គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចប្តូរកាលបរិច្ឆេទនៃការប្រកាសលទ្ធផលបោះឆ្នោតផ្លូវការពីថ្ងៃទី៩ ខែសីហា មកនៅថ្ងៃទី៤ ខែសីហា និងថ្ងៃទី៤ ខែកញ្ញា ឆ្នាំ២០២៣។
សេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំរបស់គណៈកម្មាធិការជាតិរៀបចំការបោះឆ្នោត នាព្រឹកថ្ងៃទី៣១ ខែកក្កដា ឆ្នាំ២០២៣ ឲ្យដឹងថា គ.ជ.ប នឹងប្រកាសលទ្ធផលបោះឆ្នោតបណ្ដោះអាសន្ននៅថ្ងៃទី១ សីហា នេះ។ ចំណែកការប្រកាសលទ្ធផលផ្លូវការវិញ គ.ជ.ប សម្រេចប្តូរកាលបរិច្ឆេទនៃការប្រកាសផ្លូវការអំពីលទ្ធផលបោះឆ្នោត ដោយប្តូរពីថ្ងៃទី៩ សីហា មកថ្ងៃទី៤ សីហា និងថ្ងៃទី៤ ខែកញ្ញា ឆ្នាំ២០២៣។
ចំពោះការបែងចែកអាសនៈដែលគណបក្សត្រូវទទួលបានវិញ នឹងត្រូវបង្ហាញនៅថ្ងៃប្រកាសលទ្ធផលផ្លូវការដោយ គ.ជ.ប និងធ្វើការកំណត់បេក្ខជនជាប់ឆ្នោតអំឡុងពេលនោះផងដែរ។
ការបោះឆ្នោតជ្រើសតាំងតំណាងរាស្ត្រកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅនេះត្រូវគណបក្សប្រជាជនកម្ពុជាអះអាងថា ខ្លួនបានឈ្នះការបោះឆ្នោតច្រើនលើសលប់ក្នុងចំណោម ១៨គណបក្សនយោបាយដែលបានចូលរួមបោះឆ្នោត ប៉ុន្តែក្នុងចំណោម ១៨គណបក្សនយោបាយដែលចូលរួមបោះឆ្នោត គឺមិនមានវត្តមានគណបក្សប្រឆាំងចូលរួមប្រកួតប្រជែងជាមួយឡើយ។
បើតាមលទ្ធផលបោះឆ្នោតកាលពីថ្ងៃទី២៣ ខែកក្កដា កន្លងទៅ ក្នុងចំណោមអាសនៈទាំង ១២៥ នៅក្នុងរដ្ឋសភានោះ គឺគណបក្សប្រជាជនកម្ពុជាទទួលបាន ១២០អាសនៈ រីឯអាសនៈនៅសល់ ៥ ទៀត បានទៅលើគណបក្សហ៊្វុនស៊ិនប៉ិច។
តែយ៉ាងណា ក្រោយការបោះឆ្នោតជ្រើសតាំងតំណាងរាស្ត្រអាណត្តិទី៧ នៅកម្ពុជា ត្រូវបានបណ្ដាប្រទេសលោកសេរីចាត់ទុកថាធ្វើឡើងដោយមិនសេរី និងមិនយុត្តិធម៌ឡើយ ដោយសារតែរដ្ឋាភិបាលក្រោមការដឹកនាំរបស់លោក ហ៊ុន សែន បានបិទគណបក្សប្រឆាំងមិនឲ្យចូលរួមប្រកួតប្រជែងការបោះឆ្នោត ខណៈពលរដ្ឋម្ចាស់ឆ្នោតវិញរងការបង្ខំ និងគំរាមកំហែងគ្រប់រូបភាពដើម្បីដាក់សម្ពាធឲ្យពួកគេទៅបោះឆ្នោត ជាដើម៕