គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប នឹងបញ្ចប់ដំណើរការនៃការចុះឈ្មោះបោះឆ្នោតទូទាំងប្រទេសនៅថ្ងៃព្រហស្បតិ៍ នេះ បន្ទាប់ពីដំណើរការអស់រយៈពេល ៤៩ថ្ងៃដែលមានប្រជាពលរដ្ឋចុះឈ្មោះបោះឆ្នោតថ្មីគិតត្រឹមថ្ងៃពុធ មានចំនួនជាង ៥៧ម៉ឺននាក់ ខណៈអ្នកដែលត្រូវលុបឈ្មោះចេញពីបញ្ជីមានជាង ២៤ម៉ឺននាក់។
គ.ជ.ប បានដាក់ដំណើរការកម្មវិធីចុះឈ្មោះបោះឆ្នោតសម្រាប់អ្នកចុះឈ្មោះបោះឆ្នោតថ្មីមានរយៈពេល ៤៩ថ្ងៃ ដោយគិតចាប់ពីថ្ងៃទី២០ ខែតុលា រហូតដល់ថ្ងៃទី៧ ខែធ្នូ ឆ្នាំ២០២២ នេះ ហើយដំណើរការនេះនឹងបិទបញ្ចប់ទាំងស្រុងនៅថ្ងៃទី៨ ធ្នូ ខណៈអ្នកចុះឈ្មោះបោះឆ្នោតថ្មីមានចំនួន ៥៧ម៉ឺន ៣១៥៩នាក់ និងអ្នកដែលត្រូវលុបចេញពីបញ្ជីឈ្មោះបោះឆ្នោតចំនួន ២៤ម៉ឺន ៤៩៣០នាក់ គិតត្រឹមថ្ងៃពុធនេះ។
កាលពីថ្ងៃទី៣០ ខែវិច្ឆិកា ឆ្នាំ២០២២ គណៈកម្មាធិការជាតិរៀបចំការបោះឆ្នោត បានចេញសេចក្តីជូនដំណឹងថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ នេះ មានគោលដៅធានាឱ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាពសម្រាប់ប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ខាងមុខនេះ។
គណៈកម្មាធិការអាជ្ញាកណ្ដាលនេះ អំពាវនាវឱ្យប្រជាពលរដ្ឋទើបនឹងគ្រប់អាយុ ១៨ឆ្នាំ គឺអ្នកដែលកើតមុន ឬត្រឹមថ្ងៃទី២៤ ខែកក្កដា ឆ្នាំ២០០៥ ឬប្រជាពលរដ្ឋដែលមិនធ្លាប់ចុះឈ្មោះបោះឆ្នោត ឬប្រជាពលរដ្ឋដែលផ្លាស់ទីលំនៅចូលទៅឃុំ-សង្កាត់ថ្មី សូមនាំគ្នាទៅចុះឈ្មោះបោះឆ្នោតឱ្យបានគ្រប់ៗគ្នា ដើម្បីមានសិទ្ធិចូលរួមបោះឆ្នោតជ្រើសតាំងតំណាងរាស្ត្រនៅពេលខាងមុខនេះ។
កាលពីថ្ងៃទី២០ ខែតុលា ឆ្នាំ២០២២ គ.ជ.ប បានចេញសេចក្តីប្រកាសព័ត៌មានឱ្យប្រជាពលរដ្ឋទៅពិនិត្យបញ្ជីឈ្មោះ និងចុះឈ្មោះបោះឆ្នោតសម្រាប់អាណត្តិទី៧ នៅខែកក្កដា ឆ្នាំ២០២៣ ខាងមុខនេះ ដែលត្រូវដំណើរការរយៈពេល ៥០ថ្ងៃ និងចែកជា ៣ដំណាក់កាល គឺចុះឈ្មោះនៅសាលាឃុំ-សង្កាត់ ១៥ថ្ងៃ ចុះឈ្មោះចល័តនៅតាមភូមិ ២៥ថ្ងៃ និងចុះឈ្មោះនៅសាលាឃុំ-សង្កាត់វិញរយៈពេល ១០ថ្ងៃ។
សកម្មជនគណបក្សសង្គ្រោះជាតិ លោក ហ៊ុន កុសល ប្រាប់សារព័ត៌មាន The Cambodia Daily នៅថ្ងៃទី៧ ធ្នូ នេះថា គណៈកម្មាធិការជាតិរៀបចំការបោះឆ្នោតនៅតែមិនអាចរៀបចំអនុវត្តនូវដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតបានល្អនៅឡើយ ត្បិតមន្ត្រីរបស់ខ្លួនបំពេញការងារនៅមូលដ្ឋាននៅតែបង្កភាពស្មុគស្មាញសម្រាប់ប្រជាពលរដ្ឋដដែល។
ជាក់ស្តែង ខ្លួនលោកផ្ទាល់ដែលជាសកម្មជននយោបាយជាន់ខ្ពស់មួយរូប ត្រូវចំណាយពេលដល់ទៅ ៤លើក ដើម្បីអាចចុះឈ្មោះបោះឆ្នោតបាន ដោយសារតែការបំពេញការងារមិនបានគោរពតាមតួនាទីរបស់ពួកគេ។
លោក ហ៊ុន កុសល លើកឡើងថា បញ្ហាដែលកើតមានចំពោះលោកនេះក៏ទំនងជាកើតមានយ៉ាងច្រើននៅទូទាំងប្រទេសដែរ ខណៈប្រជាពលរដ្ឋខ្លះមិនបានតវ៉ានៅពេលដែលមន្ត្រីមួយចំនួនបានបង្កការលំបាកដល់ពួកគាត់ ឬអាចមកពីប្រជាពលរដ្ឋទាំងនោះមិនចង់ទៅបោះឆ្នោតផង។
សកម្មជនគណបក្សសង្គ្រោះជាតិរូបនេះអំពាវនាវឱ្យគណៈកម្មាធិការជាតិរៀបចំការបោះឆ្នោត អនុវត្តការងាររបស់ខ្លួនឱ្យមានភាពអព្យាក្រឹត្យ ឯករាជភាព និងមិនប្រកាន់និន្នាការនយោបាយ ដើម្បីធានានូវការសម្រេចចិត្តរបស់ពលរដ្ឋម្ចាស់ឆ្នោតក្នុងការជ្រើសរើសមេដឹកនាំនៅក្នុងការបោះឆ្នោតជាតិឆ្នាំ២០២៣ ខាងមុខនេះប្រកបដោយតម្លាភាព។
កាលពីថ្ងៃទី២៩ ខែមិថុនា ឆ្នាំ២០២២ ប្រមុខរដ្ឋាភិបាលកម្ពុជា លោក ហ៊ុន សែន បានចេញអនុក្រឹត្យស្ដីពីការកំណត់កាលបរិច្ឆេទនៃការបោះឆ្នោតជាតិអាណត្តិទី៧ ដែលបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាថ្ងៃបោះឆ្នោតជ្រើសតាំងតំណាងរាស្ត្រទៅតាមអាណត្តិរបស់ខ្លួន៕