អង្គការចលនាមាតាធម្មជាតិកម្ពុជា ប្ដេជ្ញាបន្តយុទ្ធនាការបញ្ឈប់ការកាត់តំបន់ឧទ្យានជាតិ និងដែនជម្រកសត្វព្រៃទៅឲ្យក្រុមហ៊ុនឯកជនបន្តទៀត ស្របពេលដែលរដ្ឋាភិបាលកម្ពុជានៅតែបន្តផ្តល់ដីសម្បទានទាំងតំបន់ឧទ្យានជាតិ និងដែនជម្រកសត្វព្រៃឱ្យទៅក្រុមហ៊ុន One More របស់ឧកញ៉ា ជឹង សុគន្ធាវី ជាបន្តបន្ទាប់។
អង្គការចលនាមាតាធម្មជាតិកម្ពុជា បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៧ មិថុនា នេះ ដោយសំដែងនូវក្តីបារម្ភថា ពួកគេពិតជាមិនយល់ទាល់តែសោះពីមូលហេតុដែលរដ្ឋាភិបាលចេះតែបន្តកាត់ដីក្នុងតំបន់ឧទ្យានជាតិ និងតំបន់ដែនជម្រកសត្វព្រៃដែលជាដីសម្បូរទៅដោយធនធានធម្មជាតិ និងសត្វព្រៃឱ្យទៅក្រុមហ៊ុន One More របស់ឧកញ៉ា ជឹង សុគន្ធាវី សព្វថ្ងៃនេះ។
អង្គការនេះលើកឡើងថា ដីតំបន់ឧទ្យានជាតិ និងដែនជម្រកសត្វព្រៃដែលរដ្ឋាភិបាលបានកាត់ទៅឱ្យក្រុមហ៊ុន One More របស់ឧកញ៉ា ជឹង សុគន្ធាវី មានទំហំធំៗណាស់ចាប់ពីរាប់សិបហិកតាររហូតដល់រាប់រយហិកតារ ដែលមជ្ឈដ្ឋាននានាសំដែងនូវការព្រួយបារម្ភយ៉ាងខ្លាំងពីការគំរាមកំហែងទៅដល់ធនធានធម្មជាតិ និងសត្វព្រៃនៅតំបន់នោះ ព្រោះពួកគេបារម្ភខ្លាចដូចករណីភ្នំតាម៉ៅ ដែលត្រូវក្រុមហ៊ុនឯកជនបំផ្លាញព្រៃឈើ និងសត្វព្រៃនាពេលកន្លងមក។
អង្គការចលនាមាតាធម្មជាតិ បញ្ជាក់ថា បើទោះបីជាកន្លងមកមានការបង្ហាញក្ដីព្រួយបារម្ភពីសំណាក់ពលរដ្ឋខ្មែរ សកម្មជនបរិស្ថាន ដោយការស្នើសុំឱ្យក្រសួងបរិស្ថានបញ្ឈប់ការកាត់ឧទ្យានជាតិឱ្យក្រុមហ៊ុន និងដកសិទ្ធិអភិវឌ្ឍន៍ពីក្រុមហ៊ុននេះក្ដី ក៏ក្រសួងនៅតែមិនទាន់មានចំណាត់ការ និងដំណោះស្រាយតាមសេចក្ដីស្នើនោះដែរ ក្រៅតែពីការចោទប្រកាន់លើក្រុមយុវជនដែលបានដាក់សំណើនោះ។
អ្នកស្រី ជឹង សុគន្ធាវី ដែលទើបទទួលងារជាឧកញ៉ាកាលពីឆ្នាំ២០២១ គឺជាម្ចាស់ក្រុមហ៊ុន វ័ន ម៉រ (One More Ltd.) និងក្រុមហ៊ុន វ័ន ហ្វ្រេតធើនីធី (One Fraternity Co., LTD) ដែលបានចុះបញ្ជីនៅក្រសួងពាណិជ្ជកម្មកាលពីឆ្នាំ២០១៩។
អ្នកស្រី ជឹង សុគន្ធាវី ជាកូនស្រីរបស់អ្នកស្រី ជឹង សុភាព ហៅយាយភូ អនុប្រធានកាកបាទក្រហមដែលជាភរិយារបស់លោក ឡៅ ម៉េងឃីន សមាជិកព្រឹទ្ធសភារបស់គណបក្សប្រជាជនកម្ពុជា ដែលស្និទ្ធនឹងគ្រួសាររបស់លោក ហ៊ុន សែន។
ក្នុងរយៈពេលចុងក្រោយនេះ មេដឹកនាំបក្សកាន់អំណាចលោក ហ៊ុន សែន បានចុះហត្ថលេខាកាត់ដីនៅតំបន់ឧទ្យានជាតិ និងតំបន់ដែនជម្រកសត្វព្រៃឱ្យគ្រួសារឧកញ៉ាដែលស្និទ្ធស្នាលនឹងក្រុមគ្រួសាររបស់លោកមួយនេះជាបន្តបន្ទាប់។ ជាក់ស្តែងថ្ងៃទី២៥ ខែវិច្ឆិកា ឆ្នាំ២០២២ លោក ហ៊ុន សែន បានសម្រេចកាត់ដីរដ្ឋទំហំ ២៩ហិកតារ ស្ថិតក្នុងភូមិសាស្ត្រខេត្តកែប និងដីឧទ្យានជាតិគិរីរម្យចំនួន ២២១ហិកតារ និង ៩៤អា ស្ថិតក្នុងខេត្តកំពង់ស្ពឺ ឲ្យគ្រួសារឧកញ៉ាមួយនេះធ្វើជាកម្មសិទ្ធិ។
ជាងនេះទៀត លោក ហ៊ុន សែន ក៏បានកាត់ដីនៅក្នុងដែនជម្រកសត្វព្រៃកែវសីមា ខេត្តមណ្ឌលគិរី ៧០ហិកតារ និងដីដែនជម្រកសត្វព្រៃភ្នំឱរ៉ាល់ទំហំ ៦៤៩ហិកតារ ស្ថិតក្នុងខេត្តកំពង់ឆ្នាំង ឱ្យទៅឧកញ៉ា ជឹង សុគន្ធាវី ផងដែរ។
ទាក់ទិននឹងបញ្ហានេះ កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន ចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន១៥ រួមមានខេត្តត្បូងឃ្មុំ ក្រចេះ មណ្ឌលគិរី រតនគិរី ស្ទឹងត្រែង និងខេត្តកំពង់ធំ ជាដើម ដើម្បីត្រៀមធ្វើអនុបយោគ និងបែងចែកសម្រាប់កម្មសិទ្ធិឯកជនឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ។
ទាក់ទិននឹងករណីបែងចែកដីរដ្ឋឱ្យបុគ្គលឯកជន និងក្រុមហ៊ុនឯកជននេះ ឧកញ៉ាដែលជាមនុស្សជិតស្និទ្ធនឹងលោក ហ៊ុន សែន ជាច្រើននាក់ រួមទាំងសាច់ញាតិ និងកូនបង្កើតរបស់គាត់ផង បានទទួលដីរដ្ឋរាប់រយហិកតារធ្វើជាកម្មសិទ្ធិ ដូចជាឧកញ៉ា ពុង ឃាវសែ ឧកញ៉ា ជឹង សុភាព ឧកញ៉ា ជឹង សុគន្ធាវី ឧកញ៉ា ទ្រី ភាព និងឧកញ៉ា លី យ៉ុងផាត់ ជាដើម សុទ្ធតែមានចំណែកទទួលបានដីទាំងនោះ។ ជាងនេះទៀត អ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់លោក ហ៊ុន សែន ក៏ទទួលបានដីរដ្ឋរាប់រយហិកតារពីការកាត់ឆ្វៀលនេះផងដែរ។
ជុំវិញបញ្ហានេះ កាលពីថ្ងៃទី២២ ខែឧសភា ឆ្នាំ២០២៣ យុវជនស្រឡាញ់បរិស្ថានជិត ២០នាក់ បាននាំគ្នាយកញត្តិទៅដាក់នៅក្រសួងបរិស្ថាន ដើម្បីស្នើឲ្យក្រសួងដកហូតដីនៅតំបន់ឧទ្យានជាតិចំនួន៣ ពីវិស័យឯកជនឲ្យមកទុកជាសម្បត្តិរដ្ឋវិញ ក្នុងនោះពួកគេក៏បានស្នើឱ្យបញ្ឈប់សកម្មភាពកាត់ដីព្រៃធម្មជាតិនៅតំបន់ការពារឲ្យទៅក្រុមហ៊ុនឯកជនផងដែរ ប៉ុន្តែត្រូវក្រសួងបរិស្ថាន ព្រមានចាត់វិធានការច្បាប់លើក្រុមយុវជនទាំងនោះទៅវិញ៕