បុរសខ្លាំងកាន់អំណាចជិត ៤ទសវត្សនៅកម្ពុជា លោក ហ៊ុន សែន ស្នើទៅប្រទេសមួយចំនួនដែលលោកចោទថាជាអ្នកឧបត្ថម្ភប្រាក់ដល់កូដករណាហ្គាវើលដ៍កន្លងមក ត្រូវដកខ្លួនចេញ ដោយថារយៈពេល ២ឆ្នាំមកនេះ បើគ្មានការឧបត្ថម្ភពីក្រៅប្រទេសទេ ក្រុមកូដករក៏មិនអាចបន្តធ្វើកូដកម្មបានដែរ។
ក្នុងពិធីបើកការដ្ឋានសាងសង់ចំណតផែកុងតឺន័រថ្មីនៅកំពង់ផែស្វយ័តក្រុងព្រះសីហនុ នាព្រឹកថ្ងៃទី១ ឧសភា នេះ លោក ហ៊ុន សែន បានចោទក្រុមកូដករជាថ្មីថា ការដែលពួកគេស៊ីឈ្នួលធ្វើកូដកម្មនៅខាងមុខក្រុមហ៊ុនណាហ្គាវើលដ៍ជាប្រចាំ មិនមែនជារឿងល្អ ហើយក៏មិនមែនជាការគោរពដែរ។ លោកថា កូដករទាំងនោះទទួលបានប្រាក់ឧបត្ថម្ភពីខាងក្រៅប្រទេស ទើបពួកគេនៅតែមានបាយសម្រាប់បរិភោគ និងកម្លាំងមកធ្វើកូដកម្មបន្តទោះបីជាពួកគេមិនមានការងារធ្វើក៏ដោយ។
ចាប់តាំងពីមានវិវាទការងារពីឆ្នាំ២០២១ មក ក្រុមកូដករណាហ្គាវើលដ៍បានជួបចរចាជាមួយតំណាងក្រុមហ៊ុនណាហ្គាវើលដ៍ជាច្រើនលើក និងបានដាក់ញត្តិទៅក្រសួងការងារ ខុទ្ទកាល័យរបស់លោក ហ៊ុន សែន ព្រមទាំងភាគីពាក់ព័ន្ធផ្សេងៗឲ្យជួយអន្តរាគមន៍ដោះស្រាយបញ្ចប់វិវាទការងារនេះ ប៉ុន្តែរយៈពេល ២ឆ្នាំមកនេះនៅមិនទាន់មានដំណោះស្រាយនៅឡើយ។
ក្រៅពីមិនមានដំណោះស្រាយ និងកិច្ចអន្តរាគមន៍ហើយ នៅថ្ងៃទី១ ឧសភា នេះ លោក ហ៊ុន សែន ក៏បានចោទក្រុមកូដករជាថ្មីទៀត និងបានស្នើទៅប្រទេសដែលលោកចោទថាជាអ្នកផ្ដល់ថវិកាឧបត្ថម្ភដល់កូដករណាហ្គាវើលដ៍ជាប្រចាំនោះ ឲ្យដកខ្លួនចេញ និងបញ្ឈប់ការធ្វើអន្តរជាតូបនីយកម្មនៅកម្ពុជាថែមទៀតផង។
នេះមិនមែនជាលើកទី១ ទេដែលមេដឹកនាំកម្ពុជា លោក ហ៊ុន សែន ចោទប្រកាន់លើក្រុមកូដករណាហ្គាវើលដ៍។ តែយ៉ាងណា ការចោទប្រកាន់នេះត្រូវបានក្រុមកូដករច្រានចោល និងចាត់ទុកការចោទប្រកាន់របស់លោក ហ៊ុន សែន ថាជារឿងអយុត្តិធម៌សម្រាប់ពួកគេ។
ក្រុមកូដករថាពួកគេតស៊ូធ្វើកូដកម្មរយៈពេល ២ឆ្នាំមកនេះមិនបានទទួលបានប្រាក់ឧបត្ថម្ភពីខាងណាឡើយ ហើយការបន្តធ្វើកូដកម្មនេះ ដើម្បីទាមទារឲ្យថៅកែគោរពច្បាប់ការងារកម្ពុជា និងដោះស្រាយវិវាទការងារជូនពួកគេតែប៉ុណ្ណោះ។
ក្រុមហ៊ុនណាហ្គាវើលដ៍បានបញ្ឈប់បុគ្គលិកពីការងារទាំងអយុត្តិធម៌ជាង ១៣០០នាក់កាលពីខែមេសា ឆ្នាំ២០២១ កន្លងទៅ ក្រោមលេសជួបវិបត្តិហិរញ្ញវត្ថុ ប៉ុន្តែការកាត់ក្រុមបុគ្គលិកនេះមិនមែនដោយសារក្រុមហ៊ុនជួបវិបត្តិហិរញ្ញវត្ថុនោះទេ។ ជាក់ស្ដែងនៅឆ្នាំ២០២០ កន្លងទៅ ក្រុមហ៊ុន NagaCorp ទទួលបានប្រាក់ចំណេញជាង ១០០លានដុល្លារ ទោះបីជាមានវិបត្តិកូវីដ-១៩ កើតឡើងក្ដី ។
ដូច្នេះ ការកាត់បុគ្គលិកកាលពីឆ្នាំ២០២១ ក្រុមកូដករអះអាងថាដោយសារក្រុមហ៊ុនណាហ្គាវើលដ៍រើសអើងសហជីពដែលការពារផលប្រយោជន៍បុគ្គលិកទៅវិញទេ ព្រោះកន្លងមក ក្រុមហ៊ុនល្បែងស៊ីសងមួយនេះបានរំលោភសិទ្ធិការងារខ្លាំងលើបុគ្គលិកដែលបម្រើការងារនៅទីនោះ។
អ្នកគ្រប់គ្រងសិទ្ធិការងារនៃមជ្ឈមណ្ឌលការងារ និងសិទ្ធិមនុស្ស លោក ឃុន ថារ៉ូ ប្រាប់សារព័ត៌មាន The Cambodia Daily កន្លងមកថា វិវាទការងារនៅក្រុមហ៊ុនណាហ្គាវើលដ៍ដែលអូសបន្លាយប្រមាណជា ២ឆ្នាំមកនេះអាចវាយតម្លៃបានថា ក្រៅពីនាយករដ្ឋមន្ត្រីរបស់ប្រទេសកម្ពុជា គ្មាននរណាម្នាក់អាចដោះស្រាយបានឡើយ។
លោក ឃុន ថារ៉ូ លើកឡើងថា ការតស៊ូរបស់កម្មករនិយោជិតដើម្បីទាមទាររកយុត្តិធម៌ គឺពិតជាគំរូដ៏ល្អមួយសម្រាប់វិស័យការងារដែលពួកគេនៅតែបន្តឆន្ទៈ បង្ហាញឲ្យឃើញពីការស្វែងរកយុត្តិធម៌ បើទោះបីជាពួកគាត់ត្រូវជួបនូវឧបសគ្គធំៗ ដូចជាការបង្ក្រាបរបស់អាជ្ញាធរ ការចោទប្តឹងពីខាងក្រុមហ៊ុន ការបាត់បង់ប្រាក់ចំណូល និងការមិនអើពើពីសំណាក់នាយករដ្ឋមន្ត្រីក៏ដោយ ក៏ពួកគាត់នៅតែនាំគ្នាបន្តស្វែងរកយុត្តិធម៌ដើម្បីឲ្យមានដំណោះស្រាយរហូតដល់ពេលនេះ។
របាយការណ៍របស់សង្គមស៊ីវិលឲ្យដឹងថា ក្រុមកូដករណាហ្គាវើលដ៍ចំនួន ៩នាក់ កំពុងរងនូវបណ្តឹងតាមផ្លូវតុលាការក្រោមបទចោទ “ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម” ដូចជា ប្រធានទ្រទ្រង់សិទ្ធិការងារកម្មករខ្មែរ កញ្ញា ឈឹម ស៊ីថរ ថ្នាក់ដឹកនាំសហជីព កញ្ញា ឈឹម សុខន សកម្មជនសហជីព អ្នកស្រី រី សុវណ្ណឌី ជាដើម ក្រោយពីក្រុមកូដករទាំងនោះធ្វើកូដកម្មទាមទារឲ្យថៅកែក្រុមហ៊ុនណាហ្គាវើលដ៍ដោះស្រាយវិវាទការងារជាមួយខ្លួនកន្លងមក៕