ប្រធានគណបក្សប្រជាជនកម្ពុជា លោក ហ៊ុន សែន ផ្ញើសារទៅកាន់ដៃគូអភិវឌ្ឍន៍នានាដែលប៉ុនប៉ងចង់ជ្រៀតជ្រែកចូលកិច្ចការផ្ទៃក្នុងរបស់កម្ពុជា តាមរយៈការប្រើប្រាស់ជំនួយរបស់ខ្លួន ក្រោមហេតុផលលទ្ធិប្រជាធិបតេយ្យ និងសិទ្ធិមនុស្ស ដើម្បីបង្កអស្ថិរភាពនៅក្នុងព្រះរាជាណាចក្រកម្ពុជា ត្រូវតែបញ្ឈប់សកម្មភាពរបស់ខ្លួន។
ថ្លែងនៅក្នុងមហាសន្និបាតរណសិរ្សសាមគ្គីអភិវឌ្ឍន៍មាតុភូមិកម្ពុជាលើកទី៦ នៅសណ្ឋាគារសុខាភ្នំពេញ នាព្រឹកថ្ងៃទី១៥ វិច្ឆិកា លោក ហ៊ុន សែន លើកឡើងថា សូមកុំចាំបាត់សន្តិភាព ទើបស្វែងរកសន្តិភាព។
ទន្ទឹមនឹងនេះ អតីតនាយករដ្ឋមន្ត្រីកម្ពុជាដែលមានបទពិសោធន៍ដឹកនាំរដ្ឋាភិបាលជាង ៣៨ឆ្នាំ បានក្រើនរំឮកទៅកាន់ដៃគូអភិវឌ្ឍន៍ ដែលធ្លាប់មានបំណងចង់លូកដៃចូលការដឹកនាំរដ្ឋាភិបាលនោះ ឱ្យបញ្ឈប់សកម្មភាព។
លោក ហ៊ុន សែន អះអាងថា ការប៉ុនប៉ងដើម្បីបង្កអស្ថិរភាពក្នុងប្រទេសកម្ពុជា នៅតែមានតាមរយៈបដិវត្តន៍ពណ៌។ លោកបន្តថា លោកសូមបញ្ជូនសារទៅកាន់ដៃគូអភិវឌ្ឍន៍របស់កម្ពុជា សូមមេត្តាបញ្ឈប់នូវការជ្រៀតជ្រែកតាមរយៈការប្រើប្រាស់ជំនួយរបស់ខ្លួន ក្រោមហេតុផលលទ្ធិប្រជាធិបតេយ្យ និងសិទ្ធិមនុស្ស ដើម្បីបង្កអស្ថិរភាពនៅក្នុងព្រះរាជាណាចក្រកម្ពុជា។
លោក ហ៊ុន សែន បន្តថា លោកសង្ឃឹមថាដៃគូអភិវឌ្ឍន៍ទាំងនោះនឹងយល់ពីភាពចាំបាច់របស់កម្ពុជា ក្នុងការរក្សាសន្តិភាព និងស្ថិរភាពរបស់ខ្លួន។
អ្នកនាំពាក្យរបស់ស្ថានទូតអាមេរិកប្រចាំកម្ពុជា កញ្ញា Stephanie Arzate ធ្លាប់ប្រាប់សារព័ត៌មានក្នុងស្រុកកន្លងមកថា ការលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្ស គឺជាចំណុចស្នូលនៃគោលនយោបាយការបរទេសរបស់អាមេរិកនៅកម្ពុជា និងជុំវិញពិភពលោក។ អ្នកស្រីបន្តថា អាមេរិកមិនគាំទ្របុគ្គល ស្ថាប័ន ឬគណបក្សនយោបាយណាមួយឡើយ ហើយការជួបជាមួយបុគ្គលនានា ជាបែបបទ និងការអនុវត្តនៃការទូតរបស់អាមេរិក។
អ្នកវិភាគនយោបាយ លោក សេង សារី ប្រាប់សារព័ត៌មានក្នុងស្រុកកន្លងមកថា រដ្ឋាភិបាលរបស់អតីតនាយករដ្ឋមន្ត្រី ហ៊ុន សែន បានធ្វើនយោបាយដោយយកសហរដ្ឋអាមេរិកធ្វើជាសត្រូវ ដែលលោកចាត់ទុកថា នេះជាយុទ្ធសាស្ត្ររបស់លោក ហ៊ុន សែន ដើម្បីចំណេញប្រយោជន៍នយោបាយ។ រដ្ឋាភិបាលកម្ពុជាតែងតែអះអាងថា ខ្លួនប្រកាន់ខ្ជាប់នូវគោលការណ៍អព្យាក្រឹត្យ ប៉ុន្តែការអនុវត្តជាក់ស្តែងលម្អៀងទៅរកចិន។
ប្រភពដដែលលើកឡើងថា នៅក្នុងវិទ្យាសាស្ត្រនយោបាយ គេថាចាប់យកសត្រូវនយោបាយ កំណត់សត្រូវនយោបាយ ហើយដើម្បីទាក់ទាញការចាប់អារម្មណ៍ទៅបង្ហាញទៅពលរដ្ឋថាសូម្បីតែអាមេរិកក៏ខ្លួនហ៊ានឈ្លោះជាមួយដែរ សូម្បីតែអាមេរិកក៏ខ្លួនហ៊ានតតាំងជាមួយដែរ ដើម្បីទាក់ទាញការគាំទ្រ។ ចំណុចនេះ លោកសង្កេតឃើញថា វាហាក់ដូចជាស្រដៀងទៅនឹងចុងសម័យសង្គមរាស្ត្រនិយម ហើយប្រហែលជាអាចឆ្លុះបញ្ចាំងថាវាអាចជាកាលៈទេសៈមួយនៃចុងសម័យការដឹកនាំរបស់លោកនាយករដ្ឋមន្ត្រី ហ៊ុន សែន។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានលើកឡើងថា ក្នុងនាមអង្គការសង្គមស៊ីវិលដែលធ្វើការលើការការពារសិទ្ធិមនុស្ស និងអប់រំពលរដ្ឋឲ្យបានយល់ដឹងអំពីសិទ្ធិរបស់ខ្លួននោះ គឺពុំដែលធ្វើការងារក្រៅអំពីបេសកកម្មរបស់អង្គការខ្លួននោះទេ។
ប្រភពដដែលអះអាងថា សមាគមរបស់លោកតែងតែធ្វើការសហការជាមួយរដ្ឋាភិបាល ដើម្បីនឹងចង្អុលបង្ហាញអំពីចំណុចខ្វះខាតរបស់រដ្ឋាភិបាល ធ្វើយ៉ាងណាជួយពលរដ្ឋដែលត្រូវបានគេរំលោភបំពានសិទ្ធិមនុស្ស ឬក៏ត្រូវគេប្រើហិង្សាមកលើប្រជាពលរដ្ឋ ឲ្យបានទាន់ពេល។ ក្នុងនាមសង្គមស៊ីវិល គឺជាកញ្ចក់ឆ្លុះបង្ហាញរដ្ឋាភិបាល ពុំមែនធ្វើការប្រឆាំងនឹងរដ្ឋាភិបាលនោះទេ៕