 ស្នើសុំជំនួយដោះមីនបន្ថែមទៀតពីរាជរដ្ឋាភិបាលកម្ពុជា ដោយសារតែប្រទេសរុស្ស៊ី បានពង្រាយគ្រាប់មីនមិនទាន់ផ្ទុះទាំងលើគោក និងលើទឹកក្នុងទឹកដីរបស់ខ្លួនកាន់តែច្រើនឡើងៗ ដែលមានចំនួនរហូតដល់ទៅប្រមាណជា ១២លានគ្រាប់ ឬច្រើនជាងនេះ។){kind=link}
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelensky) ស្នើសុំជំនួយដោះមីនបន្ថែមទៀតពីរាជរដ្ឋាភិបាលកម្ពុជា ដោយសារតែប្រទេសរុស្ស៊ី បានពង្រាយគ្រាប់មីនមិនទាន់ផ្ទុះទាំងលើគោក និងលើទឹកក្នុងទឹកដីរបស់ខ្លួនកាន់តែច្រើនឡើងៗ ដែលមានចំនួនរហូតដល់ទៅប្រមាណជា ១២លានគ្រាប់ ឬច្រើនជាងនេះ។
ប្រធានាធិបតីអ៊ុយក្រែន លោក ហ្សេឡេនស្គី (Volodymyr Zelensky) បានផ្តល់សម្ភាសន៍ដល់ក្រុមអ្នកសារព័ត៌មានអន្តរជាតិមកពីតំបន់អាស៊ី រួមទាំងអ្នកសារព័ត៌មាន The Cambodia Daily កាលពីថ្ងៃអង្គារ ទី២៨ ខែវិច្ឆិកា ថា កងទ័ពអ៊ុយក្រែននៅពេលនេះកំពុងតែត្រូវការជំនួយជាបន្ទាន់ ដែលអាចដោះគ្រាប់មីនមិនទាន់ផ្ទុះក្នុងទឹកដីរបស់ខ្លួនបាន ដូចជា ការបង្កើនចំនួនឧបករណ៍ដោះមីន បង្កើនចំនួនអ្នកជំនាញដោះមីន និងបង្កើនបច្ចេកវិទ្យាដោះមីន ជាដើម ដើម្បីធានាអាយុជីវិតកងទ័ព និងអាយុជីវិតពលរដ្ឋអ៊ុយក្រែន ក្នុងសង្គ្រាមជាមួយរុស្ស៊ី នៅពេលនេះ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានថ្លែងអំណរគុណដល់រាជរដ្ឋាភិបាលកម្ពុជាជាខ្លាំងដែលបានផ្តល់ជំនួយក្នុងការដោះមីនដល់ខ្លួន ដោយការបញ្ជូនអ្នកបង្រៀនដោះមីនមកឱ្យអ៊ុយក្រែន កាលពីចុងឆ្នាំ២០២២ កន្លងទៅនោះ។
មន្ត្រីយោធាអ៊ុយក្រែនខ្លះអះអាងថា គ្រាប់មីនដែលកងទ័ពរុស្ស៊ី បានពង្រាយលើទឹកដីអ៊ុយក្រែន នៅពេលនេះមានចំនួនរហូតដល់ទៅប្រមាណជា ១២លានគ្រាប់ ឬច្រើនជាងនេះ ហើយមីនទាំងនោះមានទាំងលើគោក និងលើសមុទ្រ ជាពិសេសគឺនៅកំពង់ផែអូដេសា ដែលស្ថិតនៅភាគខាងត្បូងនៃប្រទេសអ៊ុយក្រែន ដែលជាច្រកនាំចេញរបស់អ៊ុយក្រែនទៅកាន់ពិភពលោកតែម្តង ដូចជាទៅកាន់ប្រទេសអាហ្វ្រិក ទៅកាន់តំបន់អាស៊ី និងទៅកាន់តំបន់អឺរ៉ុប ជាដើម។
កាលពីចុងខែវិច្ឆិកា ឆ្នាំ២០២២ អតីតនាយករដ្ឋមន្ត្រីកម្ពុជាលោក ហ៊ុន សែន បានប្រកាសថា រាជរដ្ឋាភិបាលកម្ពុជាបានសហការជាមួយប្រទេសជប៉ុន ក្នុងការបញ្ជូនក្រុមគ្រូជំនាញបច្ចេកទេសបោសសម្អាតគ្រាប់មីនចំនួន ៣នាក់មកពីមជ្ឈមណ្ឌលសកម្មភាពកម្ចាត់មីនកម្ពុជា (CMAC) ដើម្បីជួយផ្តល់ការហ្វឹកហ្វឺនជូនអ្នកដោះមីននៅប្រទេសអ៊ុយក្រែន ដែលត្រូវធ្វើឡើងពីរដំណាក់កាល គឺលើកទី១ ត្រូវបញ្ជូនទៅក្នុងខែធ្នូ ឆ្នាំ២០២២ និងលើកទី២ គឺត្រូវបញ្ជូនទៅក្នុងត្រីមាសទី១ ក្នុងឆ្នាំ២០២៣ នេះ។
សង្គ្រាមរវាងរុស្ស៊ី និងអ៊ុយក្រែន ដែលកំពុងជាប់ស្អិតដូចកៅស៊ូនៅពេលនេះ គឺមានរយៈពេល ៦៤២ថ្ងៃហើយ។ ក្រៅពីបញ្ហាដោយសារគ្រាប់មីន អ៊ុយក្រែនក៏មានបញ្ហាចំពោះមុខផ្សេងទៀតដែរ គឺអ៊ុយក្រែន កំពុងតែត្រូវការជាចាំបាច់នូវប្រព័ន្ធការពារដែនអាកាសរបស់ខ្លួនពីការបាញ់ផ្លោងគ្រាប់មីស៊ីល និងដ្រូនរបស់រុស្ស៊ី ដែលជាដ្រូនផ្តល់ដោយប្រទេសអ៊ីរ៉ង់ កន្លងមក ខណៈដ្រូនទាំងនោះក៏ធ្លាប់បានហោះចូលទៅក្នុងទីក្រុងគៀវ ចំនួន ៧៥គ្រឿងកាលពីពេលថ្មីៗនេះដែរ ប៉ុន្តែត្រូវកងទ័ពអ៊ុយក្រែនបាញ់ទម្លាក់អស់ ៧៤គ្រឿង ខណៈមួយគ្រឿងទៀត បានធ្លាក់ចំសាលាមតេ្តយ្យបណ្តាលឱ្យមានក្មេងរងរបួស ប៉ុន្តែមិនមានមនុស្សស្លាប់នោះទេ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បន្ថែមថា ក្រៅពីបញ្ហាប្រឈមខាងលើ អ៊ុយក្រែនក៏មានបញ្ហាចំពោះមុខបន្ថែមទៀតដែរចំពោះការផ្តល់សព្វាវុធធុនធ្ងន់ ដូចជាកាំភ្លើង Artillery ពីកូរ៉េខាងជើងទៅឱ្យប្រទេសរុស្ស៊ី រាប់ម៉ឺនគ្រាប់សម្រាប់ផ្លោងដាក់អ៊ុយក្រែន សព្វថ្ងៃនេះ ជាដើម។
ចំណែកភរិយាប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី គឺអ្នកស្រី អូឡេណា ហ្សេឡេនស្គី (Olena Zelenskyy) អះអាងថា អ្នកស្រីស្នើសុំឱ្យមានជំនួយមនុស្សធម៌កាន់តែច្រើនបន្ថែមទៀតសម្រាប់ប្រជាពលរដ្ឋអ៊ុយក្រែន ដែលរស់នៅតាមតំបន់មានជម្លោះ ព្រោះថាពលរដ្ឋអ៊ុយក្រែនសព្វថ្ងៃនេះ កំពុងខ្វះខាតសម្ភារៈជាច្រើន ដូចជា ភួយ អាវរងា ថ្នាំពេទ្យ ព្រមទាំងបរិក្ខារពេទ្យជាច្រើនទៀតផងដែរ។
គិតចាប់តាំងពីផ្ទុះសង្គ្រាមរវាងរុស្ស៊ី និងអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតដល់ថ្ងៃទី២៩ ខែវិច្ឆិកា ឆ្នាំ២០២៣ នេះ គឺមានរយៈពេល ៦៤២ថ្ងៃហើយ ខណៈសង្គ្រាមនេះហាក់មិនទាន់មានពន្លឺក្នុងការចរចាបញ្ចប់ដើម្បីរកសន្តិភាពនៅឡើយទេ ហើយការផ្ទុះសង្គ្រាមនេះបានធ្វើឱ្យប្រទេសអ៊ុយក្រែន បិទវិស័យទេសចរណ៍របស់ខ្លួនទាំងស្រុង ខណៈការធ្វើដំណើរចូលទៅក្នុងប្រទេសនេះ ត្រូវចូលទៅប្រទេសប៉ូឡូញ ដោយចំណាយពេលជិះរថភ្លើងប្រមាណជាង ១០ម៉ោងឯណោះ ដោយសារតែជើងយន្តហោះរបស់ប្រទេសអ៊ុយក្រែន ត្រូវរងនូវការចាំស្ទាក់វាយប្រហារពីកងទ័ពរុស្ស៊ីគ្រប់ពេលទាំងអស់។
ជុំវិញបញ្ហានេះ អង្គការកាកបាទក្រហមអន្តរជាតិ បានអះអាងកាលពីពេលកន្លងទៅថា សង្គ្រាមនៅអ៊ុយក្រែន ដែលបង្កឡើងដោយរុស្ស៊ី កំពុងតែបន្សល់ទុកនូវគ្រាប់មីនមិនទាន់ផ្ទុះជាច្រើនគ្រាប់ ដែលនៅរាយប៉ាយក្នុងដីអ៊ុយក្រែន ហើយគ្រាប់មីនមិនទាន់ផ្ទុះទាំងនោះ មិនត្រឹមតែបង្កគ្រោះថ្នាក់ដល់អាយុជីវិតរបស់ប្រជាជនអ៊ុយក្រែនប៉ុណ្ណោះទេ តែវានឹងធ្វើឲ្យដីកសិកម្មរបស់អ៊ុយក្រែនប្រើការលែងកើតក្នុងរយៈពេលយូរឆ្នាំទៅមុខទៀតផងដែរ។
ចំណែកអង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានអះអាងថា កងទ័ពរុស្ស៊ីបានប្រើប្រាស់គ្រាប់មីនយ៉ាងហោចណាស់ ៧ប្រភេទ ដែលបានបង្កៃក្នុងដីតាមសមរភូមិជាច្រើន ក្នុងនោះ កសិករអ៊ុយក្រែនជាច្រើននាក់បានរងរបួស និងស្លាប់ នៅពេលដែលពួកគេព្យួរដីកសិកម្មប៉ះនឹងគ្រាប់មីនទាំងនោះ។
កាលពីចុងខែកក្កដា ឆ្នាំ២០២៣ អ្នកជំនាញដោះមីនរបស់កម្ពុជា ជប៉ុន ប៉ូឡូញ និងសហរដ្ឋអាមេរិក បានបណ្តុះបណ្តាលបុគ្គលិកសង្គ្រោះបន្ទាន់អ៊ុយក្រែន ឱ្យចេះប្រើឧបករណ៍ដោះមីនរបស់ប្រទេសជប៉ុន នៅក្នុងប្រទេសប៉ូឡូញ ដែលការបណ្តុះបណ្តាលនេះបានចាប់ផ្តើមតាំងអំឡុងខែមករា ឆ្នាំ២០២៣ មក ខណៈគ្រាប់មីនមិនទាន់ផ្ទុះ និងគ្រាប់បែកជាច្រើនប្រភេទដែលត្រូវបានកងទ័ពរុស្ស៊ី ពង្រាយ គឺមានដល់ទៅប្រមាណជា ៤០ភាគរយនៃផ្ទៃដីរបស់អ៊ុយក្រែន ទៅហើយនោះ៕