឃុំជិត ៤ម៉ឺននាក់នៅពន្ធនាគារទូទាំងប្រទេស មាន ៥០% ជាប់ឃុំដោយសារបទល្មើសគ្រឿងញៀន ខណៈមួយថ្ងៃសមត្ថកិច្ចឃាត់ខ្លួនអ្នកប្រើប្រាស់ និងជួញដូរចន្លោះពី ១០ ទៅ ២០នាក់នៅតាមបណ្ដាខេត្តមួយចំនួនទូទាំងប្រទេស ដែលពួកគេភាគច្រើនជាយុវជន។
កាលពីអំឡុងឆ្នាំ២០២២ អាជ្ញាធរជាតិប្រយុទ្ធប្រឆាំងគ្រឿងញៀន បានចេញរបាយការណ៍របស់ខ្លួនក្នុងឆ្នាំ២០២២ កន្លងទៅថា សមត្ថកិច្ចបានបង្ក្រាបបទល្មើសគ្រឿងញៀននៅទូទាំងប្រទេសបានជិត ៦៣០០ករណី និងបានឃាត់ខ្លួនមនុស្សជិត ១ម៉ឺន ៥ពាន់នាក់ ហើយរឹបអូសបានគ្រឿងញៀនជាច្រើនប្រភេទដែលមានចំនួនដល់ទៅជិត ១៥តោន។
ក្រុមអ្នកសង្កេតការណ៍លើកឡើងថា គ្រឿងញៀននៅកម្ពុជាមិនអាចបំបាត់បានទេ ព្រោះវាជាមុខរបររបស់អ្នកមានអំណាច ក្នុងនោះគេរកឃើញថា ការចរាចរគ្រឿងញៀននេះមានជាប់ពាក់ព័ន្ធនឹងសាច់ញាតិដ៏ជិតដិតបំផុតរបស់លោកនាយករដ្ឋមន្ត្រី ហ៊ុន សែន ផងដែរ៕